ભારતના ડિજિટલ ક્ષેત્ર માટે જાન્યુઆરી 2026નો મહિનો અત્યંત મહત્વપૂર્ણ સાબિત થયો છે. WhatsAppએ માહિતી ટેકનોલોજી નિયમો 2021 હેઠળ તેનો માસિક અહેવાલ જાહેર કર્યો છે, જેમાં ચોંકાવનારા આંકડા સામે આવ્યા છે. માત્ર એક મહિનામાં 81,79,740 ભારતીય એકાઉન્ટ્સ પર પ્રતિબંધ મૂકવામાં આવ્યો છે. આ રિપોર્ટ 1 જાન્યુઆરીથી 31 જાન્યુઆરી 2026 સુધીના સમયગાળાને આવરી લે છે, જેમાં યુઝર્સની ફરિયાદો, સરકારી સૂચનાઓ અને કંપની દ્વારા લેવામાં આવેલા સ્વતઃ પગલાંની સંપૂર્ણ વિગતો સામેલ છે.
એક જ મહિનામાં 81 લાખથી વધુ એકાઉન્ટ્સ પર તવાઈ
જાહેર કરાયેલા આંકડા મુજબ, કુલ 81,79,740 એકાઉન્ટ્સને પ્લેટફોર્મ પરથી હટાવી દેવામાં આવ્યા છે. જેમાંથી 19,83,760 એકાઉન્ટ્સ એવા હતા કે જેને કોઈ યુઝરની ફરિયાદ મળે તે પહેલાં જ WhatsApp ની સિસ્ટમે ઓળખી કાઢ્યા હતા અને બંધ કરી દીધા હતા. એટલે કે અંદાજે 20 લાખ જેટલા એકાઉન્ટ્સ પર કંપનીએ પોતાની રીતે કાર્યવાહી કરી છે. ભારતીય એકાઉન્ટ્સની ઓળખ +91 મોબાઈલ નંબરથી કરવામાં આવે છે, તેથી આ તમામ પ્રતિબંધો ભારત સાથે જોડાયેલા યુઝર્સ પર લાગુ થયા છે. ભારત આ પ્લેટફોર્મનું સૌથી મોટું બજાર હોવાથી, આટલા મોટા સ્તરે લેવાયેલા પગલાં દર્શાવે છે કે દુરુપયોગ રોકવાની પ્રક્રિયા હવે કેટલી વ્યાપક બની ગઈ છે.
યુઝર્સ દ્વારા નોંધાયેલી ફરિયાદોનું વિશ્લેષણ
જાન્યુઆરી દરમિયાન કુલ 27,981 ફરિયાદો નોંધાઈ હતી, જેમાંથી 520 એકાઉન્ટ્સ પર કાર્યવાહી કરવામાં આવી હતી. સૌથી વધુ ફરિયાદો 'બાન અપીલ' એટલે કે પ્રતિબંધ હટાવવા માટેની હતી, જેની સંખ્યા 16,328 રહી હતી. આ ઉપરાંત, અન્ય સપોર્ટ સંબંધિત 11,198 કેસ સામે આવ્યા હતા. એકાઉન્ટ સપોર્ટના 139 અને સુરક્ષા સંબંધિત 215 કેસોની પણ જાણ કરવામાં આવી હતી. આ આંકડા સ્પષ્ટ કરે છે કે બિઝનેસ અને પર્સનલ કામ માટે WhatsApp ના વધતા વપરાશને કારણે એકાઉન્ટ બંધ થવું એ યુઝર્સ માટે હવે ગંભીર વિષય બન્યો છે.
સરકારી દેખરેખ અને સલામતીના પગલાં
અહેવાલમાં જણાવાયું છે કે ગ્રીવન્સ એપેલેટ કમિટી (Grievance Appellate Committee) તરફથી 16 આદેશો પ્રાપ્ત થયા હતા અને તે તમામનું પાલન કરવામાં આવ્યું હતું. આ બાબત દર્શાવે છે કે ડિજિટલ પ્લેટફોર્મ્સ પર સરકારી દેખરેખ વધુ કડક બની રહી છે. કંપનીનું કહેવું છે કે તે નુકસાન થયા પછી એક્શન લેવાને બદલે પહેલેથી જ ખોટી પ્રવૃત્તિઓને રોકવા પર ભાર મૂકે છે. End-to-end encryption ની સાથે એન્જિનિયરિંગ અને સેફ્ટી ટીમ સતત કાર્યરત છે જેથી પ્લેટફોર્મ સુરક્ષિત રહી શકે.
