પાકિસ્તાનમાં અફઘાન સરહદ નજીક પાકિસ્તાની સેના પર થયેલા હુમલામાં 11 અર્ધલશ્કરી સૈનિકો અને બે અધિકારીઓ માર્યા ગયા છે. બુધવારે થયેલા હુમલાની જવાબદારી પાકિસ્તાની તાલિબાને લીધી હતી.
એવું કહેવામાં આવી રહ્યું છે કે આતંકવાદીઓએ જ્યાંથી સેનાનો કાફલો પસાર થવાનો હતો તે રસ્તાની બાજુમાં બોમ્બ પ્લાન્ટ કર્યા હતા. જ્યારે કાફલો ત્યાંથી પસાર થયો ત્યારે આતંકવાદીઓએ પહેલા સેના પર ગોળીબાર કર્યો.
TTP શું છે?
પાકિસ્તાની તાલિબાન, જેને તહરીક-એ-તાલિબાન પાકિસ્તાન (TTP) તરીકે પણ ઓળખવામાં આવે છે, તે પાકિસ્તાની સરકારનો વિરોધ કરે છે અને તેને ઉથલાવી પાડવા માંગે છે. તાજેતરના મહિનાઓમાં, TTP એ પાકિસ્તાની સુરક્ષા દળો પર હુમલાઓ તીવ્ર બનાવ્યા છે.
અફઘાનિસ્તાનથી લે છે તાલીમ
પાકિસ્તાની સેના અને TTP વચ્ચેનો મતભેદ કંઈ નવો નથી. બંને વચ્ચે ઘણા વર્ષોથી સંઘર્ષ ચાલી રહ્યો છે. પાકિસ્તાની સરકારે આરોપ લગાવ્યો છે કે તાલિબાન આતંકવાદીઓ અફઘાનિસ્તાનમાં સરહદ પાર તાલીમ મેળવી રહ્યા છે અને પછી પાકિસ્તાનમાં પ્રવેશ કરીને સેના સામે હુમલા કરી રહ્યા છે. કાબુલે પાકિસ્તાની સરકારના આરોપોને ખોટા ગણાવ્યા છે.
રિપોર્ટ શું કહે છે?
ઇસ્લામાબાદ સ્થિત સેન્ટર ફોર રિસર્ચ એન્ડ સિક્યુરિટી સ્ટડીઝ (CRSS) એ તાજેતરમાં એક અહેવાલ બહાર પાડ્યો છે જેમાં છેલ્લા ત્રણ મહિનામાં પાકિસ્તાનમાં આતંકવાદી હુમલાઓ અને લશ્કરી કાર્યવાહીથી થયેલા નુકસાનની વિગતો આપવામાં આવી છે. અહેવાલમાં જણાવાયું છે કે છેલ્લા ત્રણ મહિનામાં આશરે 900 લોકો માર્યા ગયા છે, જ્યારે 600 થી વધુ ઘાયલ થયા છે. તેમાં એમ પણ કહેવામાં આવ્યું છે કે આતંકવાદી હુમલાઓ અને લશ્કરી કાર્યવાહી સહિત આશરે 329 હિંસક ઘટનાઓ બની છે. પાછલા ત્રિમાસિક ગાળાની તુલનામાં, હિંસામાં 46 ટકાથી વધુનો વધારો થયો છે.
