સોશિયલ મીડિયા અને ઈન્ટરનેટ પર છેલ્લા કેટલાક દિવસોથી ચર્ચામાં રહેલી “કોકરોચ જનતા પાર્ટી” હવે કાયદેસર રીતે ટ્રેડમાર્ક બની ગઈ છે. આ ટ્રેન્ડિંગ નામનો ટ્રેડમાર્ક સુરેન્દ્રનગરના એક યુવકે પોતાના નામે નોંધાવી લીધો હોવાનું સામે આવ્યું છે. સમગ્ર મામલો હાલ સોશિયલ મીડિયા પર ભારે ચર્ચાનો વિષય બન્યો છે. સુરેન્દ્રનગરના અઝીમ જામ નામના યુવકે ઓનલાઈન પ્રક્રિયા દ્વારા “કોકરોચ જનતા પાર્ટી” નામ માટે ટ્રેડમાર્ક વિભાગમાં અરજી કરી હતી. અરજી પ્રક્રિયા પૂર્ણ થયા બાદ સંબંધિત વિભાગ દ્વારા તેને આ નામનો ટ્રેડમાર્કની મંજૂરી આપવામાં આવી છે.
તાજેતરમાં “કોકરોચ જનતા પાર્ટી”નામ સોશિયલ મીડિયા પ્લેટફોર્મ પર ઝડપથી વાયરલ થયું હતું. મીમ્સ, વીડિયો અને વિવિધ પ્રકારના કન્ટેન્ટના કારણે આ નામ યુવાનોમાં ખાસ ચર્ચામાં આવ્યું હતું. આવી સ્થિતિમાં, નામની વધતી લોકપ્રિયતા જોતા સુરેન્દ્રનગરના યુવકે સમયસર કાયદેસર હક મેળવવા માટે ટ્રેડમાર્ક નોંધણી કરાવી હોવાનું કહેવાઈ રહ્યું છે.
સોશિયલ મીડિયા ટ્રેન્ડથી ટ્રેડમાર્ક સુધીની સફર
ડિજિટલ યુગમાં કોઈ પણ શબ્દ, સ્લોગન અથવા નામ સોશિયલ મીડિયા દ્વારા થોડા સમયમાં જ લોકપ્રિય બની જાય છે. “કોકરોચ જનતા પાર્ટી” સાથે પણ એવું જ બન્યું. શરૂઆતમાં મજાક અને મીમ્સના રૂપમાં વપરાતું આ નામ હવે સત્તાવાર રીતે ટ્રેડમાર્ક નોંધણી સુધી પહોંચી ગયું છે.
ટ્રેડમાર્ક મળ્યા બાદ હવે આ નામનો વ્યાવસાયિક અથવા બ્રાન્ડિંગ હેતુસર ઉપયોગ કરવા માટે કાયદેસર અધિકાર સંબંધિત વ્યક્તિ પાસે રહેશે. નિષ્ણાતોના જણાવ્યા મુજબ, ટ્રેડમાર્ક નોંધણીથી કોઈ પણ નામ અથવા બ્રાન્ડનો અનધિકૃત ઉપયોગ રોકી શકાય છે અને તેની કાનૂની સુરક્ષા પણ મળે છે.
આ પણ વાંચો: ભાજપ બાદ 'કોકરોચ જનતા પાર્ટી' એ કોંગ્રેસને પણ પછાડી : હવે ટ્રેડમાર્ક મેળવવા માટે લાગી અરજીઓની લાઈન!
યુવાનોમાં ઉદ્યોગસાહસિકતા તરફ વધતો ઝોક
આ ઘટનાએ પણ દર્શાવે છે કે હવે નાના શહેરોના યુવાનો પણ ડિજિટલ ટ્રેન્ડ અને બ્રાન્ડિંગની તકને ઝડપી રીતે ઓળખી રહ્યા છે. સોશિયલ મીડિયા પર વાયરલ થતા શબ્દો કે નામોને બ્રાન્ડમાં પરિવર્તિત કરવાની દિશામાં યુવાનો નવી વિચારસરણી સાથે આગળ વધી રહ્યા છે.
સુરેન્દ્રનગરના યુવક દ્વારા લેવામાં આવેલ આ પગલું હાલ સ્થાનિક સ્તરે જ નહીં પરંતુ સોશિયલ મીડિયા પર પણ ચર્ચાનો વિષય બન્યું છે. ઘણા લોકો આને સ્માર્ટ મૂવ ગણાવી રહ્યા છે, જ્યારે કેટલાક લોકો માટે આ આખી ઘટના આશ્ચર્યજનક બની છે.
