PM Modi Vadodara Visit Update: વડાપ્રધાન નરેન્દ્ર મોદીએ આજે વડોદરામાં આયોજિત 'સરદારધામ-3'ના લોકાર્પણ કાર્યક્રમમાં દેશવાસીઓને એક મહત્વપૂર્ણ અને ભાવુક અપીલ કરી છે. પશ્ચિમ એશિયામાં સર્જાયેલી યુદ્ધની સ્થિતિને આ દશકની સૌથી મોટી આફત ગણાવતા પીએમ મોદીએ નાગરિકોને વિદેશી આયાત પર નિર્ભરતા ઘટાડવા અને સંકટના સમયે એકજૂટ થવા આહવાન કર્યું હતું.
પશ્ચિમ એશિયાનું યુદ્ધ: આ દશકનું મોટું સંકટ
વડાપ્રધાને જણાવ્યું હતું કે જે રીતે 'કોરોના' આ સદીની સૌથી મોટી આફત હતી, તેવી જ રીતે પશ્ચિમ એશિયાનો સંઘર્ષ આ દશકની ગંભીર સમસ્યા છે. તેમણે ઉમેર્યું કે, "જ્યાં સુધી સ્થિતિ સામાન્ય ન થાય ત્યાં સુધી આપણે એવી વસ્તુઓનો વપરાશ ઘટાડવો પડશે જે વિદેશથી આયાત થાય છે. ભારતના ઈમ્પોર્ટ બિલમાં મોટો હિસ્સો ક્રૂડ ઓઈલનો છે, અને કમનસીબે જે ક્ષેત્રમાંથી દુનિયાને તેલ મળે છે ત્યાં જ અત્યારે સંઘર્ષ ચાલી રહ્યો છે."
પેટ્રોલ-ડીઝલ બચાવવા માટે PMના 'એક્શન પ્લાન'ના સૂચનો
દેશ પરના આર્થિક બોજને ઘટાડવા માટે વડાપ્રધાને નાગરિકો અને સંસ્થાઓને નીચે મુજબના પગલાં લેવા વિનંતી કરી છે. સરકારી અને ખાનગી ઓફિસોમાં શક્ય હોય ત્યાં 'વર્ક ફ્રોમ હોમ' અને વર્ચ્યુઅલ મીટિંગને પ્રાથમિકતા આપવામાં આવે. શાળાઓમાં થોડા સમય માટે ઓનલાઈન શિક્ષણની વ્યવસ્થા કરવામાં આવે જેથી પરિવહનનો ખર્ચ ઘટે. ખાનગી વાહનોને બદલે મેટ્રો, ઈલેક્ટ્રિક બસ (EV) અને પબ્લિક ટ્રાન્સપોર્ટનો વધુ ઉપયોગ કરો. વિદેશી મુદ્રા બચાવવા માટે બિનજરૂરી સોનાની ખરીદી અને આયાતી વસ્તુઓનો મોહ છોડવા અપીલ કરી. PM નરેન્દ્ર મોદીએ જણાવ્યું હતું કે તમારા પર તો મારો વધુ હક છે એટલે જરા હકથી કહી રહ્યો છું... જેમ બુંદ-બુંદથી ઘડો ભરાય છે તેમ આપણા નાના પ્રયાસો દેશને મોટા સંકટમાંથી ઉગારશે.
'સરદાર ગૌરવ રત્ન એવોર્ડ'થી સન્માન
કાર્યક્રમ દરમિયાન પાટીદાર સંસ્થાઓ દ્વારા વડાપ્રધાન નરેન્દ્ર મોદીને 'સરદાર ગૌરવ રત્ન એવોર્ડ'થી સન્માનિત કરવામાં આવ્યા હતા. આ પ્રસંગે ભાવુક થતા તેમણે કહ્યું કે, "સરદાર સાહેબનું નામ જે એવોર્ડ સાથે જોડાયેલું હોય, તેનાથી મારી જવાબદારી વધી જાય છે. સરદાર સાહેબના અધૂરા સપના પૂરા કરવા એ મારા નસીબમાં લખાયું છે અને હું તેમાં કોઈ કચાશ નહીં રાખું."
સોમનાથથી વડોદરા: ભક્તિ અને શક્તિનો સંગમ
આજે સવારે સોમનાથ મંદિરમાં પ્રાણ-પ્રતિષ્ઠાના 75 વર્ષ પૂર્ણ થવાના અવસરે હાજરી આપ્યા બાદ પીએમ વડોદરા પહોંચ્યા હતા. તેમણે 11 મે, 1998ના પોખરણ પરમાણુ પરીક્ષણ (ઓપરેશન શક્તિ) ને યાદ કરતા કહ્યું કે, ત્યારે પણ વિશ્વએ ભારતને દબાવવાનો પ્રયાસ કર્યો હતો પણ આપણે ડર્યા વગર અડગ રહ્યા હતા.
