LPG અને PNG ગ્રાહકો માટે નવા નિયમો અમલમાં : 25 દિવસ પહેલાં નહીં મળે બીજો ગેસ સિલિન્ડર, જાણો તમામ મહત્વપૂર્ણ ફેરફારો

કેન્દ્ર સરકારે એલપીજી (LPG) ગેસ સિલિન્ડર અને પાઇપ્ડ નેચરલ ગેસ (PNG)નો ઉપયોગ કરતા કરોડો ગ્રાહકો માટે અનેક મહત્વપૂર્ણ નિયમોમાં ફેરફાર કર્યા છે. કેટલાક નિયમો 1 જૂનથી અમલમાં આવ્યા છે, જ્યારે કેટલાક નવા નિયમો 1 જુલાઈથી લાગુ થશે. જો તમે ઘરમાં LPG ગેસ સિલિન્ડર અથવા PNG ગેસ કનેક્શનનો ઉપયોગ કરો છો તો આ તમામ નવા નિયમોની માહિતી જાણવી ખૂબ જ જરૂરી છે. નવા નિયમોનો હેતુ ગેસ સબસિડીમાં પારદર્શિતા લાવવો, ગેરવપરાશ અટકાવવો અને ગેસ વિતરણ વ્યવસ્થાને વધુ સુરક્ષિત બનાવવાનો છે.

હવે 25 દિવસ પહેલાં નહીં બુક કરી શકો બીજો સિલિન્ડર

નવા નિયમો મુજબ શહેરોમાં રહેતા ગ્રાહકો હવે એક ગેસ સિલિન્ડર મેળવ્યા બાદ 25 દિવસ પૂર્ણ થયા પછી જ બીજો LPG સિલિન્ડર બુક કરી શકશે. અગાઉ આ સમયમર્યાદા 21 દિવસ હતી. એટલે કે હવે ગ્રાહકોને બીજા સિલિન્ડર માટે વધુ રાહ જોવી પડશે. જ્યારે ગ્રામ્ય વિસ્તારોના ગ્રાહકો માટે આ સમયમર્યાદા વધુ વધારી દેવામાં આવી છે. હવે ગામડાંમાં રહેતા ગ્રાહકો 45 દિવસ પૂર્ણ થયા બાદ જ બીજો સિલિન્ડર બુક કરી શકશે. સરકારનું માનવું છે કે આ નિયમથી ગેરકાયદેસર સ્ટોકિંગ અને ગેરવપરાશ પર નિયંત્રણ રાખવામાં મદદ મળશે.

OTP વગર નહીં મળે ગેસ સિલિન્ડરની ડિલિવરી

સરકારે ગેસ સિલિન્ડરની ડિલિવરી પ્રક્રિયામાં પણ મોટો ફેરફાર કર્યો છે. હવે માત્ર બુકિંગ રસીદ બતાવવાથી ગેસ સિલિન્ડર મળશે નહીં. જ્યારે ગ્રાહક ગેસ બુક કરશે ત્યારે તેના રજિસ્ટર્ડ મોબાઇલ નંબર પર OTP મોકલવામાં આવશે. ડિલિવરી બોય ઘરે ગેસ સિલિન્ડર લઈને પહોંચે ત્યારે ગ્રાહકે આ OTP જણાવવો ફરજિયાત રહેશે. OTP વેરિફિકેશન સફળ થયા બાદ જ ગેસ સિલિન્ડર આપવામાં આવશે. સરકારના જણાવ્યા મુજબ આ વ્યવસ્થા ગેસની કાળાબજારી રોકવા અને યોગ્ય ગ્રાહક સુધી જ સિલિન્ડર પહોંચે તે સુનિશ્ચિત કરવા માટે અમલમાં મૂકવામાં આવી છે.

