"તેઓ સારી સારી અને મોટી મોટી વાત કરે છે" : "પરંતુ રાતના અંધારામાં લોકો પર બોમ્બ વરસાવે છે"

Trump Putin: યુએસના રાષ્ટ્રપતિ ડોનાલ્ડ ટ્રમ્પ અને રશિયાના રાષ્ટ્રપતિ વ્લાદિમીર પુતિન વચ્ચે બધું બરાબર નથી. ટ્રમ્પે ફરી એકવાર પુતિન પર પ્રહાર કરીને પોતાની નારાજગી વ્યક્ત કરી છે.
ફિફા વર્લ્ડ કપ ફાઇનલમાંથી પાછા ફર્યા બાદ મીડિયા સાથે વાત કરતા ટ્રમ્પે કહ્યું કે હું રાષ્ટ્રપતિ પુતિનથી ખૂબ નિરાશ છું. તેઓ ખૂબ સારી અને મોટી મોટી વાતો કરે છે.
તેઓ બોલવામાં નિષ્ણાત છે પરતું રાતના અંધારામાં લોકો પર બોમ્બ ફેંકે છે. અમને આ ગમતું નથી. ટ્રમ્પે રશિયા-યુક્રેન યુદ્ધ વચ્ચે પુતિન સાથેની તેમની તાજેતરની વાતચીતના સંદર્ભમાં આ નિવેદન આપ્યું છે.
હકીકતમાં, તેમના કાર્યકાળની શરૂઆતથી, ટ્રમ્પ રશિયા અને યુક્રેન વચ્ચેના યુદ્ધનો અંત લાવવા માંગે છે. પરંતુ રશિયાએ છેલ્લા કેટલાક દિવસોમાં યુક્રેન પર ડ્રોન અને મિસાઇલ હુમલાઓની ગતિ વધારી દીધી છે, જેના કારણે ટ્રમ્પ ગુસ્સે થયા છે.

20 જાન્યુઆરીએ યુએસ પ્રમુખ તરીકે શપથ લીધા પછી, ટ્રમ્પે સ્પષ્ટ કર્યું હતું કે તેમની પ્રાથમિકતા રશિયા અને યુક્રેન યુદ્ધને રોકવાની છે. પરંતુ માર્ચથી, રશિયાએ યુક્રેન પર હુમલાઓ તીવ્ર બનાવ્યા છે. ટ્રમ્પે આ હુમલાઓને પુતિનની બેવડી નીતિ સાથે જોડ્યા, જ્યાં તેઓ દિવસે શાંતિની વાત કરે છે પરંતુ રાત્રે હુમલા કરે છે. ટ્રમ્પે તાજેતરના ભૂતકાળમાં પુતિન સાથે ઘણી વખત ફોન પર વાત કરી હતી, જેમાં તેમણે યુક્રેન-રશિયા યુદ્ધને સમાપ્ત કરવા માટે શાંતિ વાટાઘાટો કરવાનો પ્રયાસ કર્યો હતો.
ટ્રમ્પે અગાઉ પુતિન સાથે સારા સંબંધો હોવાનો દાવો કર્યો હતો પરંતુ વારંવાર હુમલાઓ અને શાંતિ વાટાઘાટોમાં પુતિનના અસહયોગી વલણ પર નિરાશા વ્યક્ત કરી હતી.તમને જણાવી દઈએ કે ટ્રમ્પ પર રશિયા પર નવા પ્રતિબંધો લાદવા માટે યુએસ અને યુરોપિયન સાથીઓ દ્વારા દબાણ હતું. યુક્રેનના રાષ્ટ્રપતિ વોલોડીમીર ઝેલેન્સકીએ પણ ટ્રમ્પ પાસેથી રશિયા પર દબાણ વધારવાની માંગ કરી હતી.