શિક્ષણ ક્ષેત્રે મોટી જાહેરાત
આ કાર્યક્રમમાં ઝાયડસના ચેરમેન પંકજ પટેલે અમદાવાદમાં 500 કરોડના ખર્ચે 'સરદારધામ યુનિવર્સિટી'ની સ્થાપના કરવાની જાહેરાત કરી હતી. મુખ્યમંત્રી ભૂપેન્દ્ર પટેલે પણ પાટીદાર સમાજના ખમીરની પ્રશંસા કરતા જણાવ્યું કે આ સમાજે ખેતીથી લઈને ઉદ્યોગ સુધી દરેક ક્ષેત્રમાં દેશના વિકાસમાં યોગદાન આપ્યું છે. વડાપ્રધાનની આ અપીલ સ્પષ્ટ કરે છે કે વૈશ્વિક અસ્થિરતા વચ્ચે ભારત પોતાની આર્થિક સુરક્ષા માટે 'જનભાગીદારી'ના મંત્ર પર આગળ વધવા માંગે છે. નાગરિકોની નાની બચત દેશની અર્થવ્યવસ્થા માટે સુરક્ષા કવચ બની શકે છે.
વર્ક ફ્રોમ હોમ અને ઓનલાઈન ક્લાસ પર ભાર
પ્રધાનમંત્રીએ ખાસ કરીને સરકારી અને ખાનગી ક્ષેત્રની ઓફિસોને સંદેશ આપતાં કહ્યું કે શક્ય હોય ત્યાં સુધી વર્ચ્યુઅલ મીટિંગ્સ અને વર્ક ફ્રોમ હોમને પ્રાથમિકતા આપવી જોઈએ. તેમણે જણાવ્યું કે આ પગલાં માત્ર ઇંધણ બચાવવા માટે જ નહીં પરંતુ ટ્રાફિક અને ઊર્જા વપરાશ ઘટાડવા માટે પણ મહત્વપૂર્ણ છે. સ્કૂલ અને શૈક્ષણિક સંસ્થાઓને લઈને પણ PM મોદીએ અપીલ કરી કે જો પરિસ્થિતિ માંગે તો થોડા સમય માટે ઓનલાઈન ક્લાસીસની વ્યવસ્થા કરવી જોઈએ. કોરોના સમયગાળા દરમિયાન દેશે ડિજિટલ શિક્ષણનો અનુભવ મેળવ્યો હતો અને હવે જરૂર પડે તો તે મોડલ ફરી અસરકારક બની શકે છે. તેમણે લોકોને મેટ્રો, ઈવી બસ અને પબ્લિક ટ્રાન્સપોર્ટનો વધુ ઉપયોગ કરવાની સલાહ આપી. PM મોદીએ કહ્યું કે દેશ સામે પડકાર છે ત્યારે દરેક નાગરિકની નાની બચત પણ દેશ માટે મોટી શક્તિ બની શકે છે.
“મારા દેશના દરેક નાગરિકને અપીલ”
PM મોદીએ ભાવુક અંદાજમાં કહ્યું કે “તમારા પર મારો વધુ હક છે એટલે જરા હકથી કહી રહ્યો છું.” તેમણે દેશવાસીઓને અપીલ કરતાં જણાવ્યું કે જ્યાં સુધી વૈશ્વિક સ્થિતિ સામાન્ય ન થાય ત્યાં સુધી આયાત આધારિત વસ્તુઓનો ઉપયોગ ઓછો કરવો જોઈએ. તેમણે યાદ અપાવ્યું કે અગાઉ પણ જ્યારે દેશ મુશ્કેલ સમયમાં પસાર થયો હતો ત્યારે જનભાગીદારીથી જ દેશે પડકારોનો સામનો કર્યો હતો. કોરોના દરમિયાન લોકોના સહયોગથી દેશે સફળતાપૂર્વક સંકટનો સામનો કર્યો હતો અને હવે પણ એ જ એકતાની જરૂર છે.
સરદાર ગૌરવ રત્ન એવોર્ડથી PM મોદી સન્માનિત
વડોદરાના કાર્યક્રમ દરમિયાન પાટીદાર સંસ્થાઓ દ્વારા વડાપ્રધાન નરેન્દ્ર મોદીને “સરદાર ગૌરવ રત્ન એવોર્ડ”થી સન્માનિત કરવામાં આવ્યા હતા. એવોર્ડ સ્વીકારતાં PM મોદીએ કહ્યું કે સરદાર પટેલના નામ સાથે જોડાયેલું કોઈપણ સન્માન જવાબદારી વધારે છે. તેમણે જણાવ્યું કે “સરદાર સાહેબના જે સ્વપ્ન હતા, તેને પૂર્ણ કરવાનું મારા નસીબમાં લખાયું છે.” PM મોદીએ વિશ્વાસ આપ્યો કે સરદાર પટેલના સપનાઓને સાકાર કરવા માટે તેઓ સતત મહેનત કરતા રહેશે. તેમણે ઉમેર્યું કે ગુજરાત તેમને સારી રીતે જાણે છે અને “પાછા વળવાનું મને ફાવતું નથી.”
