Ayatollah Khamenei Funeral: ઈરાનના સર્વોચ્ચ નેતા અયાતુલ્લા સૈયદ અલી ખામનેઈના અંતિમ સંસ્કારને લઈને આંતરરાષ્ટ્રીય સ્તરે ચર્ચાઓ તેજ બની છે. ઈરાની માધ્યમો અને સોશિયલ મીડિયા પર શેર કરવામાં આવેલી માહિતી અનુસાર તેહરાનમાં રાજકીય અને ધાર્મિક ગૌરવ સાથે અંતિમ વિધિની પ્રક્રિયા શરૂ થઈ હોવાનું જણાવવામાં આવી રહ્યું છે. જોકે, આ સમગ્ર ઘટનાક્રમ અંગે સ્વતંત્ર આંતરરાષ્ટ્રીય સ્ત્રોતો તરફથી સંપૂર્ણ પુષ્ટિ ઉપલબ્ધ નથી. ઈરાનની રાજધાની તેહરાન સ્થિત ગ્રાન્ડ મોસલ્લામાં વિશ્વના વિવિધ દેશોના પ્રતિનિધિઓ, ધાર્મિક આગેવાનો અને રાજકીય નેતાઓ પહોંચ્યા હોવાનું કહેવાઈ રહ્યું છે. ઈરાનમાં ભારતીય પ્રતિનિધિમંડળની હાજરી પણ ખાસ ચર્ચાનો વિષય બની છે.
ભારતના રાજકીય નેતાઓ અને ધાર્મિક આગેવાનો પહોંચ્યા તેહરાન
ઈરાની દૂતાવાસ દ્વારા સોશિયલ મીડિયા પ્લેટફોર્મ 'એક્સ' પર શેર કરવામાં આવેલી તસવીરોમાં પીડીપી પ્રમુખ મહેબૂબા મુફ્તી અને કોંગ્રેસના વરિષ્ઠ નેતા તથા વિદેશી મામલાઓના વિભાગના પ્રમુખ સલમાન ખુર્શીદ નજર આવ્યા હોવાનું જણાવાયું છે. અહેવાલો અનુસાર, મહેબૂબા મુફ્તી ગુરુવારે નવી દિલ્હીથી તેહરાન પહોંચ્યા હતા. કહેવાઈ રહ્યું છે કે તેઓ જમ્મુ-કાશ્મીર અને લદ્દાખ ક્ષેત્રમાંથી આમંત્રિત થયેલા એકમાત્ર બિન-શિયા રાજકીય નેતા છે. આ ઉપરાંત ભારત સરકારના સત્તાવાર પ્રતિનિધિમંડળમાં વિદેશ રાજ્યમંત્રી પબિત્રા માર્ગેરિટા અને બિહારના રાજ્યપાલ લેફ્ટનન્ટ જનરલ (નિવૃત્ત) સૈયદ અતા હસનૈનનો સમાવેશ થતો હોવાનું પણ જણાવાયું છે. ઈરાની મીડિયા દ્વારા શેર કરવામાં આવેલા કેટલાક વીડિયો ક્લિપ્સમાં ભારતીય હિંદુ, મુસ્લિમ અને શીખ ધર્મગુરુઓ પ્રાર્થના કરતા હોવાનું દર્શાવવામાં આવ્યું છે.
તેહરાનમાં ઉમટ્યો વિશાળ જનસમુદાય
અહેવાલો મુજબ તેહરાનની સડકો પર મોટી સંખ્યામાં લોકો અંતિમ વિદાય આપવા માટે ઉમટી પડ્યા છે. કાળા વસ્ત્રોમાં લોકો ઈરાની ધ્વજ સાથે શોક વ્યક્ત કરતા અને ધાર્મિક સૂત્રોચ્ચાર કરતા જોવા મળ્યા હોવાનું કહેવાય છે. ખામનેઈના તાબૂતને ઈમામ હુસૈનની દરગાહ સાથે સંકળાયેલા પવિત્ર લાલ ધ્વજથી આવરી દેવામાં આવ્યો હોવાનું પણ અહેવાલોમાં જણાવાયું છે. ઈરાની સત્તાવાળાઓ આ ધ્વજને પ્રતિકાર, બલિદાન અને સત્યનું પ્રતિક ગણાવે છે. ઈરાનના રાષ્ટ્રપતિ મસૂદ પેઝેશ્કિયાને આ પ્રસંગે રાષ્ટ્રીય એકતા અને સંકલ્પના નવા અધ્યાયની શરૂઆત ગણાવી હોવાનું કહેવાય છે.
