Mallikarjun Kharge Letter to PM Modi: દેશમાં પરિસીમન (Delimitation)ને લઈને રાજકીય ચર્ચા વચ્ચે કોંગ્રેસ અધ્યક્ષ અને રાજ્યસભામાં વિપક્ષના નેતા મલ્લિકાર્જુન ખડગેએ વડાપ્રધાન નરેન્દ્ર મોદીને પત્ર લખીને મહત્વપૂર્ણ માંગણી કરી છે. ખડગેએ સરકારને અપીલ કરી છે કે 131મા બંધારણીય સુધારા વિધેયક (પરિસીમન સંબંધિત બિલ)ને ફરીથી સંસદમાં રજૂ કરવામાં આવે તે પહેલાં તમામ રાજકીય પક્ષો સાથે સર્વપક્ષીય બેઠક બોલાવવામાં આવે. કોંગ્રેસનું કહેવું છે કે, આ પ્રકારનો મહત્વનો બંધારણીય મુદ્દો માત્ર સંસદમાં રજૂ કરવાથી પૂરતો નથી, પરંતુ તેના પર તમામ પક્ષો વચ્ચે વ્યાપક ચર્ચા થવી જોઈએ. ખડગેએ પોતાના પત્રની માહિતી સોશિયલ મીડિયા પર પણ શેર કરી છે અને સરકારને પારદર્શક પ્રક્રિયા અપનાવવાની અપીલ કરી છે.
PM મોદીને લખ્યો પત્ર, સર્વપક્ષીય બેઠકની માંગ
મલ્લિકાર્જુન ખડગેએ વડાપ્રધાનને લખેલા પત્રમાં જણાવ્યું છે કે, સરકાર પરિસીમન સહિતના પોતાના સુધારેલા પ્રસ્તાવોને લઈને સર્વપક્ષીય બેઠક બોલાવે. તેમણે જણાવ્યું કે, સંસદમાં બિલ રજૂ થાય તે પહેલાં તમામ રાજકીય પક્ષોને પ્રસ્તાવનો અભ્યાસ કરવા માટે પૂરતો સમય મળવો જોઈએ. ખડગેના જણાવ્યા મુજબ, આ મુદ્દે ચર્ચા અને સહમતિ દ્વારા આગળ વધવું લોકશાહી પ્રક્રિયાને વધુ મજબૂત બનાવશે.
પહેલાં પણ સરકારને કરી હતી રજૂઆત
ખડગેએ જણાવ્યું કે, માર્ચ અને એપ્રિલ દરમિયાન તેમણે સંસદીય કાર્ય મંત્રીને પણ પત્ર લખીને પરિસીમન સંબંધિત પ્રસ્તાવો પર ચર્ચા કરવા સર્વપક્ષીય બેઠક બોલાવવાની માંગ કરી હતી. તેમણે દાવો કર્યો કે, તે સમયે સરકાર તરફથી તેમની રજૂઆતને સ્વીકારવામાં આવી નહોતી.
આ પણ વાંચો: 'ભવિષ્યના યુદ્ધમાં રસ્તા પણ બનશે હથિયાર' : BROને લઈને રાજનાથ સિંહનું મોટું નિવેદન
131મું બંધારણીય સુધારા બિલ શું છે?
કોંગ્રેસના જણાવ્યા મુજબ, 17 એપ્રિલ 2026ના રોજ લોકસભામાં રજૂ કરાયેલું બંધારણ (131મું સુધારા) વિધેયક, 2026 જરૂરી બે-તૃતિયાંશ બહુમતી મેળવી શક્યું નહોતું અને તે પસાર થઈ શક્યું નહોતું. હવે મીડિયા અહેવાલોના આધારે એવી ચર્ચા ચાલી રહી છે કે કેન્દ્ર સરકાર મોન્સૂન સત્ર દરમિયાન સુધારેલા સ્વરૂપમાં આ બિલ ફરીથી રજૂ કરવાની તૈયારીમાં છે.
મોન્સૂન સત્ર પહેલાં ચર્ચા જરૂરી: ખડગે
પત્રમાં ખડગેએ ભારપૂર્વક જણાવ્યું છે કે, જો સરકાર સુધારેલા પ્રસ્તાવ સાથે બિલ ફરીથી લાવવા ઈચ્છે છે, તો પહેલા સર્વપક્ષીય બેઠક યોજીને તમામ પક્ષોના સૂચનો અને અભિપ્રાય સાંભળવા જોઈએ. તેમણે વધુમાં કહ્યું કે, સંસદમાં બિલ રજૂ થાય તે પહેલાં તમામ રાજકીય પક્ષોને તેની વિગતોનો અભ્યાસ કરવા માટે પૂરતો સમય આપવો જોઈએ.
રાજકીય મહત્વ શું છે?
પરિસીમન સંબંધિત કોઈપણ નિર્ણય દેશના ચૂંટણી ક્ષેત્રોની રચના અને લોકસભા તેમજ વિધાનસભાની બેઠકોના વિતરણ સાથે જોડાયેલો હોવાથી તે અત્યંત મહત્વનો માનવામાં આવે છે. તેથી આ મુદ્દે રાજકીય પક્ષો વચ્ચે વ્યાપક ચર્ચા અને સહમતિની માંગ સતત ઉઠતી રહી છે. હવે સરકાર મોન્સૂન સત્ર દરમિયાન આ મુદ્દે શું વલણ અપનાવે છે અને સર્વપક્ષીય બેઠક બોલાવે છે કે નહીં, તેના પર તમામ રાજકીય પક્ષોની નજર રહેશે.
