અમદાવાદ/રાજકોટ: ગોંડલ તાલુકાના 25થી વધુ ગામોમાંથી પસાર થનારી પ્રસ્તાવિત 765 KV હાઈટેન્શન વીજ લાઈનને લઈને આમ આદમી પાર્ટીએ ખેડૂતોના હિતના મુદ્દે અવાજ ઉઠાવ્યો છે. પાર્ટીના નેતા અને ખેડૂત મહિલા આગેવાન જીગીશા પટેલે જણાવ્યું છે કે આ પ્રોજેક્ટથી અનેક ખેડૂતોની ખેતીની જમીન પર લાંબા ગાળાની અસર પડી શકે છે. તેમણે ખેડૂતોને સંગઠિત થઈ પોતાના અધિકારો માટે અવાજ ઉઠાવવાનું આહ્વાન કર્યું છે અને ગામડે-ગામડે જઈને જાગૃતિ અભિયાન ચલાવવાની પણ જાહેરાત કરી છે.
જીગીશા પટેલે જણાવ્યું કે તેઓ આ મુદ્દે કોઈ રાજકીય પક્ષના પ્રતિનિધિ તરીકે નહીં પરંતુ એક ખેડૂતની દીકરી તરીકે ખેડૂતોની ચિંતા વ્યક્ત કરી રહ્યા છે. તેમણે કહ્યું કે જેતપર અને કોંઢ ગામમાં ખેડૂતો વીજ લાઈનના વિરોધમાં ઉપવાસ પર બેઠા છે અને હવે ગોંડલ તાલુકાના અનેક ગામોમાં પણ આવી જ પરિસ્થિતિ ઊભી થવાની શક્યતા છે. તેમના જણાવ્યા મુજબ જેટકો (JETCO) દ્વારા જાહેર કરાયેલા
દસ્તાવેજોના આધારે ગોંડલ તાલુકાના 25થી વધુ ગામોમાંથી આ હાઈટેન્શન વીજ લાઈન પસાર થવાની યોજના છે.
અનેક ગામોના ખેડૂતો પર પડી શકે છે અસર
જીગીશા પટેલના જણાવ્યા મુજબ આબલી, ખડવંથલી, ભીંડાવાડ, હડમતાળા, ગરનાળા, અણિયારા, ભાલોડી, ત્રાકુડા, દડવા, વેકરી, પાટીદળ, ચોરડી, જામવાડી, ગોમટા, વોરા કોટડા, બાંદરા, દેવચરી, મોવિયા, માંડણકુંડલા, કાંટરોલીયા, બિલડી, શિવરાજગઢ, બંધિયા, શ્રીનાથગઢ અને કમર કોટડા સહિતના ગામોમાંથી વીજ લાઈન પસાર થવાની શક્યતા છે. આ પ્રોજેક્ટના કારણે મોટી સંખ્યામાં ખેડૂતોની જમીન પ્રભાવિત થઈ શકે છે.
તેમણે દાવો કર્યો કે વીજ લાઈન માટે ઉભા કરવામાં આવતા દરેક થાંભલા માટે અંદાજે 55 ચોરસ ફૂટ જેટલી જમીનનો ઉપયોગ થશે. તેમના મતે આ કારણે ખેડૂતોને સીધું આર્થિક નુકસાન તો થશે જ, સાથે સાથે જમીનની બજાર કિંમતમાં પણ નોંધપાત્ર ઘટાડો થઈ શકે છે.
આ પણ વાંચો: વડોદરામાં BSNLના અન્ડરગ્રાઉન્ડ કેબલની ચોરી : ખાડો ખોદી લાખો રૂપિયાની સરકારી મિલકત ઉઠાવી ગયા તસ્કરો
ખેતી અને જમીનના ઉપયોગ અંગે વ્યક્ત કરી ચિંતા
જીગીશા પટેલે જણાવ્યું કે 765 KV હાઈટેન્શન વીજ લાઈન હેઠળ આવતી જમીન પર ભવિષ્યમાં પાકું બાંધકામ, બોરવેલ, કૂવો અથવા અન્ય કેટલીક ખેતી સંબંધિત સુવિધાઓ ઊભી કરવામાં નિયમનાત્મક મર્યાદાઓ આવી શકે છે. તેમના મતે તેના કારણે ખેડૂતો માટે પોતાની જમીનનો સંપૂર્ણ ઉપયોગ કરવો મુશ્કેલ બની શકે છે.
