Surat Fire Breaking: ડાયમંડ સિટી સુરતના વ્યસ્ત ગણાતા અઠવા બ્રિજ પર આજે બપોરના સમયે એક ભયાનક દુર્ઘટના સર્જાઈ હતી. બ્રિજ પરથી પસાર થઈ રહેલી એક પેસેન્જર કારમાં અચાનક ચાલુ મુસાફરીએ આગ ફાટી નીકળી હતી. જોતજોતામાં આગે એટલું રૌદ્ર સ્વરૂપ ધારણ કર્યું હતું કે આખી કાર અગનગોળામાં ફેરવાઈ ગઈ હતી. આ ઘટનાને પગલે બ્રિજ પરથી પસાર થતા અન્ય વાહનચાલકોમાં ભારે નાસભાગ અને ભયનો માહોલ જોવા મળ્યો હતો. સદનસીબે, કારમાં સવાર લોકો સમયસૂચકતા વાપરીને સમયસર બહાર નીકળી જવામાં સફળ રહ્યા હતા, જેના કારણે મોટી જાનહાનિ ટળી છે.
ચાલુ કારમાં અચાનક ધુમાડા નીકળ્યા અને આગ ફાટી નીકળી
પ્રાપ્ત વિગતો અનુસાર, કાર ચાલક જ્યારે અઠવા બ્રિજ પરથી પસાર થઈ રહ્યો હતો ત્યારે અચાનક એન્જિનના ભાગેથી ધુમાડા નીકળવાનું શરૂ થયું હતું. ડ્રાઈવરે તરત જ પરિસ્થિતિ પારખી લીધી અને કાર ઉભી રાખી અંદર બેઠેલા તમામ સભ્યો સુરક્ષિત રીતે નીચે ઉતરી ગયા હતા. કાર ઉભી રહ્યાની ગણતરીની મિનિટોમાં જ આખી કાર લપેટમાં આવી ગઈ હતી. આગ એટલી વિકરાળ હતી કે તેના ધુમાડાના ગોટેગોટા દૂર-દૂર સુધી જોવા મળ્યા હતા.
આ પણ વાંચો: સુરત AAP પાર્ટીમાં ભારે ભડકો : એક પાર્ટીમાંથી ટિકિટ લઈ બીજીમાં જોડાયા કાર્યકર્તા
ફાયર વિભાગની કામગીરી અને ટ્રાફિકજામના દ્રશ્યો
ઘટનાની જાણ થતા જ સુરત ફાયર બ્રિગેડનો કાફલો તાત્કાલિક ઘટનાસ્થળે દોડી આવ્યો હતો. ફાયર ફાઈટરોએ પાણીનો મારો ચલાવી આગ પર કાબૂ મેળવ્યો હતો, પરંતુ ત્યાં સુધીમાં કાર સંપૂર્ણપણે બળીને ખાખ થઈ ગઈ હતી. બ્રિજની વચ્ચે સળગતી કારને કારણે ટ્રાફિકની ગંભીર સમસ્યા સર્જાઈ હતી. બ્રિજની બંને બાજુ વાહનોની લાંબી કતારો લાગી ગઈ હતી, જેને પગલે વાહનચાલકો કલાકો સુધી અટવાયા હતા.
શોર્ટ સર્કિટ હોવાની આશંકા
પ્રાથમિક દ્રષ્ટિએ આ આગ કારમાં થયેલા શોર્ટ સર્કિટના કારણે લાગી હોવાનું અનુમાન લગાવવામાં આવી રહ્યું છે. ઉનાળાની શરૂઆત સાથે જ વાહનોમાં આગ લાગવાની ઘટનાઓ વધી રહી છે, ત્યારે ફાયર વિભાગે વાહનચાલકોને તેમના વાહનોનું નિયમિત મેન્ટેનન્સ કરાવવા અપીલ કરી છે. પોલીસ દ્વારા હાલ ટ્રાફિક હળવો કરવાની અને ઘટનાની વધુ તપાસ કરવાની કામગીરી હાથ ધરવામાં આવી છે.
