Thailand road accident 2026: થાઈલેન્ડના ઉત્તર-પૂર્વીય મુકદહન પ્રાંતમાં એક અત્યંત કરૂણ અને ચોંકાવનારી માર્ગ દુર્ઘટનાએ સમગ્ર દેશને હચમચાવી દીધો છે. ધાર્મિક તીર્થયાત્રા માટે પગપાળા નીકળેલા બૌદ્ધ ભિક્ષુકોના સમૂહ પર એક અનિયંત્રિત પિકઅપ ટ્રક ચડી જતાં નવ લોકોના મોત થયા છે, જ્યારે અનેક અન્ય ઘાયલ થયા છે. આ દુર્ઘટનાની સૌથી ચોંકાવનારી બાબત એ છે કે, અકસ્માત સર્જનાર ટ્રકનો ડ્રાઈવર માત્ર 11 વર્ષનો બાળક હોવાનું સામે આવ્યું છે. પ્રાથમિક માહિતી અનુસાર, ભિક્ષુકો શાંતિપૂર્વક ધાર્મિક યાત્રા કરી રહ્યા હતા ત્યારે પાછળથી આવેલી પિકઅપ ટ્રક અચાનક નિયંત્રણ ગુમાવી બેઠી અને સીધી ભિક્ષુકોના સમૂહમાં ઘૂસી ગઈ. અકસ્માત એટલો ગંભીર હતો કે, સ્થળ પર જ અરાજકતા ફેલાઈ ગઈ અને આસપાસના લોકો તાત્કાલિક બચાવ કામગીરીમાં જોડાયા હતા.
35 ભિક્ષુકો 260 કિલોમીટરની પદયાત્રા પર નીકળ્યા હતા
મુકદહન પ્રાંતના ગવર્નર વોરયાન બૂનનારતે ઘટનાની પુષ્ટિ કરતાં જણાવ્યું હતું કે કુલ 35 બૌદ્ધ ભિક્ષુકોનો એક સમૂહ ધાર્મિક તીર્થયાત્રા માટે ઉબોન રત્ચાથાની પ્રાંત તરફ જતો હતો. આશરે 260 કિલોમીટર લાંબી આ પદયાત્રાની શરૂઆત થયાને માત્ર અડધો કલાક જેટલો સમય થયો હતો, ત્યારે જ આ દુર્ઘટના બની હતી. પ્રત્યક્ષદર્શીઓના જણાવ્યા મુજબ, ભિક્ષુકો રસ્તાની એક બાજુએ નિયમિત લાઈનમાં આગળ વધી રહ્યા હતા. એ દરમિયાન એક પિકઅપ ટ્રક અચાનક લહેરાતી હાલતમાં રોડ પરથી નીચે ઉતરી ગઈ અને સીધી યાત્રાળુઓ સાથે અથડાઈ હતી.
આ પણ વાંચો: મ્યાનમારમાં એરસ્ટ્રાઈક : રાખાઈનમાં 27 બોમ્બ ઝીંકતા તબાહી, બાંગ્લાદેશ સરહદ પર હાઈએલર્ટ
ઘટનાસ્થળે પાંચના મોત, હોસ્પિટલમાં વધુ ચાર ભિક્ષુકોએ દમ તોડ્યો
અધિકારીઓના જણાવ્યા મુજબ આ દુર્ઘટનામાં પાંચ ભિક્ષુકોના ઘટનાસ્થળે જ મોત થયા હતા, જ્યારે ગંભીર રીતે ઘાયલ થયેલા અન્ય ચાર ભિક્ષુકોએ હોસ્પિટલમાં સારવાર દરમિયાન જીવ ગુમાવ્યો હતો. આ સાથે મૃત્યુઆંક વધીને નવ સુધી પહોંચી ગયો છે. આ ઉપરાંત કુલ 13થી વધુ લોકોને હોસ્પિટલમાં દાખલ કરવામાં આવ્યા છે, જેમાંથી કેટલાક ભિક્ષુકોની હાલત અત્યંત ગંભીર હોવાનું સ્થાનિક મીડિયા અહેવાલોમાં જણાવાયું છે. બચાવ કામગીરી માટે સ્થાનિક બચાવ દળો અને તબીબી ટીમોને તાત્કાલિક ઘટનાસ્થળે મોકલવામાં આવ્યા હતા.
