હેલ્થ એલર્ટ: કોંગોમાં ફાટી નીકળ્યો ઈબોલા વાયરસનો નવો આઉટબ્રેક : તાવ અને બ્લીડિંગ કરાવતા આ વાયરસથી દુનિયાભરમાં ફફડાટ

મધ્ય આફ્રિકાના ડેમોક્રેટિક રિપબ્લિક ઓફ કોંગોમાં ફરી એકવાર ઈબોલા વાયરસનો પ્રકોપ જોવા મળતા વૈશ્વિક આરોગ્ય તંત્ર ચિંતિત બન્યું છે. 2026માં નોંધાયેલા નવા કેસો ખાસ કરીને બુંદીબુગ્યો સ્ટ્રેન સાથે જોડાયેલા હોવાનું જાહેર થયું છે જે ઈબોલા વાયરસનો એક દુર્લભ પરંતુ ગંભીર પ્રકાર માનવામાં આવે છે. આ પ્રકોપને કારણે સ્થાનિક આરોગ્ય તંત્ર સાથે સાથે આંતરરાષ્ટ્રીય સંસ્થાઓએ પણ તાત્કાલિક કામગીરી શરૂ કરી છે. વિશ્વ આરોગ્ય સંસ્થા (WHO)એ પરિસ્થિતિને નજીકથી મોનીટર કરવાની સાથે સંક્રમણ રોકવા માટે તાત્કાલિક માર્ગદર્શિકા અને સપોર્ટ મોકલવાનું શરૂ કર્યું છે.

બુંદીબુગ્યો સ્ટ્રેન (Bundibugyo Virus) શું છે અને કેમ ગંભીર?

ઈબોલા વાયરસના વિવિધ પ્રકારોમાં બુંદીબુગ્યો સ્ટ્રેનને ખાસ ધ્યાનમાં લેવામાં આવે છે કારણ કે તે અગાઉ પણ અનેકવાર જીવલેણ સાબિત થયો છે. આ સ્ટ્રેન પ્રથમ વખત 2007માં યુગાન્ડાના બુંદીબુગ્યો જિલ્લામાં ઓળખાયો હતો જેના પરથી તેનું નામ પડ્યું છે. ઈબોલા એક ગંભીર વાયરસજન્ય રોગ છે જે માનવ શરીરમાં પ્રવેશ્યા પછી તાવ, ઉલ્ટી, ડાયરિયા અને ગંભીર સ્થિતિમાં આંતરિક તથા બાહ્ય રક્તસ્રાવ સર્જે છે. બુંદીબુગ્યો સ્ટ્રેનમાં મૃત્યુદર અન્ય સ્ટ્રેન્સ કરતા થોડો ઓછો હોવા છતાં, તેનો ફેલાવો ઝડપી હોઈ શકે છે, જે તેને વધુ જોખમી બનાવે છે.

આ પણ વાંચો: FBI જેટ, 50 હજારનો શૂટ અને ગર્લફ્રેન્ડ સાથે વૈભવી ખર્ચા : વિવાદોમાં આવ્યા કાશ પટેલ

હાલની સ્થિતિ

પ્રાથમિક તબક્કામાં કેટલાક સંક્રમિત કેસોની પુષ્ટિ થઈ છે જ્યારે સંદિગ્ધ કેસોની સંખ્યા વધવાની શક્યતા છે. આરોગ્ય અધિકારીઓએ સંક્રમિત વિસ્તારોમાં કડક દેખરેખ અને ક્વોરન્ટીન પગલાં અમલમાં મૂક્યા છે. સ્થાનિક હોસ્પિટલોને એલર્ટ પર રાખવામાં આવી છે અને આરોગ્યકર્મીઓને વિશેષ સુરક્ષા સાધનો આપવામાં આવ્યા છે. WHO તથા અન્ય આંતરરાષ્ટ્રીય સહયોગી સંગઠનો દ્વારા રેપિડ રિસ્પોન્સ ટીમો તૈનાત કરવામાં આવી છે.

આ પણ વાંચો: યુકેના પીએમ કીર સ્ટારમર મુશ્કેલીમાં : બ્રિટનમાં સત્તા પલટાની તૈયારી

ઈબોલાનો ઈતિહાસ અને કોંગો પર અસર

ઈબોલા વાયરસનો સૌથી વધુ પ્રભાવ કોંગો અને આસપાસના આફ્રિકન દેશોમાં જોવા મળ્યો છે. છેલ્લા બે દાયકામાં કોંગોમાં અનેકવાર ઈબોલાના પ્રકોપ નોંધાયા છે. જેમાં હજારો લોકોના મોત થયા છે. ખાસ કરીને 2018-2020 દરમિયાનનો ઈબોલા પ્રકોપ ખૂબ જ ગંભીર હતો, જેમાં વ્યાપક સ્તરે જાનહાનિ થઈ હતી. આ કારણોસર કોંગો હવે ઇબોલા સામે લડવા માટે વધુ સજ્જ છે, છતાં નવા સ્ટ્રેનના કેસો ચિંતા વધારતા રહે છે.

આ પણ વાંચો: ગંગા પાણી વિવાદ : ફરક્કા કરારના રિન્યુઅલ મુદ્દે બાંગ્લાદેશ અડગ, ભારતને સંબંધો બગાડવાની આપી ચેતવણી

વિશ્વ આરોગ્ય નિષ્ણાતોનું માનવું છે કે સમયસર પગલાં લેવામાં આવશે તો આ પ્રકોપને નિયંત્રણમાં લાવી શકાય છે. હાલ સંપર્ક ટ્રેસિંગ, ટેસ્ટિંગ અને આઈસોલેશન પર ખાસ ભાર મૂકવામાં આવી રહ્યો છે. વૈજ્ઞાનિકો બુંદીબુગ્યો સ્ટ્રેન સામે અસરકારક રસી અને સારવાર વિકસાવવા માટે સંશોધન તેજ કરી રહ્યા છે. WHOએ પણ જણાવ્યું છે કે જો પરિસ્થિતિ ગંભીર બનશે તો વધુ આંતરરાષ્ટ્રીય સહાય તાત્કાલિક મોકલવામાં આવશે.