ઉત્તર સીરિયાના ઇદલિબ પ્રાંતમાં થયેલા વિસ્ફોટમાં ઓછામાં ઓછા છ લોકો માર્યા ગયા અને અનેક લોકો ઘાયલ થયા. અધિકારીઓએ ગુરુવારે આ અંગે માહિતી આપી. વિસ્ફોટના કારણ અંગે હજુ સુધી કોઈ સત્તાવાર નિવેદન જારી કરવામાં આવ્યું નથી. બ્રિટન સ્થિત યુદ્ધ દેખરેખ સંસ્થા 'સીરિયન ઓબ્ઝર્વેટરી ફોર હ્યુમન રાઇટ્સ' એ જણાવ્યું હતું કે વિસ્ફોટ એક દારૂગોળાના ડેપોમાં થયો હતો.
કાટમાળમાં ફસાયેલા લોકોની શોધ ચાલુ
સીરિયન નાગરિક સંરક્ષણ ટીમ 'વ્હાઇટ હેલ્મેટ્સ' એ જણાવ્યું હતું કે વિસ્ફોટમાં ઓછામાં ઓછા છ લોકો માર્યા ગયા છે. ગુરુવારે ઇદલિબના ઉત્તરમાં આવેલા મારત મિસરીન શહેરમાં વિસ્ફોટ થયો હતો. વ્હાઇટ હેલ્મેટ્સે એક નિવેદનમાં જણાવ્યું હતું કે "આ ફક્ત તે લોકોના મૃત્યુઆંક છે જેમના મૃતદેહ સીરિયન નાગરિક સંરક્ષણ ટીમ દ્વારા બહાર કાઢવામાં આવ્યા છે. કાટમાળમાં ફસાયેલા લોકોની શોધ ચાલુ છે."
બચાવ ટીમ ઘટનાસ્થળે પહોંચી
સીરિયન કટોકટી અને આપત્તિ વ્યવસ્થાપન પ્રધાન રૈદ અલ-સાલેહે વિસ્ફોટ વિશે વાત કરતા કહ્યું 'અમે ઇદલિબના ઉત્તર ભાગમાં સ્થિત મારત મિસરીન શહેરમાં થયેલા વિસ્ફોટ પર નજર રાખી રહ્યા છીએ.' તેમણે કહ્યું કે બચાવ ટીમો ઘટનાસ્થળે પહોંચી ગઈ છે અને ઘાયલોને હોસ્પિટલ લઈ જવામાં આવી રહ્યા છે.
'લોકોએ વિસ્ફોટ સ્થળની નજીક જવાનું ટાળવું જોઈએ'
મંત્રી રૈદ અલ-સાલેહે કહ્યું 'અમે ઇદલિબના લોકોને તેમની સલામતી માટે વિસ્ફોટ સ્થળની નજીક જવાનું ટાળવા વિનંતી કરીએ છીએ. અમારી ટીમો ખતરનાક અને જટિલ પરિસ્થિતિઓમાં તેમની સંપૂર્ણ ક્ષમતાથી કામ કરી રહી છે. પરિસ્થિતિ નિયંત્રણ બહાર નથી.'
