સોનું-ચાંદી ખરીદવું હવે સામાન્ય માણસના ગજા બહાર : ઈમ્પોર્ટ ડ્યૂટી વધતા જ ચાંદી રૂ.3 લાખને પાર, સોનાના ભાવમાં પણ તોતિંગ વધારો

Gold-Silver Price Shock: કેન્દ્ર સરકાર દ્વારા સોના અને ચાંદી પરની ઈમ્પોર્ટ ડ્યૂટી (આયાત શુલ્ક)માં કરવામાં આવેલા ધરખમ વધારાની અસરે આજે ભારતીય વાયદા બજાર (MCX) માં પ્રલય જેવી સ્થિતિ સર્જી છે. સરકારે આયાત ડ્યૂટી 6% થી વધારીને સીધી 15% કરી દેતા સોના અને ચાંદીના ભાવમાં અકલ્પનીય ઉછાળો જોવા મળ્યો છે. રોકાણકારો અને લગ્નસરાની ખરીદી કરનારા ગ્રાહકો માટે આજનો દિવસ કોઈ મોટા આંચકાથી ઓછો નથી, કારણ કે કિંમતી ધાતુઓના ભાવે ઇતિહાસના તમામ રેકોર્ડ તોડી નાખ્યા છે.

બજારમાં ખુલ્લેઆમ જોવા મળી રહ્યું છે કે સરકારના એક આર્થિક નિર્ણયથી કિંમતી ધાતુઓની કિંમત આસમાને પહોંચી ગઈ છે. મલ્ટી કોમોડિટી એક્સચેન્જ (MCX) પર ટ્રેડિંગ શરૂ થતાની સાથે જ લેવાલીનો ભારે પ્રવાહ જોવા મળ્યો હતો, જેના પરિણામે ભાવમાં એક જ દિવસમાં હજારો રૂપિયાનો વધારો ઝીંકાયો છે. ખાસ કરીને ચાંદીમાં આવેલી તેજીએ બજારના નિષ્ણાંતોને પણ ચોંકાવી દીધા છે.

ચાંદીમાં પ્રચંડ તેજી: ₹3 લાખની ઐતિહાસિક સપાટી વટાવી

વાયદા બજારમાં ચાંદી આજે રોકેટની ગતિએ વધી છે. આયાત ડ્યૂટીના સમાચાર વહેતા થતા જ ચાંદીના ભાવમાં ₹21,000 થી વધુનો તોતિંગ વધારો નોંધાયો છે.

• વર્તમાન ભાવ: ₹3,00,457.00 (પ્રતિ કિલો)

• વધારો: એક જ દિવસમાં ₹21,395.00 નો જંગી ઉછાળો (+7.67%)

• હાઈ લેવલ: આજે ટ્રેડિંગ દરમિયાન ચાંદી ₹3,01,429.00 ની ટોચે પહોંચી હતી.

• અગાઉનું બંધ: ગઈકાલે ચાંદી ₹2,79,062.00 પર બંધ થઈ હતી.

આ પણ વાંચો: PM મોદીની અપીલ બાદ સોના-ચાંદીના ભાવમાં આવશે તોતિંગ ઉછાળો : કેન્દ્ર સરકારે આયાત ડ્યૂટી 6% થી વધારી સીધી 15% કરી, જાણો તમારા ખિસ્સા પર કેટલી અસર થશે

સોનામાં એકઝાટકે ₹10,000 થી વધુનો ઉછાળો

સોનાના ભાવમાં પણ સરકારી ડ્યૂટીની સીધી અને આકરી અસર જોવા મળી રહી છે. પીળી ધાતુના ભાવમાં આજે મોટો ભડકો થયો છે.

• વર્તમાન ભાવ: ₹1,63,996.00 (પ્રતિ 10 ગ્રામ)

• વધારો: ₹10,554.00 નો તોતિંગ વધારો (+6.88%)

• હાઈ લેવલ: સોનું આજે ₹1,64,497.00 ના સ્તર સુધી ઉછળ્યું હતું.

• અગાઉનું બંધ: અગાઉના સત્રમાં સોનું ₹1,53,442.00 ના ભાવે બંધ રહ્યું હતું.

શા માટે ભાવમાં થયો આટલો મોટો વિસ્ફોટ?

આ તેજી પાછળનું મુખ્ય કારણ કેન્દ્ર સરકાર દ્વારા આયાત શુલ્કમાં કરવામાં આવેલો 9 ટકાનો વધારો છે. સરકારે કુલ ડ્યૂટી 6% થી વધારીને 15% (10% બેઝિક + 5% સેસ) કરી દીધી છે. સરકારનો મુખ્ય હેતુ સોનાની આયાત પર અંકુશ મેળવીને વિદેશી મુદ્રા ભંડાર (Forex Reserve) પરનું દબાણ ઘટાડવાનો અને ભારતીય રૂપિયાને મજબૂત કરવાનો છે.

આ પણ વાંચો: દેશમાં વધશે પેટ્રોલ-ડીઝલના ભાવ? : PM મોદીની અપીલ બાદ પેટ્રોલ-ડીઝલ પર સરકારના મોટા સંકેત

સામાન્ય જનતા અને રોકાણકારો પર અસર

લગ્નસરાની સીઝન શરૂ થાય તે પૂર્વે જ સોના-ચાંદીના ભાવમાં થયેલા આ વધારાથી મધ્યમ વર્ગનું બજેટ ખોરવાઈ જશે. બીજી તરફ, જેમણે નીચા ભાવે સોનામાં રોકાણ કર્યું હતું, તેમના માટે આ નફાની મોટી તક બની છે. જોકે, નવા ગ્રાહકો માટે હવે દાગીના બનાવવા કે રોકાણ કરવું અત્યંત મોંઘું સાબિત થશે. બજારના જાણકારોનું માનવું છે કે આગામી દિવસોમાં જો વૈશ્વિક સ્થિતિ પણ આવી જ રહી તો ભાવમાં હજુ વધુ અસ્થિરતા જોવા મળી શકે છે.