બ્રિટનમાં ફરી સત્તા પલટાના એંધાણ: ડેપ્યુટી પીએમ એન્જેલા રેનર અને વેસ સ્ટ્રીટીંગ પીએમ પદની રેસમાં મોખરે
બ્રિટનના રાજકારણમાંથી આ સમયના સૌથી મોટા સમાચાર સામે આવી રહ્યા છે. યુકે (UK) ના વડાપ્રધાન કીર સ્ટારમર (Keir Starmer) ની ખુરશી જોખમમાં મુકાઈ ગઈ છે. તેમની જ શાસક લેબર પાર્ટી (Labour Party) ના 50 થી વધુ સાંસદોએ વડાપ્રધાન સામે બળવો પોકાર્યો છે. આ બળવાખોર સાંસદો પીએમ કીર સ્ટારમરના નેતૃત્વ અને તેમની નીતિઓથી નારાજ છે અને દેશમાં નેતૃત્વ પરિવર્તન એટલે કે નવા વડાપ્રધાન બનાવવાની માંગ પર અડગ બન્યા છે.
પીએમ પદ માટે બે જૂથો વચ્ચે આંતરિક યુદ્ધ શરૂ
બ્રિટિશ મીડિયા અહેવાલો અનુસાર, લેબર પાર્ટીની અંદર વડાપ્રધાન પદ મેળવવા માટે અત્યારથી જ બે મોટા જૂથો સક્રિય થઈ ગયા છે:
એન્જેલા રેનર જૂથ: દેશના ડેપ્યુટી પીએમ એન્જેલા રેનર (Angela Rayner) અને ગ્રેટર માન્ચેસ્ટરના મેયર એન્ડી બર્નહામ (Andy Burnham) નું જૂથ કીર સ્ટારમરને હટાવીને સત્તા મેળવવા માટે કમર કસી રહ્યું છે.
વેસ સ્ટ્રીટીંગ જૂથ: બીજી તરફ હેલ્થ સેક્રેટરી વેસ સ્ટ્રીટીંગ (Wes Streeting) પણ પીએમ પદના પ્રબળ દાવેદાર તરીકે ઉભરી આવ્યા છે અને તેમને પણ પાર્ટીના અનેક સાંસદોનું સમર્થન મળી રહ્યું છે.
સાંસદોના આ આંતરિક જૂથવાદના કારણે લેબર પાર્ટી બે ભાગમાં વહેંચાઈ ગઈ હોય તેવું ચિત્ર સ્પષ્ટ દેખાઈ રહ્યું છે.
કેમ શરૂ થયો કીર સ્ટારમર સામે વિરોધ?
અત્યાર સુધી પ્રાપ્ત માહિતી અનુસાર, કીર સ્ટારમર સામે સાંસદોની નારાજગીનું મુખ્ય કારણ દેશની કથળતી આર્થિક સ્થિતિ, જાહેર સેવાઓમાં ધબડકો અને પાર્ટીની લોકપ્રિયતામાં સતત થઈ રહેલો ઘટાડો છે. બળવાખોર સાંસદોનું માનવું છે કે જો સ્ટારમર પીએમ પદ પર રહેશે તો આગામી સામાન્ય ચૂંટણીમાં લેબર પાર્ટીનો સૂર્ય અસ્ત થઈ જશે. આથી, સમય રહેતા નેતૃત્વ બદલવું જરૂરી છે.
બ્રિટનમાં ફરી રાજકીય અસ્થિરતાનો ભય
છેલ્લા કેટલાક વર્ષોમાં બ્રિટનના રાજકારણમાં ભારે અસ્થિરતા જોવા મળી છે, જ્યાં કન્ઝર્વેટિવ પાર્ટીના શાસન દરમિયાન ટૂંકા સમયમાં અનેક વડાપ્રધાનો બદલાયા હતા. હવે લેબર પાર્ટી સત્તામાં આવ્યા બાદ પણ આ જ ઈતિહાસ પુનરાવર્તિત થઈ રહ્યો હોય તેવું લાગી રહ્યું છે. જો કીર સ્ટારમર આગામી દિવસોમાં પોતાના સાંસદોને મનાવવામાં અસફળ રહેશે, તો તેમણે વડાપ્રધાન પદેથી રાજીનામું આપવું પડી શકે છે.