સીસીટીવી અને વીડિયોમાં દેખાયો અકસ્માતનો ભયાનક દૃશ્ય
સ્થાનિક બચાવ સંગઠનો દ્વારા શેર કરવામાં આવેલા વીડિયોમાં સ્પષ્ટ જોવા મળે છે કે ભિક્ષુકો શાંતિપૂર્વક યાત્રા કરી રહ્યા હતા, ત્યારે અચાનક ઝડપથી આવી રહેલી પિકઅપ ટ્રક રસ્તાથી નીચે ઉતરી જાય છે અને સીધી ભિક્ષુકોના સમૂહમાં ઘૂસી જાય છે. આ દૃશ્યો સોશિયલ મીડિયા પર પણ ઝડપથી વાયરલ થયા છે, જેને લઈને થાઈલેન્ડમાં ભારે આક્રોશ અને શોકની લાગણી જોવા મળી રહી છે.
11 વર્ષનો બાળક ટ્રક ચલાવતો હોવાની માહિતીથી પોલીસ પણ આશ્ચર્યમાં
આ સમગ્ર ઘટનામાં સૌથી વધુ ચર્ચાનો વિષય એ બન્યો છે કે અકસ્માત સર્જનાર વાહનનો ડ્રાઈવર માત્ર 11 વર્ષનો બાળક હતો. પોલીસના જણાવ્યા અનુસાર, સગીરને કસ્ટડીમાં લેવામાં આવ્યો છે અને બાળ સુરક્ષા અધિકારીઓની હાજરીમાં તેની પૂછપરછ કરવામાં આવશે. થાઈલેન્ડના કાયદા મુજબ સગીર આરોપીઓ સાથે વિશેષ કાયદાકીય પ્રક્રિયા અપનાવવામાં આવે છે. પોલીસ હવે એ દિશામાં તપાસ કરી રહી છે કે આટલી નાની ઉંમરના બાળકને પિકઅપ ટ્રક ચલાવવા કોણે આપી હતી અને અકસ્માત પાછળનું વાસ્તવિક કારણ શું હતું.
અકસ્માત પાછળ બેદરકારી કે અન્ય કારણ?
અકસ્માતમાં બચી ગયેલા ભિક્ષુકોના જણાવ્યા અનુસાર પિકઅપ ટ્રક અકસ્માત પહેલાંથી જ અનિયંત્રિત રીતે લહેરાતી જોવા મળી રહી હતી. જેના કારણે આશંકા વ્યક્ત કરવામાં આવી રહી છે કે વાહનનું સંતુલન અચાનક બગડ્યું હોઈ શકે છે અથવા અન્ય કોઈ તકનીકી ખામી સર્જાઈ હોઈ શકે છે. હાલ સ્થાનિક પોલીસ તમામ સંભાવનાઓને ધ્યાનમાં રાખીને તપાસ કરી રહી છે. સાથે જ સગીર પાસે વાહન કેવી રીતે પહોંચ્યું અને તે એકલો ટ્રક ચલાવી રહ્યો હતો કે નહીં તે અંગે પણ તપાસ હાથ ધરવામાં આવી છે.
સમગ્ર દેશમાં શોકનો માહોલ
આ ભયાનક માર્ગ દુર્ઘટનાએ થાઈલેન્ડમાં ધાર્મિક સમુદાય સહિત સામાન્ય નાગરિકોમાં પણ શોકની લાગણી ફેલાવી છે. પદયાત્રા દરમિયાન થયેલી આ હોનારતે માર્ગ સલામતી અને સગીર વયના બાળકો દ્વારા વાહન ચલાવવાના મુદ્દે ફરી ગંભીર પ્રશ્નો ઊભા કર્યા છે. અધિકારીઓએ મૃતકોના પરિવારો પ્રત્યે સંવેદના વ્યક્ત કરી છે અને ઘાયલોને શ્રેષ્ઠ સારવાર ઉપલબ્ધ કરાવવાના પ્રયાસો શરૂ કર્યા છે.
