નાગરિક ઉડ્ડયન મંત્રાલયના આંકડા અનુસાર, માર્ચ 2025 માં પૂરા થયેલા નાણાકીય વર્ષમાં એર ઇન્ડિયા અને એર ઇન્ડિયા એક્સપ્રેસને સંયુક્ત રીતે રૂ. 9,568.4 કરોડનું કરવેરા પહેલાં નુકસાન થયું હતું. પાછલા નાણાકીય વર્ષમાં, અકાસા એર અને સ્પાઇસજેટે રૂ. 1,983.4 કરોડ અને રૂ. 58.1 કરોડનું કરવેરા પહેલાં નુકસાન નોંધાવ્યું હતું, જ્યારે ઇન્ડિગોએ રૂ. 7,587.5 કરોડનો કરવેરા પહેલાં નફો કર્યો હતો. નાગરિક ઉડ્ડયન રાજ્ય મંત્રી મુરલીધર મોહોલે ગુરુવારે લોકસભામાં એક લેખિત જવાબમાં આ આંકડા શેર કર્યા હતા. જોકે, આ આંકડા કામચલાઉ છે.
Tata ગ્રુપની માલિકીની Air India એ રૂ. 3,890.2 કરોડનું કરવેરા પહેલાં નુકસાન નોંધાવ્યું હતું, જ્યારે તેની ઓછી કિંમતની કંપની એર ઇન્ડિયા એક્સપ્રેસ, જે લાંબા સમયથી નફામાં હતી, તેણે 2024-25 માં રૂ. 5,678.2 કરોડનું નુકસાન નોંધાવ્યું હતું. જાન્યુઆરી 2022 માં ટાટા ગ્રુપ દ્વારા ખોટ કરતી એર ઇન્ડિયા અને નફામાં રહેલી એર ઇન્ડિયા એક્સપ્રેસને હસ્તગત કરવામાં આવી હતી.
ડેટા અનુસાર, એર ઇન્ડિયાનું દેવું રૂ. 26,879.6 કરોડ હતું, જ્યારે Indigo નું દેવું રૂ. 67,088.4 કરોડ હતું. ડેટા અનુસાર, એર ઇન્ડિયા એક્સપ્રેસ, Akasa Air અને SpiceJet નું દેવું અનુક્રમે રૂ. 617.5 કરોડ, રૂ. 78.5 કરોડ અને રૂ. 886 કરોડ હતું.
મોહોલે લેખિત જવાબમાં જણાવ્યું હતું કે "માર્ચ 1994 માં એર કોર્પોરેશન એક્ટ રદ થતાં ભારતીય સ્થાનિક ઉડ્ડયનને નિયંત્રણમુક્ત કરવામાં આવ્યું છે. સંસાધન એકત્રીકરણ અને દેવાનું પુનર્ગઠન સહિતના નાણાકીય અને કાર્યકારી નિર્ણયો, વ્યાપારી વિચારણાઓના આધારે સંબંધિત એરલાઇન્સ દ્વારા સંચાલિત કરવામાં આવે છે".
