બ્રિટિશ વડા પ્રધાન કીર સ્ટારમર હાલ ભારતની સત્તાવાર મુલાકાતે છે. આ મુલાકાત દરમિયાન તેમણે ભારતના વડા પ્રધાન નરેન્દ્ર મોદી સાથે મુલાકાત કરી અને બંને નેતાઓએ ઉષ્માભર્યા વાર્તાલાપ કર્યા.
પીએમ મોદીએ સોશિયલ મીડિયા પર બ્રિટિશ વડા પ્રધાન સાથેનો એક ફોટો શેર કર્યો, જેમાં બંને નેતાઓ એક જ કારમાં મુસાફરી કરતા દેખાય છે. ફોટા સાથે પીએમ મોદીએ લખ્યું. “ભારત-યુકે મિત્રતા ઝડપથી વધી રહી છે અને અપાર જુસ્સાથી ભરેલી છે! આજે સવારનો ફોટો, જ્યારે મારા મિત્ર વડા પ્રધાન સ્ટારમર અને મેં ગ્લોબલ ફિનટેક ફેસ્ટમાં હાજરી આપવા માટે અમારી યાત્રા શરૂ કરી હતી.”
ગ્લોબલ ફિનટેક ફેસ્ટ પહેલા લેવાયો ફોટો
પીએમ મોદી અને સ્ટારમરનો આ ફોટો મુંબઈમાં યોજાનાર ગ્લોબલ ફિનટેક 2025 કાર્યક્રમમાં હાજરી આપતા પહેલા લેવામાં આવ્યો હતો. જુલાઈ 2024માં પદ સંભાળ્યા બાદ સ્ટારમરની આ ભારતની પ્રથમ સત્તાવાર મુલાકાત છે.
સ્ટારમરનો ભાર: “વેપાર કરાર વહેલી તકે અમલમાં મૂકવો જોઈએ”
બ્રિટિશ વડાપ્રધાન સ્ટારમર બુધવારે મુંબઈ પહોંચ્યા હતા. તેમણે ભારતમાં યુકેના વેપાર મિશનનું નેતૃત્વ કર્યું, જેમાં 100થી વધુ વ્યવસાયિક, શૈક્ષણિક અને સાંસ્કૃતિક પ્રતિનિધિમંડળો સામેલ હતા. સ્ટારમરે તાજેતરમાં હસ્તાક્ષર કરાયેલા ભારત-યુકે વેપાર કરારના વહેલા અમલીકરણની જરૂરિયાત પર ભાર મૂક્યો અને કહ્યું કે તેને શક્ય તેટલી વહેલી તકે અમલમાં મૂકવો જોઈએ.
ભારત-યુકે મુક્ત વેપાર કરારનું મહત્વ
ગ્લોબલ ફિનટેક ફેસ્ટમાં બોલતાં સ્ટારમરે ભારત-યુકે મુક્ત વેપાર કરારને “ભારતનો અત્યાર સુધીનો સૌથી મહત્વાકાંક્ષી વેપાર કરાર” ગણાવ્યો. આ કરાર માટેની વાટાઘાટો જાન્યુઆરી 2022માં શરૂ થઈ હતી, અને જુલાઈ 2025માં બંને દેશોએ વ્યાપક આર્થિક અને વેપાર કરાર (CETA) પર હસ્તાક્ષર કર્યા હતા.
તે ઉપરાંત, બંને દેશોએ એક સીમાચિહ્નરૂપ સંરક્ષણ કરારની જાહેરાત પણ કરી, જેના અંતર્ગત યુકે ભારતને ઉત્તર આયર્લેન્ડમાં બનાવાયેલી આશરે $468 મિલિયન મૂલ્યની હળવા વજનની મલ્ટી-રોલ મિસાઇલો આપશે. આ કરાર બંને દેશો વચ્ચેના સુરક્ષા અને સંરક્ષણ સહયોગને વધુ મજબૂત બનાવશે.
“ભારત એક ઉભરતું આર્થિક પાવરહાઉસ છે” કીર સ્ટારમર
બ્રિટિશ વડા પ્રધાન કીર સ્ટારમરે જણાવ્યું કે “ભારત એક ઉભરતું આર્થિક પાવરહાઉસ છે.” તેમણે ઉમેર્યું કે વિશ્વનું સૌથી મોટું લોકશાહી દેશ 2028 સુધીમાં વિશ્વની ત્રીજી સૌથી મોટી અર્થવ્યવસ્થા બનવાના માર્ગ પર છે.
સ્ટારમરે વધુમાં કહ્યું, “યુનાઇટેડ કિંગડમ આ યાત્રામાં ભાગીદાર બનવા માટે સંપૂર્ણપણે તૈયાર છે.”
રશિયા-યુક્રેન સંઘર્ષ પર ચર્ચા
બંને નેતાઓએ રશિયા-યુક્રેન સંઘર્ષ પર ચર્ચા કરી. સ્ટારમરે કહ્યું, “અમે આ મુદ્દે વિગતવાર ચર્ચા કરી અને બંને દેશો જે પરિણામ ઈચ્છે છે, તે હાંસલ કરવા માટેના પગલાં અંગે વિચાર કર્યો.”
તેમણે ઉમેર્યું, “વડાપ્રધાન મોદી અને મેં આ સંઘર્ષને સમાપ્ત કરવા માટે લઈ શકાય તેવા પગલાં અને ઊર્જા ક્ષેત્રમાં ચાલી રહેલા પ્રયાસો વિશે ચર્ચા કરી.”
