ગુજરાતમાં પેરામેડિકલનો ક્રેઝ ઘટ્યો? 56k બેઠકો સામે માત્ર 27k વિદ્યાર્થીઓનું રજીસ્ટ્રેશન
ગુજરાતમાં BSc નર્સિંગ અને ફિઝિયોથેરાપી સહિતના પેરામેડિકલ પ્રોગ્રામ્સમાં એડમિશન માટે આ વર્ષે ધારણા કરતાં ઘણો ઓછો ધસારો જોવા મળ્યો છે. રાજ્યની સરકારી અને સેલ્ફ-ફાઇનાન્સ સંસ્થાઓમાં ઉપલબ્ધ કુલ બેઠકોની સરખામણીએ ફોર્મ ભરનારા વિદ્યાર્થીઓની સંખ્યા ખૂબ જ ઓછી છે. સત્તાવાર માહિતી અનુસાર, રાજ્યમાં પેરામેડિકલની 56,000 થી વધુ બેઠકો ઉપલબ્ધ છે, જેની સામે પ્રથમ તબક્કામાં માત્ર 26,900 જેટલા ઉમેદવારોએ જ રજીસ્ટ્રેશન કરાવ્યું છે.
પ્રથમ રાઉન્ડમાં હજારો બેઠકો ખાલી રહેવાની આશંકા
એડમિશન કમિટીના સત્તાવાર પોર્ટલ પર 29 મે થી ઓનલાઈન પિન (PIN) ખરીદીને રજીસ્ટ્રેશન કરાવવાની પ્રક્રિયા શરૂ કરવામાં આવી હતી. આ રજીસ્ટ્રેશન વિન્ડો શુક્રવારે બંધ થઈ ગઈ છે, જેમાં કુલ 27,347 પિન ઇશ્યૂ થયા હતા અને તેમાંથી 24,442 અરજીઓનું વેરિફિકેશન પૂર્ણ થઈ ચૂક્યું છે. દસ્તાવેજોની ચકાસણી (Document Verification) માટેની છેલ્લી તારીખ 13 જૂન છે. જો કે, જે પ્રકારે ઓછું રજીસ્ટ્રેશન થયું છે તે જોતાં પ્રથમ રાઉન્ડના અંતે હજારો બેઠકો ખાલી રહે તેવી પૂરેપૂરી સંભાવના છે.
ગયા વર્ષની સરખામણીએ 10,000 ફોર્મ ઓછા ભરાયા
ગયા વર્ષના ટ્રેન્ડ પર નજર કરીએ તો, ગત વર્ષે પ્રથમ તબક્કામાં જ 30,000 થી વધુ વિદ્યાર્થીઓએ રજીસ્ટ્રેશન કરાવ્યું હતું. બાદમાં જ્યારે પ્રક્રિયા ફરી શરૂ થઈ ત્યારે આ આંકડો વધીને 40,000 ની નજીક પહોંચી ગયો હતો. તેની સરખામણીમાં આ વર્ષે શરૂઆતના તબક્કામાં જ અંદાજે 10,000 જેટલા ઓછા ફોર્મ ભરાયા છે, જે એડમિશન સત્તાવાળાઓ માટે પણ ચિંતાનો વિષય છે.
પૂરક પરીક્ષા (Supplementary Exams) બાદ આશાનું કિરણ
રાજ્યમાં ધોરણ 12 સાયન્સની પૂરક પરીક્ષાઓ 11 જૂન થી 20 જૂન દરમિયાન યોજાઈ રહી છે. એડમિશન કમિટીના અધિકારીઓના જણાવ્યા અનુસાર, પૂરક પરીક્ષાનું પરિણામ જાહેર થયા બાદ પિન વિતરણ અને રજીસ્ટ્રેશનની પ્રક્રિયા ફરીથી ઓપન કરવામાં આવશે.
અધિકારીઓનો અંદાજ છે કે પૂરક પરીક્ષાના પરિણામ પછી વધુ 10,000 જેટલા વિદ્યાર્થીઓ એડમિશન માટે ઓનલાઈન ફોર્મ ભરી શકે છે, જેથી કુલ અરજદારોની સંખ્યા 37,000 થી 40,000 સુધી પહોંચી શકે છે. જો કે, આ વધારા પછી પણ રાજ્યની 1,165 પેરામેડિકલ કોલેજોમાં મોટા પ્રમાણમાં સીટો ખાલી રહે તેવું સ્પષ્ટ દેખાઈ રહ્યું છે.