તેમણે એવો પણ આક્ષેપ કર્યો કે ખેડૂતોને આપવામાં આવતું વળતર જમીનના વાસ્તવિક મૂલ્યની સરખામણીએ ઓછું છે. તેમણે જણાવ્યું કે માત્ર થાંભલા નીચે આવતી જમીનનું વળતર આપવાથી આસપાસની અસરગ્રસ્ત જમીનનું નુકસાન પૂરું થઈ શકતું નથી. તેમના મતે લાંબા ગાળે ખેડૂતોને વધુ આર્થિક નુકસાન ભોગવવું પડી શકે છે.
આ પણ વાંચો: અમદાવાદના વટવા GIDCમાં ફરી મોટી આગ : નરોડા અને ઓઢવ બાદ ફાયર સેફ્ટી પર ફરી ઊઠ્યા ગંભીર સવાલો
ખાનગી કંપનીને લાભ પહોંચાડવાનો આક્ષેપ
જીગીશા પટેલે આક્ષેપ કર્યો કે આ પ્રોજેક્ટનો મુખ્ય લાભ એક ખાનગી કંપનીને થવાનો છે, જ્યારે તેની સૌથી મોટી કિંમત ખેડૂતોને ચૂકવવી પડશે. તેમણે જણાવ્યું કે જો આ પ્રોજેક્ટ સંપૂર્ણપણે જાહેર હિત અને રાષ્ટ્રીય જરૂરિયાત માટે હોત તો ખેડૂતો પણ દેશહિતને પ્રાથમિકતા આપતા, પરંતુ હાલની સ્થિતિમાં ખેડૂતોના હિતોની અવગણના થઈ રહી હોવાનો તેમણે દાવો કર્યો.
તેમણે સરકારને અપીલ કરી કે ખેડૂતોની સંમતિ, પૂરતું વળતર અને લાંબા ગાળાના નુકસાનનું યોગ્ય મૂલ્યાંકન કર્યા વગર આવા પ્રોજેક્ટ આગળ ન વધારવા જોઈએ. તેમણે જણાવ્યું કે ખેડૂતોની જમીન માત્ર સંપત્તિ નથી પરંતુ તેમના પરિવારની જીવનભરની મૂડી અને રોજગારનું મુખ્ય સાધન છે.
ગામડે-ગામડે જાગૃતિ અભિયાનની જાહેરાત
આમ આદમી પાર્ટીના નેતાએ જણાવ્યું કે હવે ગોંડલ તાલુકાના દરેક અસરગ્રસ્ત ગામમાં જઈ ખેડૂતોને આ પ્રોજેક્ટની વિગતો અને તેના સંભવિત પ્રભાવ અંગે માહિતગાર કરવામાં આવશે. તેમણે ખેડૂતોને સંગઠિત રહી કાયદેસર રીતે પોતાના અધિકારો માટે અવાજ ઉઠાવવાની અપીલ કરી. તેમણે કહ્યું કે આ મુદ્દો રાજકારણનો નહીં પરંતુ ખેડૂતોના ભવિષ્યનો છે. જો ખેડૂતો એકજૂથ થશે તો તેમની રજૂઆત વધુ અસરકારક રીતે સરકાર અને સંબંધિત વિભાગો સુધી પહોંચી શકશે.
સરકાર અને સંબંધિત તંત્રના પ્રતિભાવ પર નજર
હાલ આમ આદમી પાર્ટી દ્વારા કરવામાં આવેલા આક્ષેપો અને રજૂઆત અંગે સરકાર અથવા સંબંધિત વિભાગ તરફથી કોઈ સત્તાવાર પ્રતિક્રિયા સામે આવી નથી. આગામી દિવસોમાં ખેડૂતોની રજૂઆતો, સરકારનો અભિગમ અને વીજ લાઈન પ્રોજેક્ટ અંગે શું નિર્ણય લેવાય છે તેના પર સૌની નજર રહેશે.
