આ રાજ્યના ઘણા જિલ્લાઓમાં 2 દિવસ સુધી પડશે ભારે વરસાદ : હવામાન વિભાગે આપ્યું એલર્ટ, 200 થી વધુ રસ્તા બંધ

ભારતના ઘણા રાજ્યોમાં ભારે વરસાદ પડી રહ્યો છે. દિલ્હી-એનસીઆર, ઉત્તર પ્રદેશ અને હરિયાણા સહિત ઘણા જિલ્લાઓમાં વરસાદ ચાલુ છે. હવામાન વિભાગે હિમાચલ પ્રદેશના ત્રણ જિલ્લાઓમાં બે દિવસ એટલે કે સોમવાર અને મંગળવાર સુધી ભારે વરસાદ માટે ઓરેન્જ એલર્ટ જારી કર્યું છે. હવામાન વિભાગે જણાવ્યું હતું કે સોમવારે કાંગડા, મંડી અને સિરમૌરના કેટલાક વિસ્તારોમાં અને મંગળવારે શિમલા, સોલન અને સિરમૌરમાં ભારે વરસાદની શક્યતા છે.

આ સાથે હવામાન વિભાગે શુક્રવાર સુધી 12 જિલ્લાઓમાંથી કેટલાકમાં ભારે વરસાદનું 'યલો એલર્ટ' પણ જારી કર્યું છે. સ્ટેટ ઇમરજન્સી ઓપરેશન સેન્ટર (SEOC) અનુસાર, વરસાદને કારણે આપત્તિગ્રસ્ત મંડી જિલ્લાના 157 રસ્તાઓ સહિત કુલ 208 રસ્તાઓ વાહનવ્યવહાર માટે બંધ છે. જ્યારે સોમવાર સવાર સુધી 745 પાણી પુરવઠા યોજનાઓ અને 139 પાવર ડિસ્ટ્રિબ્યુશન ટ્રાન્સફોર્મર પ્રભાવિત થયા છે.

770 કરોડ રૂપિયાથી વધુનું નુકસાન
હિમાચલ પ્રદેશમાં ચાલુ ચોમાસામાં 770 કરોડ રૂપિયાથી વધુનું નુકસાન થયું છે. SEOC એ જણાવ્યું હતું કે 20 જૂનથી ચોમાસાની શરૂઆતથી 13 જુલાઈ સુધીમાં 98 લોકોના મોત થયા છે, જેમાં 57 લોકો વરસાદ સંબંધિત ઘટનાઓમાં અને ૪૧ માર્ગ અકસ્માતમાં મૃત્યુ પામ્યા છે જ્યારે 178 લોકો ઘાયલ થયા છે અને 34 લોકો ગુમ થયા છે. રાજ્યમાં 31 પૂર, 22 વાદળ ફાટવાના બનાવો અને 18 ભૂસ્ખલનના બનાવો બન્યા છે.

અત્યાર સુધીમાં કેટલો વરસાદ પડ્યો છે?
આ દરમિયાન રાજ્યના કેટલાક ભાગોમાં હળવો થી મધ્યમ વરસાદ પડ્યો છે અને સિરમૌર જિલ્લાના રાજગઢમાં રવિવાર સાંજથી ૭૨ મીમી વરસાદ પડ્યો છે, જ્યારે ખદ્રાલામાં ૪૨.૪ મીમી, પછડમાં ૩૮ મીમી, મંડીમાં ૨૬.૪ મીમી, ભુંતરમાં ૨૨ મીમી, શિલારુમાં ૧૪.૨ મીમી, સીઓબાગમાં ૧૨.૨ મીમી, શિમલા ૧૧.૫ મીમી અને રોહરુમાં ૧૦ મીમી વરસાદ પડ્યો છે.