VMC Food Safety Drive: વડોદરા મ્યુનિસિપલ કોર્પોરેશન (VMC) દ્વારા શહેરમાં ખોરાક સુરક્ષા અને આરોગ્યને લગતા કડક પગલાં લેવામાં આવી રહ્યા છે. મ્યુનિસિપલ કમિશ્નરની સુચના અને ડેઝીગ્નેટેડ ઓફિસર તથા અધિક આરોગ્ય અમલદારના માર્ગદર્શન હેઠળ ખોરાક શાખાની ટીમોએ સતત બીજા દિવસે પણ વ્યાપક અભિયાન હાથ ધર્યું હતું. આ અભિયાનમાં શહેરના વિવિધ વિસ્તારોમાં બેકરી, રેસ્ટોરન્ટ અને ફૂડ વેન્ડર્સ પર આકસ્મિક તપાસ કરવામાં આવી, જેમાં મોટા પ્રમાણમાં અખાદ્ય પદાર્થોનો નાશ કરવામાં આવ્યો અને કેટલીક એકમોને સીલ કરી દેવામાં આવી. આ કાર્યવાહીથી શહેરવાસીઓમાં આરોગ્ય પ્રત્યે જાગૃતિ વધી છે અને વેપારીઓને નિયમોનું પાલન કરવા માટે ચેતવણી મળી છે.
ટીમ દ્વારા શહેરના અલગ અલગ વિસ્તારમાં દરોડા
ખોરાક શાખાના સિનિયર ફૂડ સેફ્ટી ઓફિસર અને ફૂડ સેફ્ટી ઓફિસરોની ચાર અલગ-અલગ ટીમો બનાવીને શહેરના ચાર ઝોનમાં તપાસ હાથ ધરવામાં આવી હતી. આ ટીમોએ ગણેશનગર–ડભોઈ રોડ, સરદાર એસ્ટેટ, વૃન્દાવન ચાર રસ્તા, સયાજીગંજ, ફતેગંજ તેમજ જુના પાદરા રોડ–દિવાળીપુરા વિસ્તારોમાં ધ્યાન કેન્દ્રિત કર્યું હતું. તપાસમાં બેકરી, રેસ્ટોરન્ટ, હોકર અને ફૂડ વેન્ડિંગ એકમોના કુલ 49 યુનિટ્સનું નિરીક્ષણ કરવામાં આવ્યું હતું. આમાં 5 હોકર, 5 રિટેલર, 17 ફૂડ વેન્ડિંગ એસ્ટેબ્લિશમેન્ટ, 1 કેન્ટીન, 18 રેસ્ટોરન્ટ અને 3 ઉત્પાદક પેઢીઓનો સમાવેશ થાય છે. આ અભિયાનનો હેતુ જાહેર આરોગ્યને જોખમમાં મુકતા અસ્વચ્છ અને અખાદ્ય ખોરાકને રોકવાનો હતો, જેમાં વીએમસીના અધિકારીઓએ કોઈપણ બેદરકારીને સહન ન કરવાની નીતિ અપનાવી છે.
ટીમ દ્વારા કડક કાર્યવાહી કરાઈ
ચેકિંગ દરમિયાન આઠ યુનિટને શેડ્યૂલ-4 મુજબ નોટિસ ફટકારવામાં આવી હતી. અખાદ્ય અને અસ્વચ્છ હાલતમાં મળી આવેલા કુલ 873 કિલો ખાદ્ય પદાર્થો અને 20 લીટર સોફ્ટ ડ્રિંક્સનો જથ્થો સ્થળ પર જ નાશ કરવામાં આવ્યો હતો. વધુમાં, 35 કિલો સિંગલ યુઝ પ્લાસ્ટિકનો પણ નાશ કરાયો હતો. જાહેર માર્ગ પર ગંદકી ફેલાવવી તથા સિંગલ યુઝ પ્લાસ્ટિકનો ઉપયોગ કરવા બદલ ફૂડ બિઝનેસ ઓપરેટરોને કુલ રૂ.58,000નો દંડ ફટકારવામાં આવ્યો હતો. આ કાર્યવાહીમાં બે યુનિટને તાત્કાલિક બંધ કરાવવામાં આવ્યા હતા અને નિયમોનું ગંભીર ઉલ્લંઘન કરનાર 10 યુનિટને સીલ કરવામાં આવી હતી. આમાંથી ડભોઈ રોડ પરની દિવ્યા બેકરીમાંથી 120 કિલો અને ગણેશનગર વિસ્તારમાં જયભોલે બેકરીમાંથી 520 કિલો અખાદ્ય પદાર્થ મળી આવ્યા હતા. આ બંને બેકરીઓ લાયસન્સ અને રજીસ્ટ્રેશન વગર ધંધો કરી રહી હતી, જેથી તેમને સીલ કરી દેવામાં આવી. સરદાર એસ્ટેટ ચાર રસ્તા નજીક પેમ્પનુન્સ બિરયાનીમાંથી 20 કિલો અખાદ્ય પદાર્થનો નાશ કરી યુનિટ બંધ કરાવવામાં આવી હતી. લઝત કેટરર્સને પણ સીલ કરવામાં આવ્યા હતા.
વેપારી વર્ગમાં પણ જાગૃતિ લાવવાનો સફળ પ્રયાસ
જ્યારે ફાઉન્ટેન રેસ્ટોરન્ટ અને વેનિટી રેસ્ટોરન્ટમાંથી અખાદ્ય પદાર્થોનો નાશ કરીને નોટિસ ફટકારવામાં આવી હતી. આ અભિયાનમાં VMC ની ખોરાક શાખાએ સ્પષ્ટ ચેતવણી આપી છે કે જાહેર આરોગ્ય સાથે કોઈ પણ પ્રકારની બેદરકારી સહન કરવામાં નહીં આવે. આવી કાર્યવાહી આગળ પણ ચાલુ રહેશે અને વેપારીઓને નિયમોનું કડક પાલન કરવા માટે પ્રોત્સાહિત કરવામાં આવશે. આ અભિયાનથી શહેરમાં ખોરાકની ગુણવત્તા અને સ્વચ્છતા વધારવાના પ્રયાસોને વેગ મળ્યો છે. વડોદરાના નાગરિકોને અપીલ કરવામાં આવી છે કે તેઓ અસ્વચ્છ અને અખાદ્ય ખોરાક વેચતા વેપારીઓની જાણ VMC ને કરે, જેથી આવા અભિયાનો વધુ અસરકારક બને. આ કાર્યવાહીથી વેપારી વર્ગમાં પણ જાગૃતિ આવી છે અને તેઓ હવે લાયસન્સ, રજીસ્ટ્રેશન અને સ્વચ્છતાના નિયમોનું પાલન કરવા તત્પર છે. VMC ના અધિકારી દ્વારા જણાવ્યું કે આ અભિયાનના પરિણામે શહેરમાં આરોગ્ય સંબંધિત ફરિયાદોમાં ઘટાડો જોવા મળશે અને નાગરિકોને સુરક્ષિત ખોરાક મળશે.