PNG કનેક્શન ધરાવતા ગ્રાહકો માટે પણ નવા નિયમો

જો તમારા ઘરમાં PNG ગેસ કનેક્શન શરૂ થઈ ગયું છે તો હવે તમારે 30 દિવસની અંદર તમારું જૂનું LPG સિલિન્ડર ગેસ એજન્સીમાં પરત જમા કરાવવું પડશે. સિલિન્ડર જમા કરાવ્યા બાદ ગ્રાહકને ટ્રાન્સફર વાઉચર આપવામાં આવશે. ભવિષ્યમાં જો ફરી LPG કનેક્શનની જરૂર પડશે તો આ વાઉચરના આધારે નવું કનેક્શન મેળવી શકાશે. સરકારનું કહેવું છે કે આ પગલાથી એક જ ગ્રાહક પાસે બિનજરૂરી રીતે બે ગેસ વ્યવસ્થાઓ ચાલુ રાખવાની સ્થિતિમાં ઘટાડો થશે.

આ પાંચ નવા નિયમો દરેક LPG ગ્રાહકે જાણી લેવા જરૂરી

નવા નિયમો મુજબ હવે દરેક LPG ગ્રાહક માટે ગેસ કનેક્શનને આધાર કાર્ડ સાથે લિંક કરવું ફરજિયાત રહેશે. આધાર લિંક ન હોય તો ઓનલાઈન અથવા ઓફલાઈન ગેસ બુકિંગ સ્વીકારવામાં આવશે નહીં. એક ઘરેલુ ગેસ કનેક્શન પર એક નાણાકીય વર્ષ દરમિયાન વધુમાં વધુ 12 સિલિન્ડરની જ બુકિંગ કરી શકાશે. ઉપરાંત હવે એક રજિસ્ટર્ડ મોબાઇલ નંબર સાથે માત્ર એક જ LPG કનેક્શન લિંક કરી શકાશે. એક જ મોબાઇલ નંબર પર એકથી વધુ ગેસ કનેક્શન રાખવાની મંજૂરી નહીં મળે. ગેસ બુકિંગ દરમિયાન પણ મોબાઇલ પર મળતા OTPની ચકાસણી બાદ જ બુકિંગ કન્ફર્મ થશે. જો કોઈ ગ્રાહક ઘરેલુ LPG કનેક્શનનો વ્યાવસાયિક ઉપયોગ કરતો હોવાનું અથવા અન્યના નામે ગેરરીતિથી કનેક્શન ચલાવતો હોવાનું તપાસમાં સામે આવશે તો તે ગેસ કનેક્શન તાત્કાલિક રદ કરવામાં આવશે.

ઉજ્જવલા યોજના લાભાર્થીઓ માટે e-KYC ફરજિયાત

પ્રધાનમંત્રી ઉજ્જવલા યોજના હેઠળ લાભ મેળવનારા ગ્રાહકો માટે 30 જૂન 2026 સુધી બાયોમેટ્રિક આધાર વેરિફિકેશન એટલે કે e-KYC કરાવવું ફરજિયાત બનાવવામાં આવ્યું છે. જો નિર્ધારિત સમયમર્યાદા સુધી e-KYC પૂર્ણ નહીં કરવામાં આવે તો LPG સબસિડી બંધ થઈ શકે છે. લાંબા સમય સુધી e-KYC નહીં કરાવનાર ગ્રાહકોનું ગેસ કનેક્શન પણ બ્લોક થઈ શકે છે. ગ્રાહકો પોતાની ગેસ કંપનીની અધિકૃત એપ અથવા નજીકની ગેસ એજન્સીમાં જઈને સરળતાથી e-KYC પ્રક્રિયા પૂર્ણ કરી શકે છે.

ઉજ્જવલા સબસિડીમાં પણ મોટો ફેરફાર

સરકારે ઉજ્જવલા યોજના હેઠળ મળતી LPG સબસિડીમાં પણ ફેરફાર કર્યો છે. અગાઉ એક વર્ષમાં 9 ગેસ સિલિન્ડર પર પ્રતિ સિલિન્ડર 300 રૂપિયાની સબસિડી આપવામાં આવતી હતી, જ્યારે હવે વર્ષ દરમિયાન માત્ર 4 સિલિન્ડર પર જ સબસિડી મળશે. આ સબસિડી સીધી ગ્રાહકના e-KYC સાથે જોડાયેલા બેંક ખાતામાં જમા થશે. સરકારનું કહેવું છે કે આ ફેરફારથી સબસિડીનો લાભ માત્ર પાત્ર લાભાર્થીઓ સુધી જ પહોંચશે.