Surat News: સુરત શહેરમાં વરિષ્ઠ નાગરિકોની સુરક્ષા સામે પડકાર ફેંકતી એક રીઢી ગુનેગાર ગેંગને ઝડપી પાડવામાં સુરત ક્રાઈમ બ્રાન્ચને મોટી સફળતા મળી છે. વૃદ્ધાને અજાણ્યો પદાર્થ સૂંઘાડી બેભાન કરી લૂંટ ચલાવતી વડોદરાની કુખ્યાત 'રિક્ષા ગેંગ'ના ૪ સભ્યોને ક્રાઈમ બ્રાન્ચે દબોચી લીધા છે. પકડાયેલા આરોપીઓમાં બે પુરુષો અને બે મહિલાઓનો સમાવેશ થાય છે. આ ટોળકીની ધરપકડ થતાં જ સુરત અને હરિયાણાના બે મોટા ગુનાઓનો ભેદ ઉકેલાયો છે.
શું હતો સમગ્ર મામલો?
થોડા સમય પહેલાં સુરતના ઉત્રાણ પોલીસ સ્ટેશનની હદમાં એક ચોંકાવનારી ઘટના સામે આવી હતી. જેમાં એક ૭૫ વર્ષીય વૃદ્ધાને નિશાન બનાવવામાં આવ્યા હતા. આ ટોળકીએ વૃદ્ધાને એકલી જોઈ, તેમને કોઈ અજાણ્યો કેમિકલયુક્ત પદાર્થ સૂંઘાડી દીધો હતો. વૃદ્ધા બેભાન થઈ જતાં જ આરોપીઓ તેમની પાસેથી અંદાજે રૂ. ૧.૨૫ લાખની કિંમતની ૨૫ ગ્રામ સોનાની બંગડીઓ લૂંટીને ફરાર થઈ ગયા હતા. આ ઘટનાને પગલે વરિષ્ઠ નાગરિકોની સુરક્ષાને લઈને સ્થાનિક પોલીસ દોડતી થઈ ગઈ હતી.
CCTV અને હ્યુમન સોર્સીસની મદદથી નેટવર્ક ક્રેક કરાયું
આ ગંભીર ગુનાની તપાસ સુરત ક્રાઈમ બ્રાન્ચને સોંપવામાં આવી હતી. ક્રાઈમ બ્રાન્ચની ટીમે ઘટનાસ્થળ અને આસપાસના વિસ્તારોના CCTV ફૂટેજ ઝીણવટપૂર્વક તપાસ્યા હતા. આ સાથે જ પોતાના બાતમીદારો (હ્યુમન સોર્સીસ)ને સક્રિય કર્યા હતા. ટેકનિકલ સર્વેલન્સ અને સચોટ બાતમીના આધારે ક્રાઈમ બ્રાન્ચે આખરે આખી ગેંગને ઘેરી લીધી અને ૨ પુરુષો તથા ૨ મહિલાઓ સહિત કુલ ૪ આરોપીઓની ધરપકડ કરી લીધી હતી.
વડોદરાની રિક્ષા લઈને સુરતમાં આપ્યો ગુનાને અંજામ
પોલીસની પ્રાથમિક પૂછપરછમાં ચોંકાવનારી વિગતો સામે આવી છે. આ ગેંગ મૂળ વડોદરાની છે અને ગુનો આચરવા માટે તેઓ વડોદરાથી સ્પેશિયલ GJ-06 પાસિંગની ઓટો રિક્ષા લઈને સુરત આવ્યા હતા. રિક્ષા હોવાને કારણે કોઈને વહેમ ન જાય તે રીતે તેઓ રોડ પર ફરતા સિનિયર સિટીઝન્સને ટાર્ગેટ કરતા હતા.
આંતરરાજ્ય ગુનાઓનો ભેદ ઉકેલાયો
આરોપીઓની આકરી પૂછપરછ દરમિયાન માત્ર સુરતના ઉત્રાણ પોલીસ સ્ટેશનનો જ અનડિટેક્ટ ગુનો નથી ઉકેલાયો, પરંતુ આ ગેંગના તાર છેક હરિયાણા સુધી જોડાયેલા હોવાનું બહાર આવ્યું છે. હરિયાણાના ગુરુગ્રામ સ્થિત પાલમ વિહાર પોલીસ સ્ટેશનમાં નોંધાયેલા એક અનડિટેક્ટ લૂંટના ગુનાનો ભેદ પણ સુરત પોલીસે ઉકેલી નાખ્યો છે.
પોલીસે ભણાવ્યો કાયદાનો પાઠ
સુરત શહેર પોલીસે આ ટોળકીને જેલના સળિયા પાછળ ધકેલીને કાયદાનો કડક પાઠ ભણાવ્યો છે. ખાસ કરીને સિનિયર સિટીઝન્સને સોફ્ટ ટાર્ગેટ બનાવતી આવી ગેંગ પકડાતા વરિષ્ઠ નાગરિકોએ પણ રાહતનો શ્વાસ લીધો છે. હાલ પોલીસ આ આરોપીઓના રિમાન્ડ મેળવી તેમની મોડસ ઓપરેન્ડી અને ભૂતકાળમાં આચરેલા અન્ય ગુનાઓ અંગે વધુ તપાસ ચલાવી રહી છે.
