ગુજરાતના વેપારી વર્તુળોમાં ચકચાર મચાવતો એક મોટો આર્થિક ગુનો સામે આવ્યો છે. અમદાવાદની ‘જય જલારામ સો મિલ’ના સાત ભાગીદારો સામે કેનેડામાં વસતા મૂળ ગુજરાતી વેપારી સાથે રૂ. 6.18 કરોડથી વધુની છેતરપિંડી આચરવાનો ગંભીર આરોપ લાગ્યો છે. વિદેશથી કરોડો રૂપિયાનો કિંમતી લાકડાનો જથ્થો મંગાવી, મુન્દ્રા પોર્ટ પર નકલી બિલિંગ અને દસ્તાવેજો રજૂ કરીને માલ છોડાવી લેવાયો હોવાનો આક્ષેપ કરવામાં આવ્યો છે. આ મામલે વડોદરા જિલ્લાના Dabhoi પોલીસ મથકે સાતેય ભાગીદારો વિરુદ્ધ ગુનો નોંધવામાં આવ્યો છે. પ્રાથમિક તપાસ બાદ સમગ્ર કેસની વધુ તપાસ કરજણ પોલીસ સ્ટેશનના PIને સોંપવામાં આવી છે.
કેનેડામાં વસતા મૂળ ગુજરાતી વેપારી સાથે છેતરપિંડી
મળતી માહિતી અનુસાર, મૂળ ડભોઈ તાલુકાના મંડાળા ગામના વતની અને હાલ કેનેડામાં સ્થાયી થયેલા સુહદકુમાર ચંદ્રકાંત પટેલ લાકડાના આંતરરાષ્ટ્રીય વેપાર સાથે સંકળાયેલા છે. તેઓ Canada Incorporation નામની પેઢી મારફતે વિવિધ પ્રકારના કિંમતી લાકડાનો વેપાર કરે છે.
અમદાવાદના સેટેલાઈટ અને જશોદાનગર વિસ્તારમાં આવેલી જય જલારામ સો મિલના ભાગીદારો અરજણ કરશનભાઈ પટેલ, શંકરલાલ કરશનભાઈ પટેલ, બાબુ કરશનભાઈ પટેલ, ચેતનભાઈ બાબુભાઈ પટેલ, અલ્પેશ બાબુભાઈ પટેલ, નીરવ પરાગભાઈ પટેલ અને પરાગ બાબુભાઈ પટેલે સુહદકુમાર પાસેથી અલગ-અલગ પ્રકારના લાકડાનો મોટો ઓર્ડર આપ્યો હતો.
ઓર્ડર મુજબ કેનેડાથી સાઉધરન યેલો પાઈન, કોસ્ટા ટીક અને ઈસ્ટર્ન વાઈટ પાઈન જેવા કિંમતી લાકડાના કન્ટેનરો શિપ મારફતે Mundra Port પર મોકલવામાં આવ્યા હતા. આ સમગ્ર માલની કિંમત 7,61,786.44 અમેરિકન ડોલર હોવાનું જણાવાયું છે.
આ પણ વાંચો: અમદાવાદમાં ATM પર વાતોમાં ફસાવી કાર્ડ બદલી કરાઈ લાખોની ઠગાઈ : હરિયાણાના 2 ઠગ ઝડપાયા
નકલી બિલ બનાવી કસ્ટમમાંથી માલ છોડાવ્યો
ફરિયાદ અનુસાર, અમદાવાદના ભાગીદારોએ માલ મંગાવ્યા બાદ ચુકવણી ટાળવા માટે કાવતરું રચ્યું હતું. આરોપીઓએ મૂળ બિલમાં દર્શાવેલી રકમ કરતાં ઓછી કિંમત દર્શાવતું નકલી બિલ તૈયાર કર્યું હતું. આ ઉપરાંત સુહદકુમાર પટેલની કંપનીનું નામ હટાવી તેની જગ્યાએ “વી.કે. ગ્લોબલ કંપની”ના નામે બનાવટી બિલિંગ તૈયાર કરવામાં આવ્યું હતું. આ કૂટચિહ્નિત દસ્તાવેજોને અસલી તરીકે રજૂ કરીને મુન્દ્રા કસ્ટમ હાઉસમાંથી સમગ્ર લાકડાનો જથ્થો છોડાવી લેવામાં આવ્યો હતો.
તપાસમાં સામે આવ્યું છે કે આરોપીઓએ કુલ રકમમાંથી માત્ર 1,12,230.24 અમેરિકન ડોલર એટલે કે અંદાજે રૂ. 1.06 કરોડ જેટલી જ રકમ ચૂકવી હતી. જ્યારે બાકી રહેતી 6,49,556.24 અમેરિકન ડોલર એટલે કે ભારતીય ચલણ મુજબ રૂ. 6,18,50,745.17ની રકમ ચૂકવવામાં આવી નહોતી.
ઉઘરાણી છતાં મળતા રહ્યાં ખોટા વાયદા
ફરિયાદી સુહદકુમાર પટેલે અનેક વખત બાકી ચુકવણી માટે સંપર્ક કર્યો હતો. પરંતુ આરોપીઓ સતત ખોટા વાયદા કરતા રહ્યા હોવાનું ફરિયાદમાં ઉલ્લેખ કરવામાં આવ્યો છે. સમય જતાં તેમને પોતાની સાથે મોટી આર્થિક છેતરપિંડી થઈ હોવાનો અહેસાસ થયો હતો. આખરે તેમણે ડભોઈ પોલીસ મથકમાં સાતેય ભાગીદારો વિરુદ્ધ સત્તાવાર ફરિયાદ નોંધાવી હતી. પોલીસે IPCની વિવિધ કલમો હેઠળ ગુનો નોંધી વધુ તપાસ શરૂ કરી છે.
આ પણ વાંચો: ગુજરાતના મહેસૂલ વિભાગમાં મોટો ફેરફાર : ડે.કલેક્ટર, મામલતદાર સહિત 27 અધિકારીઓની બદલી સાથે પ્રમોશન
આંતરરાષ્ટ્રીય વેપારમાં વિશ્વાસ પર અસર
આ સમગ્ર ઘટનાએ ગુજરાતના આંતરરાષ્ટ્રીય વેપાર વર્તુળોમાં પણ ચિંતા ઊભી કરી છે. ખાસ કરીને વિદેશમાં વસતા ગુજરાતી વેપારીઓ સાથે થતા આવા આર્થિક ગુનાઓથી વેપારી વિશ્વાસને મોટો ફટકો પડી શકે છે. આંતરરાષ્ટ્રીય વેપારમાં બિલિંગ, કસ્ટમ ક્લિયરન્સ અને પેમેન્ટ સિસ્ટમમાં વધુ પારદર્શિતા અને કડક કાનૂની દેખરેખ જરૂરી બની રહી છે. કારણ કે આવા કેસોમાં નકલી દસ્તાવેજોનો ઉપયોગ કરીને કરોડોની છેતરપિંડી આચરવી સરળ બની રહી છે. હાલ પોલીસે નાણાકીય વ્યવહારો, કસ્ટમ દસ્તાવેજો અને આરોપીઓની વ્યાપારી લેવડદેવડની ઊંડી તપાસ શરૂ કરી છે. આગામી સમયમાં આ કેસમાં વધુ ખુલાસા થવાની શક્યતા વ્યક્ત કરવામાં આવી રહી છે.