સોમનાથથી વડોદરા સુધી વિકાસ અને સંકલ્પનો સંદેશ
આજે સવારે PM મોદી સોમનાથ મંદિરમાં પ્રાણ-પ્રતિષ્ઠાના 75 વર્ષ પૂર્ણ થવાના કાર્યક્રમમાં પણ હાજર રહ્યા હતા. તેમણે કહ્યું કે સોમનાથ મંદિરનું પુનઃનિર્માણ સરદાર પટેલના સંકલ્પનું પરિણામ હતું અને આજનો દિવસ પુણ્ય પર્વ સમાન છે. PM મોદીએ 11 મે 1998ના પોખરણ પરમાણુ પરીક્ષણનો પણ ઉલ્લેખ કર્યો. તેમણે કહ્યું કે તે સમયે વિશ્વની ઘણી શક્તિઓએ ભારત પર દબાણ બનાવવાનો પ્રયાસ કર્યો હતો, છતાં ભારત ડગમગાયું નહીં. તેમણે કહ્યું કે “ઓપરેશન શક્તિ” માત્ર પરમાણુ પરીક્ષણ નહોતું, પરંતુ ભારતના આત્મવિશ્વાસનું પ્રતિક હતું.
આ પણ વાંચો: વડોદરામાં PM મોદીના આગમન પહેલા કડક સુરક્ષા : 1500થી વધુ પોલીસ રહેશે તૈનાત
સરદારધામ અને શિક્ષણ પર ખાસ ભાર
પ્રધાનમંત્રીએ સરદારધામના પ્રયાસોની પ્રશંસા કરતાં જણાવ્યું કે જે સમાજ શિક્ષણને પ્રાથમિકતા આપે છે તે હંમેશા આગળ વધે છે. તેમણે કહ્યું કે જ્યારે પણ તક મળે ત્યારે તેઓ સરદારધામના પ્રયાસો સાથે ઉભા રહેવાનો પ્રયાસ કરે છે. કાર્યક્રમ દરમિયાન ઝાયડસના ચેરમેન પંકજ પટેલે અમદાવાદમાં આશરે 500 કરોડ રૂપિયાના ખર્ચે સરદારધામ યુનિવર્સિટી સ્થાપવાની જાહેરાત પણ કરી. આ જાહેરાતને પાટીદાર સમાજ અને શિક્ષણ ક્ષેત્ર માટે મહત્વપૂર્ણ માનવામાં આવી રહી છે.
CM ભૂપેન્દ્ર પટેલનું સંબોધન
ગુજરાતના મુખ્યમંત્રી ભૂપેન્દ્ર પટેલે પોતાના સંબોધનમાં કહ્યું કે પાટીદાર સમાજે માત્ર ખેતીમાં જ નહીં પરંતુ ઉદ્યોગ, વ્યવસાય અને વિવિધ ક્ષેત્રોમાં દેશના વિકાસમાં મોટું યોગદાન આપ્યું છે. તેમણે જણાવ્યું કે “પથ્થરને પાટુ મારીને પાણી કાઢવાનું ખમીર પાટીદાર સમાજમાં રહેલું છે.”
શા માટે મહત્વપૂર્ણ છે PM મોદીની અપીલ?
PM મોદીની આ અપીલ માત્ર ઇંધણ બચત પૂરતી મર્યાદિત નથી. વૈશ્વિક સ્તરે વધી રહેલી અનિશ્ચિતતા, ઊર્જા સંકટ અને સપ્લાય ચેઈન પર પડતી અસરને ધ્યાનમાં રાખીને ભારત સરકાર હવે જનભાગીદારી આધારિત અભિગમ અપનાવતી જોવા મળી રહી છે. જો મોટી સંખ્યામાં લોકો પબ્લિક ટ્રાન્સપોર્ટ, વર્ક ફ્રોમ હોમ અને ડિજિટલ શિક્ષણ તરફ વળશે તો પેટ્રોલ-ડીઝલની માંગમાં ઘટાડો થઈ શકે છે. તેની સીધી અસર દેશના આયાત બિલ અને મોંઘવારી પર પડી શકે છે. સાથે જ પર્યાવરણ અને ટ્રાફિક સમસ્યાઓમાં પણ રાહત મળી શકે છે.
