Ban on petrol bikes : દિલ્હીમાં પ્રદૂષણની ગંભીર સમસ્યાને નિયંત્રણમાં લાવવા માટે કેજરીવાલ સરકાર એક ક્રાંતિકારી પગલું ભરવા જઈ રહી છે. સરકારની નવી 'ડ્રાફ્ટ ઇલેક્ટ્રિક વ્હીકલ પોલિસી 2026-2030' હેઠળ વાહન વ્યવહારના ક્ષેત્રમાં પાયાના ફેરફારો સૂચવવામાં આવ્યા છે. જો તમે દિલ્હીના રહેવાસી છો અને આગામી સમયમાં નવું ટુ-વ્હીલર ખરીદવાનું વિચારી રહ્યા છો, તો આ નવી નીતિ તમારા નિર્ણય પર મોટી અસર કરી શકે છે. ખાસ કરીને પેટ્રોલ વાહનોના શોખીનો માટે આ સમાચાર ચોંકાવનારા છે.
બજારમાં મોટો ફેરફાર અને પ્રતિબંધ
દિલ્હી સરકારના નવા પ્રસ્તાવ મુજબ, એપ્રિલ 2028 થી દિલ્હીમાં નવી પેટ્રોલ બાઇક કે સ્કૂટરનું રજીસ્ટ્રેશન સંપૂર્ણપણે બંધ કરી દેવામાં આવશે. આનો અર્થ એ છે કે વર્ષ 2028 પછી દિલ્હીના કોઈપણ શોરૂમમાંથી તમે નવું પેટ્રોલ ટુ-વ્હીલર ખરીદી શકશો નહીં. સરકારનું લક્ષ્ય છે કે 2028 પછી વેચાતા તમામ નવા ટુ-વ્હીલર્સ માત્ર અને માત્ર ઇલેક્ટ્રિક (EV) જ હોય. આ નિર્ણયથી દિલ્હીનું ઓટોમોબાઈલ માર્કેટ રાતોરાત બદલાઈ જવાની શક્યતા છે.
પ્રદૂષણ પર લગામ લગાવવાનો માસ્ટર પ્લાન
દિલ્હીમાં પ્રદૂષણ ફેલાવવામાં વાહનોનો ફાળો સૌથી મોટો છે. આંકડાકીય માહિતી મુજબ, દિલ્હીના રસ્તાઓ પર દોડતા કુલ વાહનોમાં 67 ટકા હિસ્સો માત્ર ટુ-વ્હીલરનો છે. સરકારનું વિશ્લેષણ કહે છે કે, જો આટલી વિશાળ સંખ્યામાં રહેલા પેટ્રોલ વાહનોને ઇલેક્ટ્રિકમાં ફેરવી દેવામાં આવે, તો કાર્બન ઉત્સર્જનમાં ધરખમ ઘટાડો કરી શકાય છે. આ નીતિ દ્વારા સરકાર દિલ્હીની હવાને શુદ્ધ બનાવવા અને ગ્રીન ટ્રાન્સપોર્ટેશનને પ્રોત્સાહન આપવા માંગે છે.
જૂના પેટ્રોલ વાહનોના માલિકો માટે રાહત
આ નીતિની જાહેરાત સાથે જ લોકોમાં ફાળ પડી છે કે શું તેમની અત્યારની બાઇક પણ બંધ થઈ જશે? પરંતુ ગભરાવાની જરૂર નથી. સરકારનો આ પ્રતિબંધ માત્ર 'નવા' રજીસ્ટ્રેશન પર છે. એટલે કે, જે લોકો પાસે અત્યારે પેટ્રોલ બાઇક કે સ્કૂટર છે, તેઓ તેની નિર્ધારિત સમયમર્યાદા (આરટીઓ નિયમ મુજબ) સુધી તેનો ઉપયોગ ચાલુ રાખી શકશે. 2028 પછી માત્ર નવા પેટ્રોલ વાહનોના વેચાણ અને રજીસ્ટ્રેશન પર જ રોક લાગશે.
શું વાહન ચલાવતી વખતે તમારું સ્ટીયરિંગ ધ્રુજે છે?: આ ભૂલ તમારી જિંદગી જોખમમાં મૂકી શકે, જાણો શું કરવું
ઇલેક્ટ્રિક વાહન ખરીદનારાઓને સારા સમાચાર
સરકાર માત્ર પ્રતિબંધ જ નથી લગાવી રહી, પરંતુ લોકોને ઇલેક્ટ્રિક વાહનો તરફ વાળવા માટે આકર્ષક યોજનાઓ પણ લાવી રહી છે. નવી EV પોલિસી હેઠળ, જો તમે ઇલેક્ટ્રિક ટુ-વ્હીલર ખરીદો છો, તો બેટરીની ક્ષમતાના આધારે ₹30,000 સુધીની સબસીડી મળી શકે છે. આ ઉપરાંત, ખરીદદારોને રોડ ટેક્સ અને રજીસ્ટ્રેશન ફીમાં પણ મોટી છૂટ આપવામાં આવશે, જેથી ઇલેક્ટ્રિક વાહન ખરીદવું આર્થિક રીતે પણ ફાયદાકારક સાબિત થાય.
ટ્રાફિકમાં વારંવાર ક્લચ દબાવવાની ઝંઝટથી મળશે છુટકારો!: Honda ની આ નવી ટેક્નોલોજીએ માર્કેટમાં જગાવી ચર્ચા
ચાર્જિંગ ઇન્ફ્રાસ્ટ્રક્ચર અને ભવિષ્યની તૈયારી
ઇલેક્ટ્રિક વાહનોના પ્રસાર માટે સૌથી મોટી જરૂરિયાત ચાર્જિંગ સ્ટેશનની છે. સરકાર આ બાબતે પણ ગંભીર છે. નવી નીતિમાં દિલ્હીના ખૂણે-ખૂણે ચાર્જિંગ પોઈન્ટ્સ અને 'બેટરી સ્વૈપિંગ' (બેટરી બદલવાની સુવિધા) નેટવર્ક ઊભું કરવાનું આયોજન છે. આ સુવિધાને કારણે ચાર્જિંગમાં લાગતા સમયની બચત થશે અને લોકો લાંબી મુસાફરી પણ નિશ્ચિંત થઈને કરી શકશે. આમ, 2028 સુધીમાં દિલ્હી સંપૂર્ણપણે EV રેડી શહેર બની જશે.
