થાર ચાલક મહિલાએ વર્તાવ્યો કહેર, ઘરકામ કરતી મહિલાને કચડી : હોસ્પિટલ લઈ ગઈ, મોત થઈ તો મતૃદેહ પાછો ઘટનાસ્થળ પર રાખ્યો

Gurugram News: હરિયાણાના ગુરુગ્રામમાંથી માનવતાને ઝંઝોળી નાખે તેવી ઘટના સામે આવી છે. જેણે માત્ર સ્થાનિક લોકોને જ નહીં પરંતુ સમગ્ર દેશમાં ચર્ચા જગાવી છે. એક રહેણાંક સોસાયટીની પાર્કિંગમાં આરામ કરી રહેલી ઘરકામ કરતી મહિલાને કથિત રીતે થાર કારથી કચડી દેવામાં આવી હતી. અકસ્માત બાદ કાર ચલાવનાર મહિલા ઇજાગ્રસ્તને હોસ્પિટલ લઈ ગઈ હોવાનો દાવો કરવામાં આવ્યો છે, પરંતુ ત્યાં ડૉક્ટરોએ મહિલાને મૃત જાહેર કર્યા બાદ મૃતદેહને ફરી ઘટનાસ્થળે લાવી મૂકવામાં આવ્યો હોવાના ગંભીર આક્ષેપો સામે આવ્યા છે. સમગ્ર ઘટનાએ અનેક સવાલો ઊભા કર્યા છે અને હવે પોલીસ તમામ પાસાઓની વિગતવાર તપાસ કરી રહી છે.

ઘટના સામે આવ્યા બાદ સોસાયટીના રહેવાસીઓમાં ભારે રોષ જોવા મળ્યો હતો. મૃતકના પરિવારજનોએ આરોપ લગાવ્યો છે કે જો અકસ્માત બાદ તરત જ યોગ્ય કાર્યવાહી કરવામાં આવી હોત અને પોલીસને સમયસર જાણ કરવામાં આવી હોત, તો સમગ્ર ઘટનાનો ક્રમ અલગ હોઈ શક્યો હોત. હાલ પોલીસ CCTV ફૂટેજ, હોસ્પિટલના રેકોર્ડ અને તમામ સંબંધિત લોકોના નિવેદનોના આધારે સમગ્ર ઘટનાક્રમની તપાસ કરી રહી છે.

પાર્કિંગમાં સૂતી હતી ઘરકામ કરતી મહિલા

પોલીસના જણાવ્યા અનુસાર, આ ઘટના ગુરુગ્રામના સેક્ટર-67 સ્થિત અંસલ વર્સાલિયા સોસાયટીમાં બની હતી. મૃતકની ઓળખ 57 વર્ષીય ગુડ્ડી તરીકે થઈ છે, જે મૂળ ઉત્તર પ્રદેશના મહોબા જિલ્લાની રહેવાસી હતી. તે છેલ્લા ઘણા સમયથી ગુરુગ્રામમાં વિવિધ ફ્લેટોમાં ઘરકામ કરીને પોતાનું જીવન નિર્વાહ કરતી હતી. પ્રાથમિક તપાસ મુજબ, ઘટનાના દિવસે ગુડ્ડીએ સોસાયટીના એક ફ્લેટમાં પોતાનું કામ પૂર્ણ કર્યું હતું. ભારે થાકને કારણે તે ગ્રાઉન્ડ ફ્લોર પર આવેલી કાર પાર્કિંગમાં જ આરામ કરવા માટે સૂઈ ગઈ હતી. તે દરમિયાન એ જ બિલ્ડિંગમાં રહેતી એક મહિલા પોતાની મહિન્દ્રા થાર કારને રિવર્સ કરી રહી હતી. આ દરમિયાન પાર્કિંગમાં સૂઈ રહેલી ગુડ્ડી પર ડ્રાઇવરની નજર ન પડતાં કાર સીધી તેના પર ચડી ગઈ હતી. અકસ્માત એટલો ગંભીર હતો કે મહિલાને ગંભીર ઇજાઓ પહોંચી હતી.

અકસ્માત બાદ હોસ્પિટલ લઈ જવામાં આવી, પરંતુ બચાવી શકાય નહીં

અકસ્માત થતાં જ કાર ચલાવનાર મહિલા વાહનમાંથી નીચે ઉતરી હતી અને આસપાસના લોકોની મદદથી ઇજાગ્રસ્ત ગુડ્ડીને અન્ય વાહનમાં ખાનગી હોસ્પિટલ લઈ ગઈ હતી. હોસ્પિટલમાં ડૉક્ટરોએ તાત્કાલિક તપાસ હાથ ધરી હતી, પરંતુ ગંભીર ઇજાઓને કારણે મહિલાને મૃત જાહેર કરવામાં આવી હતી. અહીંથી સમગ્ર ઘટનાએ નવો વળાંક લીધો હતો. મૃતકના પરિવારજનોનો આરોપ છે કે હોસ્પિટલમાં મહિલાના મોતની પુષ્ટિ થયા બાદ આરોપી મહિલા મૃતદેહને ફરી સોસાયટીમાં લઈને આવી અને અકસ્માત જ્યાં બન્યો હતો ત્યાં જ મૂકી ગઈ. પરિવારનું કહેવું છે કે આ સમગ્ર ઘટના વિશે કોઈને સમયસર જાણ કરવામાં આવી નહોતી, જેના કારણે શંકા વધુ ગાઢ બની છે.

