Gig Economy India: દેશમાં ગિગ ઇકોનોમી (Gig Economy) સાથે જોડાયેલા લાખો વર્કર્સ માટે એક સારા સમાચાર સામે આવ્યા છે. કર્મચારી રાજ્ય વીમા નિગમ (ESIC) હવે ગિગ અને પ્લેટફોર્મ વર્કર્સને પણ પોતાના સોશિયલ સિક્યોરિટી (સામાજિક સુરક્ષા)ના દાયરામાં લાવવાની યોજના બનાવી રહ્યું છે. જો આ યોજના લાગુ થશે, તો ફૂડ ડિલિવરી પાર્ટનર, કેબ ડ્રાઇવર, ઓનલાઇન પ્લેટફોર્મ પર કામ કરતા ફ્રીલાન્સર અને અન્ય ગિગ વર્કર્સને પણ હેલ્થ ઇન્સ્યોરન્સ અને સામાજિક સુરક્ષા જેવી સુવિધાઓનો લાભ મળી શકશે.
શું છે ESICની આ યોજના?
દેશના લાખો ગિગ વર્કર્સને પણ અન્ય ક્ષેત્રોમાં કામ કરતા કર્મચારીઓની જેમ જ સામાજિક સુરક્ષાનો લાભ મળી શકે, તે માટે જ સરકાર અને ESIC કામ કરી રહ્યા છે. આ યોજના હેઠળ કર્મચારીઓને મફત સારવારની સુવિધા, માતૃત્વ લાભ (maternity benefit), અકસ્માત વીમો અને અન્ય જરૂરી સામાજિક સુરક્ષા યોજનાઓનો ફાયદો ગિગ વર્કર્સને પણ મળશે.
સાથે જ, આ યોજના માટે ગિગ વર્કર્સનો ડેટા એકત્રિત કરવા અને તેમને એક વ્યવસ્થિત સિસ્ટમ સાથે જોડવાનું કામ પણ કરવામાં આવી રહ્યું છે. એવું માનવામાં આવી રહ્યું છે કે આ પ્રક્રિયામાં ઈ-શ્રમ (e-Shram) પોર્ટલનો પણ ઉપયોગ કરી શકાય છે, જેથી પાત્ર કર્મચારીઓની ઓળખ સરળતાથી થઈ શકે.
કંપનીઓ અને સરકાર વચ્ચે થશે ડીલ
આ યોજનાને લાગુ કરવા માટે સરકાર, ESIC અને વિવિધ ડિજિટલ પ્લેટફોર્મ કંપનીઓ વચ્ચે યોગ્ય તાલમેલ સાધવામાં આવશે. પ્લેટફોર્મ કંપનીઓના ડેટા અને ઈ-શ્રમ પોર્ટલના માધ્યમથી કર્મચારીઓનું રજીસ્ટ્રેશન કરવામાં આવી શકે છે, જેથી લાભ સીધો જ યોગ્ય લોકો સુધી પહોંચી શકે.
ઝડપથી વધી રહી છે ગિગ ઇકોનોમી
ભારતમાં ઓનલાઇન ફૂડ ડિલિવરી, ઈ-કોમર્સ, કેબ સર્વિસ અને અન્ય ડિજિટલ પ્લેટફોર્મના વિસ્તારની સાથે ગિગ વર્કર્સની સંખ્યા પણ સતત વધી રહી છે. હાલમાં દેશમાં આશરે 1 કરોડ જેટલા ગિગ વર્કર્સ અને પ્લેટફોર્મ વર્કર્સ કામ કરી રહ્યા છે અને આગામી વર્ષોમાં આ સંખ્યા 2.5 કરોડ સુધી પહોંચી શકે તેવો અંદાજ છે. આ વધતી સંખ્યાને ધ્યાનમાં રાખીને જ સરકાર આ ક્ષેત્રના કર્મચારીઓ માટે સામાજિક સુરક્ષાનું એક મજબૂત માળખું તૈયાર કરવા માંગે છે.
સામેલ છે આ પડકારો
આ યોજનાને જમીની સ્તરે લાગુ કરવા માટે હજી પણ કેટલાક મુદ્દાઓ પર ચર્ચા અને નિર્ણયો લેવાના બાકી છે. જેમાં એ નક્કી કરવાનું રહેશે કે કયા-કયા ગિગ વર્કર્સ આ યોજનાના દાયરામાં આવશે, ફન્ડિંગની વ્યવસ્થા કેવી રીતે થશે અને અલગ-અલગ પ્લેટફોર્મ પર કામ કરતા કર્મચારીઓને કઈ રીતે આનો લાભ આપવામાં આવશે.
8મા પગાર પંચ પર મોટી અપડેટ : પગાર વધારામાં થશે વિલંબ, પણ જુલાઈમાં કર્મચારીઓને મળશે આ મોટી ભેટ?
