હાથમાં મહેંદી, આંખોમાં સપના, સપનાની ઉડાન બની અંતિમ સફર : હેલિકોપ્ટર દુર્ઘટનાએ છીનવી લીધો જીવનસાથી

અમેરિકાના જ્યોર્જિયા રાજ્યમાં એક હૃદયદ્રાવક ઘટના સામે આવી છે, જેમાં લગ્નના માત્ર થોડા કલાકો બાદ જ એક વરરાજાનું હેલિકોપ્ટર દુર્ઘટનામાં મોત નીપજ્યું છે. જ્યારે તેની નવવિવાહિતા પત્ની ગંભીર અકસ્માત છતાં જીવતી બચી ગઈ છે અને હાલ હોસ્પિટલમાં સારવાર હેઠળ છે.

મળતી માહિતી મુજબ, ગ્વિનેટ કાઉન્ટીના રહેવાસી ડેવ ફિજી (Dave Fiji) અને તેની પત્ની જેસ્ની (Jesni)ના લગ્ન શુક્રવારે ડોસનવિલે સ્થિત "ધ રિવિયર" (The Revere) નામના ભવ્ય વેડિંગ વેન્યૂમાં યોજાયા હતા. આ લગ્ન સમારોહમાં આશરે 400 જેટલા મહેમાનો હાજર રહ્યા હતા. ડેવના પિતા જ્યોર્જ ફિજીએ જણાવ્યું કે તેમના પુત્ર માટે આ દિવસ જીવનનો સૌથી ખુશીભર્યો દિવસ હતો. પરિવારજનો અને મિત્રો વચ્ચે ભવ્ય રીતે લગ્ન પૂર્ણ થયા બાદ દંપતીએ એક ખાસ આયોજન કર્યું હતું.

લગ્ન પછી હેલિકોપ્ટરમાં જવાની હતી યોજના

લગ્ન સમારોહ પૂર્ણ થયા બાદ ડેવ અને જેસ્ની રોબિન્સન R66 હેલિકોપ્ટરમાં સવાર થયા હતા. પરિવારના જણાવ્યા અનુસાર, બંનેએ ડેકાલ્બ-પીચટ્રી એરપોર્ટ સુધી હેલિકોપ્ટર દ્વારા પ્રવાસ કરીને ત્યારબાદ એટલાન્ટાની એક હોટલમાં રાત્રિ રોકાણ કરવાનું આયોજન કર્યું હતું. પરંતુ આ ખાસ ક્ષણ થોડા જ સમયમાં દુઃખદ ઘટનામાં ફેરવાઈ ગઈ. હેલિકોપ્ટર નિર્ધારિત સ્થળે પહોંચી શક્યું નહોતું અને ડોસનવિલે નજીકના જંગલ વિસ્તારમાં દુર્ઘટનાગ્રસ્ત થયું હતું.

6 કલાક સુધી કાટમાળમાં ફસાઈ રહી નવવધૂ

અકસ્માત બાદ બચાવ ટીમોને હેલિકોપ્ટર શોધવામાં લાંબો સમય લાગ્યો હતો. ઘટના સ્થળ ઘન જંગલ વિસ્તારમાં હોવાથી રેસ્ક્યૂ ઓપરેશન પડકારજનક બન્યું હતું. જ્યોર્જ ફિજીના જણાવ્યા અનુસાર, નવવધૂ જેસ્ની લગભગ છ કલાક સુધી હેલિકોપ્ટરના કાટમાળમાં ફસાઈ રહી હતી. જ્યારે બચાવકર્મીઓ ત્યાં પહોંચ્યા ત્યારે તે ગંભીર આઘાતની સ્થિતિમાં હતી. જેસ્નીએ પરિવારને જણાવ્યું કે જ્યારે તેને ભાન આવ્યું ત્યારે ડેવ તેનું માથું તેની છાતી પર રાખીને પડ્યો હતો. તેના શરીર પર લોહીના નિશાન હતા અને શરીર સંપૂર્ણપણે ઠંડું પડી ગયું હતું. જેસ્ની વ્યવસાયે નર્સ હોવાથી તેણે તરત જ સમજી લીધું હતું કે તેના પતિનું મૃત્યુ થઈ ચૂક્યું છે.

આ પણ વાંચો: અમેરિકાએ ઈરાન પર વરસાવ્યો કહેર : રડાર ઠેકાણા તબાહ; ભડકેલા તેહરાનનો મુંહતોડ જવાબ, કુવૈત ધ્રૂજ્યું!

