8 ઓક્ટોમ્બર, 2025ના રોજ ભારતીય વાયુસેના (IAF)એ તેની 93મી વર્ષગાંઠ ગાજિયાબાદના હિંડન એયરબેસ ખાતે ભવ્ય પરેડ અને અનોખા ડિનર મેનૂ સાથે ઉજવી. આ વખતે વાયુસેના દિવસનો ડિનર મેનૂ સોશિયલ મીડિયા પર છવાઈ ગયો, જેનું કારણ સ્વાદિષ્ટ વાનગીઓ નહીં, પરંતુ તેના નામો હતા.
પાકિસ્તાની સ્થળોના નામો
મેનૂમાં રાવલપિંડી ચિકન, રફિકી રારા મટન, ભોલારી પનીર મેથી મલાઈ, સુક્કુર શામ સવેરા કોફ્તા, સરગોધા દાલ મખની, જકોબાબાદ મેવા પુલાવ, બહાવલપુર નાન અને મીઠાઈમાં બાલાકોટ તિરામિસુ, મુઝફ્ફરાબાદ કુલ્ફી ફાલુદા તથા મુરીદકે મીઠા પાનનો સમાવેશ થયો હતો. આ નામો ભારતની આતંકવાદ વિરુદ્ધની કડક કાર્યવાહી, ખાસ કરીને 2019ની બાલાકોટ એયરસ્ટ્રાઈક અને 2025ના ઓપરેશન સિંદુરની યાદ અપાવે છે.
ઓપરેશન સિંદુર અને બાલાકોટની યાદો
2025ના ઓપરેશન સિંદુરમાં ભારતીય વાયુસેનાએ પાકિસ્તાન અધિકૃત કશ્મીરના મુરીદકે અને બહાવલપુરમાં લશ્કર-એ-તૈયબા તથા જૈશ-એ-મોહમ્મદના ગઢને નિશાન બનાવ્યા હતા. તેવી જ રીતે, 2019ની બાલાકોટ એયરસ્ટ્રાઈકમાં પુલવામા હુમલાના જવાબમાં ખૈબર પખ્તૂનખ્વામાં જૈશ-એ-મોહમ્મદના તાલીમ શિબિરોને નષ્ટ કરવામાં આવ્યા હતા. આ મેનૂના નામો આ બહાદુરીભર્યા ઓપરેશનોનું પ્રતીક હતા, જેણે લોકોને હસવા સાથે ગૌરવની લાગણી પણ અપાવી.
હિંડન એયરબેસ પર શક્તિપ્રદર્શન
વાયુસેના દિવસની પરેડમાં રાફેલ, સુખોઈ-30 MKI, મિગ-29, C-17 ગ્લોબમાસ્ટર III, C-130J હર્ક્યુલસ અને અપાચે હેલિકોપ્ટરે આકાશમાં શાનદાર પ્રદર્શન કરી દર્શકોને રોમાંચિત કર્યા. આ ઉજવણીએ ભારતીય વાયુસેનાની તાકાત, શૌર્ય અને અદમ્ય નિશ્ચયને દર્શાવ્યો, જે દેશની સુરક્ષા માટે સતત સમર્પિત છે.
