Heavy rain warning : દેશના વિવિધ ભાગોમાં ગરમીનો પ્રકોપ યથાવત્ હોવા છતાં દક્ષિણ-પશ્ચિમ ચોમાસું હવે ઝડપથી આગળ વધી રહ્યું છે. ભારતીય હવામાન વિભાગ (IMD) અનુસાર આગામી 48થી 72 કલાક દરમિયાન પશ્ચિમ, દક્ષિણ, પૂર્વ અને ઉત્તરપૂર્વ ભારતના અનેક વિસ્તારોમાં ગાજવીજ, તેજ પવન અને ભારે વરસાદની સંભાવના છે. કેટલાક વિસ્તારોમાં કરા પડવાની શક્યતા પણ વ્યક્ત કરવામાં આવી છે. ચોમાસું તાજેતરમાં મહારાષ્ટ્ર, કર્ણાટક, આંધ્ર પ્રદેશ, તેલંગાણા અને પૂર્વીય વિસ્તારો તરફ આગળ વધ્યું છે અને આગામી દિવસોમાં તેનો વ્યાપ વધુ વધવાની શક્યતા છે.
આ રાજ્યોમાં ભારે વરસાદ અને તોફાની પવનની શક્યતા
IMDના તાજા અનુમાન મુજબ કોંકણ-ગોવા, દરિયાકાંઠાના કર્ણાટક, મહારાષ્ટ્ર, તેલંગાણા, છત્તીસગઢ, ઓડિશા, પશ્ચિમ બંગાળ, સિક્કિમ અને ઉત્તરપૂર્વ ભારતના રાજ્યોમાં આગામી બે-ત્રણ દિવસ દરમિયાન ગાજવીજ સાથે વરસાદ પડી શકે છે. કેટલીક જગ્યાએ 40થી 60 કિમી પ્રતિ કલાકની ઝડપે પવન ફૂંકાવાની શક્યતા છે, જ્યારે સ્થાનિક સ્તરે ભારે વરસાદ અને કરા પડવાની સ્થિતિ પણ સર્જાઈ શકે છે. ખાસ કરીને કેરળ, કર્ણાટક અને ગોવા વિસ્તારમાં ચોમાસું સક્રિય બનતા ભારેથી અતિભારે વરસાદની ચેતવણી આપવામાં આવી છે. અનેક જિલ્લાઓમાં પાણી ભરાવા, વાહનવ્યવહાર પર અસર અને નીચાણવાળા વિસ્તારોમાં મુશ્કેલીઓ ઊભી થવાની શક્યતા છે.
લક્ષદ્વીપમાં મળશે હવે દારૂ!: પ્રવાસન વધારવા માટે સરકારનો માસ્ટરસ્ટ્રોક, વસૂલાશે 400% સુધી ટેક્સ
ઉત્તરપૂર્વ ભારત માટે એલર્ટ
આસામ, મેઘાલય, અરુણાચલ પ્રદેશ, નાગાલેન્ડ, મણિપુર, મિઝોરમ અને ત્રિપુરામાં આગામી 2થી 3 દિવસ દરમિયાન ભારે વરસાદની આગાહી કરવામાં આવી છે. સતત વરસાદને કારણે નદીઓના જળસ્તરમાં વધારો, પાણી ભરાવા અને પહાડી વિસ્તારોમાં ભૂસ્ખલનનું જોખમ વધી શકે છે. સ્થાનિક પ્રશાસન અને આપત્તિ વ્યવસ્થાપન તંત્રને સાવચેત રહેવા સૂચના આપવામાં આવી છે.
દિલ્હી-એનસીઆરમાં હજુ ગરમીથી સંપૂર્ણ રાહત નહીં
રાજધાની દિલ્હી અને એનસીઆર વિસ્તારમાં હજુ ચોમાસાની સીધી એન્ટ્રી થવાની શક્યતા ઓછી છે. જોકે પશ્ચિમી વિક્ષેપ અને સ્થાનિક હવામાન પ્રણાલીઓના પ્રભાવથી આગામી દિવસોમાં આંશિક વાદળછાયું વાતાવરણ રહી શકે છે. કેટલાક વિસ્તારોમાં હળવો વરસાદ અથવા ઝાપટાં પડી શકે છે, પરંતુ ગરમી અને ભેજમાંથી સંપૂર્ણ રાહત મળવાની શક્યતા તાત્કાલિક દેખાતી નથી. દિલ્હી સહિત ઉત્તર ભારતમાં હજુ પણ અનેક વિસ્તારોમાં તાપમાન 40 ડિગ્રી સેલ્સિયસથી ઉપર નોંધાઈ રહ્યું છે અને હીટવેવ જેવી પરિસ્થિતિ યથાવત્ છે.
મહારાષ્ટ્રનાં થાણેમાં આગનું તાંડવ: ટાયરના ગોડાઉનમાં આગ લાગતા ધુમાડાથી ઢંકાયું આકાશ
બિહાર અને પૂર્વી ભારત માટે રાહતના સંકેત
બંગાળની ખાડીમાંથી આવતા ભેજયુક્ત પવનોને કારણે બિહારના ઉત્તર અને પૂર્વીય જિલ્લાઓમાં વરસાદી પ્રવૃત્તિમાં વધારો થવાની શક્યતા છે. વરસાદ સાથે ગાજવીજ અને તેજ પવનની પણ આગાહી કરવામાં આવી છે. હવામાન નિષ્ણાતોના જણાવ્યા અનુસાર વરસાદના કારણે તાપમાનમાં 2થી 4 ડિગ્રી સેલ્સિયસ સુધીનો ઘટાડો થઈ શકે છે, જેનાથી લોકોને ગરમીમાંથી રાહત મળી શકે છે.
ચોમાસાની સ્થિતિ શું છે?
IMDના જણાવ્યા અનુસાર દક્ષિણ-પશ્ચિમ ચોમાસું 4 જૂને કેરળમાં પ્રવેશ્યું હતું અને હવે તે ઝડપથી દેશના વધુ વિસ્તારોમાં આગળ વધી રહ્યું છે. હાલ ચોમાસું ઉત્તરપૂર્વ ભારતના તમામ ભાગો અને સિક્કિમ સુધી પહોંચી ગયું છે અને આગામી ચારથી પાંચ દિવસમાં મહારાષ્ટ્ર, આંધ્ર પ્રદેશ, તેલંગાણા અને અન્ય વિસ્તારોમાં વધુ આગળ વધવાની સંભાવના છે.