વરરાજાનું બાળપણથી હતું પાયલોટ બનવાનું સ્વપ્ન

ડેવ ફિજી બાળપણથી જ વિમાન ઉડાડવાનું સ્વપ્ન જોતો હતો. તેના પિતા મુજબ, 10 વર્ષની ઉંમરથી જ તેને ઉડ્ડયન ક્ષેત્ર પ્રત્યે ખાસ રસ હતો. પછી તેણે આ ક્ષેત્રમાં કારકિર્દી બનાવી અને અમેરિકાની એન્ડેવર એર (Endeavor Air)માં ફર્સ્ટ ઓફિસર તરીકે સેવા આપી રહ્યો હતો. આ દુર્ઘટનાનો સૌથી કરુણ પાસો એ છે કે ડેવ પોતે એક પ્રશિક્ષિત પાયલોટ હતો અને તેણે હવામાન અંગે ચિંતા પણ વ્યક્ત કરી હતી.

ખરાબ હવામાન અંગે વ્યક્ત કરી હતી ચિંતા

ડેવના પિતા મુજબ, અકસ્માત પહેલાં વિસ્તારમાં ભારે વરસાદ અને નબળી દૃશ્યતા હતી. તેમણે જણાવ્યું કે ડેવે હેલિકોપ્ટરના પાયલોટને કહ્યું હતું કે "દૃશ્યતા લગભગ શૂન્ય છે અને આવી પરિસ્થિતિમાં અમે સામાન્ય રીતે ઉડાન ભરતા નથી." પરિવારના જણાવ્યા અનુસાર, જેસ્નીએ બાદમાં જણાવ્યું હતું કે પાયલોટે તેમને ખાતરી આપી હતી કે તેઓ વધુ ઊંચાઈ પર ઉડાન ભરશે અને સમસ્યા નહીં થાય. પરંતુ ઉડાન બાદ થોડા જ સમયમાં હેલિકોપ્ટર દુર્ઘટનાગ્રસ્ત થયું હતું.

આ પણ વાંચો: અમેરિકા-ઈરાન વચ્ચે તણાવ ફરી વધ્યો : અમેરિકી હુમલા બાદ IRGCનો પલટવાર, કુવૈતમાં મિસાઈલ અને ડ્રોન હુમલાનો દાવો

તપાસ શરૂ

આ દુર્ઘટનામાં ડેવ ફિજી અને હેલિકોપ્ટર પાયલોટ બંનેના મોત થયા છે. અમેરિકાની નેશનલ ટ્રાન્સપોર્ટેશન સેફ્ટી બોર્ડ (NTSB) દ્વારા અકસ્માતની સત્તાવાર તપાસ શરૂ કરવામાં આવી છે. હાલ સુધી અકસ્માતનું ચોક્કસ કારણ જાહેર કરવામાં આવ્યું નથી. તપાસકર્તાઓ હવામાનની સ્થિતિ, હેલિકોપ્ટરની ટેકનિકલ સ્થિતિ અને ફ્લાઇટ ડેટાની તપાસ કરી રહ્યા છે.

આ પણ વાંચો: અમેરિકાના રાષ્ટ્રપતિ ટ્રમ્પની પુત્રી ટિફની ટ્રમ્પ જામનગર પહોંચી : વનતારાની લેશે મુલાકાત

પરિવારે શ્રદ્ધા અને વિશ્વાસમાં શોધી સાંત્વના

પુત્રના અચાનક અવસાનથી પરિવાર શોકમાં ગરકાવ છે. છતાં જ્યોર્જ ફિજીનું કહેવું છે કે તેમની ખ્રિસ્તી આસ્થા તેમને આ દુઃખ સહન કરવાની શક્તિ આપી રહી છે. તેમણે જણાવ્યું કે ભગવાને તેમને એક યાદગાર અને સુંદર લગ્ન સમારોહ આપ્યો હતો, પરંતુ થોડા કલાકોમાં જ બધું બદલાઈ ગયું. હવે તેઓ શાંતિ અને સાંત્વના માટે ભગવાનમાં જ વિશ્વાસ રાખી રહ્યા છે.

આ ઘટના સમગ્ર અમેરિકામાં ચર્ચાનો વિષય બની છે. લગ્નના દિવસની ખુશીઓ વચ્ચે આવી દુર્ઘટનાએ સૌને સ્તબ્ધ કરી દીધા છે. નવવધૂના જીવતા બચી જવાના સમાચાર વચ્ચે પરિવાર હવે ડેવની યાદો સાથે જીવન આગળ વધારવાનો પ્રયાસ કરી રહ્યો છે.