Kavad yatra: ઉત્તર પ્રદેશના બાગપતમાં ચાલી રહેલા કાવડ મેળામાં હિન્દુ-મુસ્લિમ એકતાનું એક અનોખું ઉદાહરણ જોવા મળી રહ્યું છે. અહીં એક મુસ્લિમ ડૉક્ટર બાબુ ખાન છેલ્લા 23 વર્ષથી શિવ ભક્તોની સેવા કરી રહ્યા છે.
50 વર્ષીય બાબુ ખાન શ્રાવણ મહિનામાં એક અઠવાડિયા માટે પોતાનું ક્લિનિક બંધ કરીને શિવ કાવડ સેવા કેમ્પમાં રહે છે. શિવ કાવડ સેવા સમિતિના અધિકારી ડોક્ટર ખાન તેમની મેડિકલ ટીમ સાથે કેમ્પમાં હાજર રહે છે અને અહીં આવતા લોકોની સારવાર કરે છે.
બાબુ ખાન હરિદ્વારથી ગંગાજળ લઈને પરત ફરતા કાવડીઓને મફત તબીબી સેવાઓ પૂરી પાડે છે. તેઓ ઘાવ પર પાટો બાંધવાથી લઈને જરૂરી સારવાર સુધીની સુવિધાઓ પૂરી પાડે છે. બાબુ ખાન કહે છે કે શિવ ભક્તોની સેવા કરીને તેમને ખુશી મળે છે. તેમનું માનવું છે કે ભગવાન માટે તપસ્યા કરનારા લોકોની સેવા કરવી એ સૌભાગ્યની વાત છે.
તેમનું કહેવું છે કે સમાજમાં હિન્દુ-મુસ્લિમ એકતા અને શાંતિપૂર્ણ વાતાવરણ જાળવવું મહત્વપૂર્ણ છે. તેમની સેવા ભાઈચારાની એક ઉદાહરણ બની છે. કાવડ યાત્રા 11 જુલાઈથી શ્રાવણ મહિનાની શરૂઆતથી શરૂ થઈ છે. અને કાવડ યાત્રા 23 જુલાઈના રોજ સમાપ્ત થશે.