પરિવારના આક્ષેપોથી સોસાયટીમાં તંગદિલી

મૃતકના ભત્રીજાએ મીડિયા સાથે વાત કરતાં ગંભીર આરોપ લગાવ્યો હતો કે મૃતદેહને ફરી પાર્કિંગમાં મૂકીને સમગ્ર ઘટનાને અલગ રીતે રજૂ કરવાનો પ્રયાસ કરવામાં આવ્યો હતો. પરિવારજનોએ દાવો કર્યો કે તેમને ઘટનાની જાણ પણ મોડેથી થઈ હતી. ઘટનાની માહિતી ફેલાતા સોસાયટીના રહેવાસીઓ મોટી સંખ્યામાં એકત્ર થયા હતા. અનેક લોકોએ કાર ચલાવનાર મહિલાના નિવાસસ્થાન બહાર વિરોધ વ્યક્ત કર્યો હતો અને સમગ્ર ઘટનાની નિષ્પક્ષ તપાસ કરવાની માંગ ઉઠાવી હતી. થોડા સમય માટે સોસાયટીમાં તંગદિલીનો માહોલ પણ સર્જાયો હતો.

આ પણ વાંચો: કાર કંપનીને બેદરકારી પડી ભારે : નવી કાર નહીં આપે તો રૂ. 20.50 લાખ ચૂકવવા પડશે

CCTV ફૂટેજ બનશે સૌથી મોટો પુરાવો

માહિતી મળતા જ સેક્ટર-65 પોલીસ સ્ટેશનની ટીમ ઘટનાસ્થળે પહોંચી હતી. પોલીસે મૃતદેહને પોતાના કબજામાં લઈને પોસ્ટમોર્ટમ માટે મોકલી આપ્યો હતો. હાલમાં સમગ્ર ઘટનાની તપાસ ઝડપથી ચાલી રહી છે. પોલીસના વરિષ્ઠ અધિકારીઓએ જણાવ્યું છે કે, સોસાયટીમાં લગાવવામાં આવેલા CCTV કેમેરાની ફૂટેજની બારીકાઈથી તપાસ કરવામાં આવી રહી છે. અકસ્માત કેવી રીતે થયો, ત્યારબાદ મહિલાને કયા સમયે હોસ્પિટલ લઈ જવાઈ, હોસ્પિટલમાં શું કાર્યવાહી થઈ અને મૃતદેહને પરત લાવવામાં આવ્યો હતો કે નહીં, તે તમામ મુદ્દાઓ CCTV અને અન્ય ડિજિટલ પુરાવાઓના આધારે ચકાસવામાં આવશે.

હોસ્પિટલના દાવાથી વધ્યું રહસ્ય

આ સમગ્ર કેસમાં એક વધુ ચોંકાવનારી બાબત સામે આવી છે. મીડિયા અહેવાલો અનુસાર, જે ખાનગી હોસ્પિટલમાં મહિલાને લઈ જવામાં આવી હોવાનો દાવો કરવામાં આવ્યો છે, ત્યાંના અધિકારીઓએ એવો કોઈ કેસ તેમની હોસ્પિટલમાં આવ્યો હોવાનો ઇનકાર કર્યો છે. હોસ્પિટલના આ નિવેદન બાદ સમગ્ર મામલો વધુ ગૂંચવણભર્યો બની ગયો છે. હવે પોલીસ હોસ્પિટલના રેકોર્ડ, CCTV અને અન્ય દસ્તાવેજોની પણ તપાસ કરી રહી છે જેથી સત્ય બહાર આવી શકે.

FIR હજુ નોંધાઈ નથી, વળતરને લઈને સમજૂતીની ચર્ચા

માહિતી અનુસાર, આ મામલે હજુ સુધી સત્તાવાર રીતે FIR નોંધાઈ નથી. કેટલાક અહેવાલોમાં એવો પણ દાવો કરવામાં આવ્યો છે કે, મૃતકના પરિવાર અને સંબંધિત પક્ષ વચ્ચે વળતર અંગે સમજૂતી થઈ છે અને પરિવારજનોએ માલિક વિરુદ્ધ કડક કાર્યવાહી ન કરવાની સંમતિ દર્શાવી છે. જોકે, પોલીસ તરફથી હજુ સુધી આ અંગે કોઈ સત્તાવાર પુષ્ટિ કરવામાં આવી નથી. અધિકારીઓનું કહેવું છે કે, તપાસ પૂર્ણ થયા બાદ જે તથ્યો સામે આવશે તેના આધારે કાયદાકીય કાર્યવાહી કરવામાં આવશે.

તપાસ બાદ જ સમગ્ર હકીકત સામે આવશે

હાલ સમગ્ર મામલો પોલીસ તપાસ હેઠળ છે. હોસ્પિટલના દાવા, પરિવારના આક્ષેપો અને CCTV ફૂટેજ સહિતના તમામ પાસાઓની તપાસ બાદ જ ઘટનાની સંપૂર્ણ હકીકત સામે આવશે. પોલીસે જણાવ્યું છે કે તપાસના આધારે જરૂરી કાનૂની કાર્યવાહી કરવામાં આવશે.