ચૂંટણીમાં ભાજપના નો-રિપીટ સામે કોંગ્રેસની રિપીટ ફોર્મ્યુલા : જાણો અમદાવાદમાં કયા જૂના જોગીઓ પર ફરી વિશ્વાસ મુકશે કોંગ્રેસ

Gujarat Local Body Election 2026: અમદાવાદ મ્યુનિસિપલ કોર્પોરેશન (AMC)ની ચૂંટણી પહેલા રાજકીય હલચલ તેજ બની ગઈ છે. ભાજપ પોતાના માઈક્રો-પ્લાનિંગ સાથે મેદાનમાં ઉતરી ગયું છે, ત્યારે કોંગ્રેસે અનુભવ અને જાણીતા ચહેરાઓ પર દાવ લગાવવાનો નિર્ણય કર્યો છે. પક્ષે કેટલાક પૂર્વ કોર્પોરેટરોને ફરી તક આપીને “રિપીટ ફોર્મ્યુલા” અપનાવ્યો છે, જે ચૂંટણીમાં મહત્વપૂર્ણ સાબિત થઈ શકે છે.

કોંગ્રેસની મેરેથોન બેઠકો અને ઉમેદવાર પસંદગી

અમદાવાદ સ્થિત કોંગ્રેસના પ્રદેશ કાર્યાલયમાં ઉમેદવારોની પસંદગી માટે સતત મેરેથોન બેઠકો ચાલી રહી છે. માહિતી મુજબ, ગઈકાલે રાત્રે બે વાગ્યા સુધી બેઠક ચાલતી રહી હતી, જ્યારે આજે સવારથી પણ મોવડી મંડળ અને અન્ય આગેવાનો ચર્ચામાં વ્યસ્ત રહ્યા. ધારાસભ્યો, મોરચાના આગેવાનો અને પદાધિકારીઓ પોતાના સમર્થકોને ટિકિટ અપાવવા માટે સક્રિય રીતે લોબીંગ કરી રહ્યા છે. આ દર્શાવે છે કે કોંગ્રેસ માટે આ ચૂંટણી અત્યંત મહત્વપૂર્ણ બની ગઈ છે. ગુજરાતમાં ભાજપ ઉપરાંત આમ આદમી પાર્ટીના વધતા જતા પ્રભાવની વચ્ચે આ વખતની સ્થાનિક સ્વરાજ્યની ચૂંટણીઓમાં કોંગ્રેસનો પણ બરાબરનો લીટમસ ટેસ્ટ થશે એ વાત તો નક્કી જ છે.

કોંગ્રેસનો રિપીટ ફોર્મ્યુલા: કોને મળશે ફરી તક?

કોંગ્રેસે આ વખતે કેટલાક જાણીતા અને અનુભવી પૂર્વ કોર્પોરેટરોને ફરી મેદાનમાં ઉતારવાનો નિર્ણય કર્યો છે.

સૂત્રો મુજબ નીચેના નામોની ટિકિટ લગભગ નક્કી માનવામાં આવી રહી છે:

1) શહેઝાદ ખાન પઠાણ – દાણીલીમડા

2) જગદીશ રાઠોડ – અમરાઈવાડી

3) નીરવ બક્ષી – દરિયાપુર

4) રાજશ્રી કેસરી – ચાંદખેડા

5) વર્ષાબેન કટારા – ચાંદખેડા

આ તમામ ઉમેદવારો પોતાના વિસ્તારમાં ઓળખ અને ગ્રાઉન્ડ કનેક્શન ધરાવતા હોવાથી પાર્ટી ફરી તેમના પર વિશ્વાસ મૂકી રહી છે.

આ પણ વાંચોઃ ભાજપ પર વરસી પડ્યાં કોંગ્રેસના સાંસદ ગેનીબેન ઠાકોર : "...તો તમારે ઢાંકણીમાં પાણી લઇને ડુબી જવું પડે", જાણો ભાજપ પર કેમ ધુઆંપુઆં થઈ બનાહની બેની

કોંગ્રેસે કેમ અપનાવ્યો રિપીટ ફોર્મ્યુલા?

કોંગ્રેસ માને છે કે અનુભવી ઉમેદવારો પાસે વિસ્તારની સમસ્યાઓ અને મતદારોની જરૂરિયાતો વિશે સારી સમજ હોય છે. આ કારણે તેઓ વધુ અસરકારક રીતે પ્રચાર કરી શકે છે અને મતદારોને વિશ્વાસમાં લઈ શકે છે. પૂર્વ કોર્પોરેટરોને ફરી તક આપવાથી સ્થાનિક સ્તરે પાર્ટી સંગઠન મજબૂત રહે છે. આ સાથે કાર્યકરોમાં પણ ઉત્સાહ વધે છે, કારણ કે તેઓ પોતાના ઓળખીતા નેતાઓ સાથે કામ કરવા તૈયાર હોય છે.