અંતિમ સંસ્કારની પ્રક્રિયા અનેક શહેરોમાં યોજાશે
અહેવાલો અનુસાર 4 જુલાઈથી 9 જુલાઈ દરમિયાન ઈરાન અને ઈરાકના કેટલાક મહત્વપૂર્ણ ધાર્મિક શહેરોમાં અંતિમ સંસ્કાર સંબંધિત કાર્યક્રમો યોજાશે. તેમાં તેહરાન, કુમ, મશહદ, નજફ અને કરબલાનો સમાવેશ થાય છે.
ધાર્મિક મહત્વ ધરાવતા આ શહેરોમાં વિશેષ પ્રાર્થના સભાઓ અને શ્રદ્ધાંજલિ કાર્યક્રમોનું આયોજન કરવામાં આવી રહ્યું હોવાનું જણાવાયું છે.
ચાર મહિના સુધી પાર્થિવ દેહ કેવી રીતે સુરક્ષિત રાખવામાં આવ્યો?
કેટલાક મીડિયા અહેવાલો મુજબ અયાતુલ્લા ખામનેઈનું નિધન લગભગ ચાર મહિના પહેલાં થયું હતું અને ત્યારબાદ પાર્થિવ દેહને વિશેષ વ્યવસ્થામાં સુરક્ષિત રાખવામાં આવ્યો હતો. આતંકવાદ વિરોધી વિષયોના નિષ્ણાત ડૉ. મોહમ્મદ ઉમરે એક આંતરરાષ્ટ્રીય મીડિયા સંસ્થાને આપેલી માહિતીમાં દાવો કર્યો છે કે દેહને રસાયણિક પ્રક્રિયા દ્વારા નહીં પરંતુ નીચા તાપમાન ધરાવતા કોલ્ડ સ્ટોરેજમાં રાખવામાં આવ્યો હતો. ઈસ્લામિક પરંપરામાં રસાયણોના ઉપયોગને લઈને મર્યાદાઓ હોવાનું કહેવાય છે, જ્યારે કેટલીક વિશેષ પરિસ્થિતિઓમાં શિયા ધર્મશાસ્ત્ર અંતિમ સંસ્કારમાં વિલંબ અને પાર્થિવ દેહને નિયંત્રિત તાપમાને રાખવાની મંજૂરી આપે છે.
આ પણ વાંચો: તીર્થયાત્રા બની મૃત્યુયાત્રા : માત્ર 11 વર્ષના બાળકે પિકઅપ ટ્રકથી બૌદ્ધ ભિક્ષુકોના સમૂહને કચડ્યો, 9ના મોત
કડક સુરક્ષા વચ્ચે યોજાઈ રહી છે વિધિ
અહેવાલો અનુસાર અંતિમ સંસ્કાર દરમિયાન અત્યંત કડક સુરક્ષા વ્યવસ્થા ગોઠવવામાં આવી છે. ભીડ નિયંત્રણ માટે હવાઈ નિરીક્ષણ સહિત અનેક સુરક્ષા ઉપાયો અમલમાં મૂકવામાં આવ્યા છે. કહેવાય છે કે, સુરક્ષા કારણોસર અયાતુલ્લા ખામનેઈના પુત્ર મોજતબા ખામનેઈ અંતિમ સંસ્કારની કેટલીક જાહેર વિધિઓથી દૂર રહી શકે છે. જોકે આ અંગે સત્તાવાર સ્તરે સંપૂર્ણ સ્પષ્ટતા સામે આવી નથી.
100થી વધુ દેશોના પ્રતિનિધિઓની હાજરીનો દાવો
ઈરાનના વિદેશ મંત્રાલયના હવાલાથી એવા દાવા કરવામાં આવ્યા છે કે આ રાજકીય શોક સમારંભમાં લગભગ 100 દેશોના પ્રતિનિધિઓ હાજરી આપી રહ્યા છે. તેમાં એશિયાના અનેક દેશોના ધાર્મિક પ્રતિનિધિઓ, રાજકીય આગેવાનો તેમજ વિવિધ સમુદાયોના નેતાઓનો સમાવેશ થતો હોવાનું જણાવાયું છે. પાકિસ્તાન, ચીન અને અફઘાનિસ્તાનના પ્રતિનિધિઓ પણ કાર્યક્રમમાં સામેલ થવાના અહેવાલો છે.
