નર્મદા: સ્ટેચ્યુ ઓફ યુનિટી નજીક આવેલા ગરુડેશ્વર ખાતે સરકારી જમીનના ઉપયોગમાં થયેલા નિયમભંગ સામે જિલ્લા વહીવટી તંત્રએ કડક કાર્યવાહી હાથ ધરી છે. વર્ષ 2019માં રહેણાંક હેતુસર ઉચ્ચ અધિકારીઓને ફાળવવામાં આવેલી સરકારી જમીન પર શરતોના ભંગ સાથે બાંધવામાં આવેલા પાંચ મકાનોને શનિવારે બુલડોઝર ચલાવી તોડી પાડવામાં આવ્યા હતા.
વહીવટી તંત્રની આ કાર્યવાહી રાજ્યમાં સરકારી જમીનના ઉપયોગ અને ફાળવણીની શરતોના કડક અમલ તરીકે જોવામાં આવી રહી છે. નોંધનીય છે કે કાર્યવાહી દરમિયાન કોઈ અનિચ્છનીય બનાવ બન્યો ન હતો અને સમગ્ર કામગીરી શાંતિપૂર્ણ માહોલમાં પૂર્ણ કરવામાં આવી હતી.
આ પણ વાંચો: અમદાવાદમાં રથયાત્રા પૂર્વે ક્રાઇમ બ્રાન્ચ એલર્ટ : ઢાબા પોઈન્ટ્સ પર પેટ્રોલિંગ, ડ્રોનથી કડક નજર
વર્ષ 2019માં 13 અધિકારીઓને ફાળવાયા હતા પ્લોટ
મળતી માહિતી મુજબ, વર્ષ 2019માં ગરુડેશ્વર ખાતે 13 જેટલા ઉચ્ચ અધિકારીઓને રહેણાંક હેતુ માટે સરકારી જમીનના પ્લોટ ફાળવવામાં આવ્યા હતા. આ ફાળવણી સાથે સરકાર દ્વારા કેટલીક ચોક્કસ શરતો પણ નક્કી કરવામાં આવી હતી, જેનું પાલન કરવું ફરજિયાત હતું. આ પૈકી સાત અધિકારીઓએ પ્લોટ પર મકાનોનું બાંધકામ કર્યું હતું, જ્યારે બાકીના છ અધિકારીઓને ફાળવાયેલી જમીન સરકાર દ્વારા અગાઉ જ પરત લઈ લેવામાં આવી હતી.
નિયમોના ભંગ બદલ અગાઉ અપાઈ હતી નોટિસ
વહીવટી તંત્રના જણાવ્યા મુજબ, સંબંધિત અધિકારીઓને શરતોના ભંગ અંગે અગાઉ નોટિસ પાઠવીને જરૂરી સ્પષ્ટતા અને કાર્યવાહી માટે તક આપવામાં આવી હતી. તેમ છતાં નિયમોનું પાલન ન થતાં અંતે ડિમોલિશનની કાર્યવાહી કરવાનો નિર્ણય લેવામાં આવ્યો. શનિવારે અધિકારીઓનો કાફલો બુલડોઝર સાથે સ્થળ પર પહોંચ્યો હતો અને નિયમભંગ થયેલા પાંચ મકાનોને તોડી પાડવામાં આવ્યા હતા.
અનેક અધિકારીઓ નિવૃત્ત, કેટલાક હજુ પણ સેવામાં
માહિતી અનુસાર, તે સમયે પ્લોટ મેળવનાર કેટલાક અધિકારીઓ હાલ નિવૃત્ત થઈ ચૂક્યા છે, જ્યારે કેટલાક હજુ પણ રાજ્ય સરકારમાં વિવિધ ઉચ્ચ હોદ્દાઓ પર ફરજ બજાવી રહ્યા છે. આ કાર્યવાહી દરમિયાન નોંધપાત્ર બાબત એ રહી કે સંબંધિત અધિકારીઓએ વહીવટી તંત્રની કાર્યવાહીમાં કોઈ વિરોધ કર્યો નહોતો. સરકારી નિયમોનું પાલન કરતાં તેમણે ડિમોલિશનની કામગીરીમાં સહકાર આપ્યો હતો, જેના કારણે સમગ્ર કાર્યવાહી કોઈ વિવાદ વિના પૂર્ણ થઈ હતી.
આ પણ વાંચો: વડોદરામાં ACB નો સફળ ટ્રેપ : જામીનની કાર્યવાહી માટે રૂ. 10 હજારની લાંચ લેતા PSI અને ASI રંગેહાથ ઝડપાયા
સરકારી શરતોના પાલનનો સંદેશ
ગરુડેશ્વરમાં થયેલી આ કાર્યવાહી સરકારી જમીનની ફાળવણી સાથે જોડાયેલી શરતોનું પાલન કરવું કેટલું જરૂરી છે તેનો સ્પષ્ટ સંદેશ આપે છે. વહીવટી તંત્રનું માનવું છે કે સરકારી સંપત્તિના ઉપયોગમાં નિયમોનું ઉલ્લંઘન કરનાર સામે ભવિષ્યમાં પણ કાયદા મુજબ કડક કાર્યવાહી કરવામાં આવશે.