ભાજપની સમકક્ષ રણનીતિ 12 નામોની પેનલ સિસ્ટમઃ

ભાજપે ઉમેદવાર પસંદગી માટે વોર્ડ દીઠ 12 નામોની પેનલ તૈયાર કરવાની રણનીતિ અપનાવી છે. આમાંથી અંતિમ 4 ઉમેદવારો નક્કી કરવામાં આવશે, જે ભાજપની સુવ્યવસ્થિત અને માઈક્રો-પ્લાનિંગ આધારિત પદ્ધતિ દર્શાવે છે.

આ પણ વાંચોઃ ચૂંટણીમાં ભાજપ વોર્ડ દીઠ તૈયાર કરશે 12 નામોની પેનલ : જાણો 12 માંથી કેવી રીતે નક્કી કરવામાં આવશે 4-4 નામો

કોંગ્રેસ vs ભાજપ: સીધી ટક્કર

ભાજપે પહેલાથી જ પ્રચાર શરૂ કરી દીધો છે. ઘર-ઘર પત્રિકા વિતરણ અને બુથ લેવલ પર કાર્યકરોને સક્રિય કરીને પાર્ટી ગ્રાઉન્ડ લેવલ પર મજબૂત હાજરી નોંધાવી રહી છે. અમદાવાદમાં મુખ્ય લડત ભાજપ અને કોંગ્રેસ વચ્ચે જ જોવા મળશે. ભાજપ છેલ્લા ઘણા વર્ષોથી AMCમાં સત્તામાં છે, તેથી કોંગ્રેસ માટે આ ચૂંટણીમાં પડકાર મોટો છે. પરંતુ કોંગ્રેસનો અનુભવ આધારિત રિપીટ ફોર્મ્યુલા અને ગ્રાઉન્ડ કનેક્શન ભાજપને કડક ટક્કર આપી શકે છે.

આ પણ વાંચોઃ પાલિકા-પંચાયતની ચૂંટણી માટે આજે મૂરતિયા જાહેર કરશે કોંગ્રેસ : સામે આવ્યું સંભવિત ઉમેદવારોનું સીક્રેટ લીસ્ટ! જાણો રીવાબા જાડેજાના નણંદ ક્યાંથી લડશે ચૂંટણી

ચૂંટણી પહેલા રાજકીય ગરમાવો

સ્થાનિક સ્વરાજ્યની આ ચૂંટણીને 2027ની વિધાનસભા ચૂંટણીની “સેમિફાઈનલ” તરીકે જોવામાં આવી રહી છે. આથી દરેક પક્ષ માટે આ ચૂંટણી પ્રતિષ્ઠાનો પ્રશ્ન બની ગઈ છે. કોંગ્રેસ જ્યાં અનુભવી નેતાઓ પર દાવ લગાવી રહી છે, ત્યાં ભાજપ નવી અને સંગઠિત વ્યૂહરચના સાથે આગળ વધી રહી છે.

આ પણ વાંચોઃ શું હોય છે સેન્સ લેવાની પ્રક્રિયા? : દર વખતે ચૂંટણી પહેલાં રાજકીય પક્ષો કેમ કરે છે Sense Process?

અમદાવાદ મ્યુનિસિપલ કોર્પોરેશન રાજ્યની સૌથી મહત્વપૂર્ણ સ્થાનિક સંસ્થા છે. અહીંનું પરિણામ રાજ્યના રાજકીય માહોલ પર સીધી અસર કરે છે. જો કોંગ્રેસ સારો પ્રદર્શન કરે છે તો તે આગામી ચૂંટણી માટે પાર્ટીને આત્મવિશ્વાસ આપશે, જ્યારે ભાજપ માટે પોતાની સત્તા જાળવી રાખવાનો પડકાર છે. AMC ચૂંટણી પહેલા કોંગ્રેસે રિપીટ ફોર્મ્યુલા અપનાવીને અનુભવી નેતાઓ પર વિશ્વાસ વ્યક્ત કર્યો છે. બીજી તરફ ભાજપ માઈક્રો-પ્લાનિંગ અને નવી પદ્ધતિ સાથે મેદાનમાં ઉતરી ગયું છે. આ બંને રણનીતિ વચ્ચેની ટક્કર અમદાવાદની ચૂંટણીને વધુ રસપ્રદ અને મહત્વપૂર્ણ બનાવશે.