Apple Logo History: આજના સમયમાં iPhoneની લોકપ્રિયતા એટલી વધી ગઈ છે કે ભાગ્યે જ કોઈ એવું હશે જે તેના વિશે જાણતું ન હોય. નાના બાળકોથી લઈને વડીલો સુધી દરેક વ્યક્તિ જાણે છે કે iPhone કઈ કંપનીનો છે. ભલે કોઈને કંપનીનું નામ તરત યાદ ન આવે, પરંતુ તેનો લોગો જોતા જ લોકો ઓળખી જાય છે કે આ તે જ બ્રાન્ડ છે. આજે એપલનો લોગો માત્ર એક બ્રાન્ડની ઓળખ નથી, પરંતુ સ્ટાઇલ અને સ્ટેટસનું પ્રતીક બની ગયો છે. એપલની આ સફળતા પાછળ એક-બે નહીં પણ પૂરા 50 વર્ષનો ઇતિહાસ છે.
1 એપ્રિલ, 2026 ના રોજ પોતાની શરૂઆતના 50 વર્ષ પૂર્ણ કરનાર આ કંપનીના ફીચર્સ અને પ્રાઇવસીથી લઈને લોગો સુધી બધું જ કોઈને કોઈ કારણ સાથે જોડાયેલું છે. દુનિયાભરના કરોડો iPhones, MacBooks અને iPads પર દેખાતો આ અડધો કટ થયેલો એપલનો લોગો અવારનવાર લોકોના મનમાં સવાલ પેદા કરે છે. આખરે એપલે પોતાના લોગો માટે આખું સફરજન કેમ ન પસંદ કર્યું? શું તેની પાછળ કોઈ રહસ્ય છે કે માત્ર ડિઝાઇનરની કરામત?
ન્યૂટનથી આધુનિક એપલ સુધીની સફર
એપલની શરૂઆત 50 વર્ષ પહેલા એટલે કે 1976માં થઈ હતી, પરંતુ ત્યારે તેનો લોગો આજના જેવો બિલકુલ નહોતો. પહેલા લોગોમાં સર આઇઝેક ન્યૂટનને એક સફરજનના ઝાડ નીચે બેઠેલા બતાવવામાં આવ્યા હતા. પરંતુ આ લોગોની ડિઝાઇન ઘણી જટિલ હતી, જેને 1977માં ડિઝાઇનર રોબ જેનોફ દ્વારા બદલીને એક સરળ અને આજના આધુનિક એપલ જેવું રૂપ આપવામાં આવ્યું, જેમાં એક બાજુથી 'બાઇટ' (બચકું) ભરેલું દેખાતું હતું.
ડિઝાઇન પાછળનું કારણ
એપલના લોગોમાં 'કટ' હોવાનું સૌથી મોટું કારણ વ્યવહારુ અને ટેકનોલોજી સાથે જોડાયેલું હતું. ડિઝાઇનરનું માનવું હતું કે જો સફરજન આખું ગોળ હોત, તો દૂરથી જોતી વખતે લોકો તેને ચેરી, ટામેટું કે અન્ય કોઈ ફળ સમજી શકતા હતા. સફરજનના આકારને સ્પષ્ટ ઓળખ આપવા માટે તેમાં બાઇટનું નિશાન બનાવવામાં આવ્યું, જેથી પહેલી નજરે જ તે સફરજન હોવાનું સમજાય.
કોણે ડિઝાઇન કર્યો આ કટવાળો સફરજનનો લોગો?
એપલના ફાઉન્ડર્સ સ્ટીવ જોબ્સ અને સ્ટીવ વોઝનિયાકને પોતાની કંપની માટે એક આધુનિક અને સરળતાથી ઓળખી શકાય તેવો લોગો બનાવવો જરૂરી લાગ્યો. આ માટે જોબ્સે ગ્રાફિક ડિઝાઇનર રોબ જેનોફને પસંદ કર્યા. માત્ર બે અઠવાડિયામાં લોગો તૈયાર થઈ ગયો અને 1977માં જ્યારે એપલે પોતાનું પહેલું પર્સનલ કોમ્પ્યુટર Apple II માર્કેટમાં લોન્ચ કર્યું, ત્યારે આ નવો લોગો પહેલીવાર દુનિયાની સામે આવ્યો હતો.
સમયની સાથે બદલાતો રહ્યો એપલનો લોગો
એપલનો લોગો સમયની સાથે સતત અપડેટ થતો રહ્યો છે. અત્યારે જે લોગો દેખાય છે તે ગ્રે રંગનો છે, પરંતુ આ પહેલા આ લોગો ક્યારેક બ્લેક, ક્યારેક વ્હાઇટ તો ક્યારેક બ્લુ રંગમાં પણ ઉપયોગમાં લેવાઈ ચૂક્યો છે. ઘણા લોકો એવું પણ માને છે કે આ કટ 'બાઇટ' (Bite) કોમ્પ્યુટરના 'બાઇટ' (Byte) શબ્દ સાથે મળતો આવે છે, જે તેને ટેકનોલોજી સાથે વધુ નજીકથી જોડે છે.
