Morbi News: અમદાવાદના રાજીવ ગાંધી ભવન ખાતે શુક્રવારે યોજાયેલા કાર્યક્રમમાં મોરબી જિલ્લાના ટંકારા વિસ્તારના ભાજપના વરિષ્ઠ આગેવાનો, સહકારી ક્ષેત્રના હોદ્દેદારો અને 500થી વધુ કાર્યકર્તાઓ કોંગ્રેસમાં જોડાયા હોવાનો કોંગ્રેસે દાવો કર્યો છે. કોંગ્રેસ પ્રદેશ પ્રમુખ અમિત ચાવડાની હાજરીમાં તમામ આગેવાનોને પક્ષનો ખેસ પહેરાવીને સત્તાવાર રીતે આવકારવામાં આવ્યા હતા. કોંગ્રેસમાં જોડાનાર અગ્રણીઓમાં પૂર્વ તાલુકા પંચાયત પ્રમુખ અને ભાજપના પૂર્વ તાલુકા પ્રમુખ નથુભાઈ કડીવાર, ટંકારા ભાજપના કોષાધ્યક્ષ ઉમેશભાઈ ગોહિલ, ભાજપના પૂર્વ તાલુકા ઉપપ્રમુખ લાલજીભાઈ દેત્રોજા તેમજ પૂર્વ તાલુકા પંચાયત સભ્ય રાજુભાઈ કોટડીયા (કોરડિયા તરીકે પણ ઓળખાય છે) સહિતના આગેવાનોનો સમાવેશ થાય છે. કોંગ્રેસના જણાવ્યા મુજબ તેમની સાથે સેંકડો કાર્યકર્તાઓએ પણ પક્ષમાં જોડાવાનો નિર્ણય કર્યો છે.
ખેડૂતોના મુદ્દે સરકાર પર કોંગ્રેસના પ્રહાર
કાર્યક્રમ દરમિયાન ગુજરાત કોંગ્રેસ પ્રમુખ અમિત ચાવડાએ રાજ્ય સરકાર અને ભાજપ પર અનેક મુદ્દાઓને લઈને આકરા આક્ષેપો કર્યા. તેમણે કહ્યું કે સત્તાના દબાણ અને રાજકીય વાતાવરણ છતાં લોકો કોંગ્રેસમાં જોડાઈ રહ્યા છે, જે રાજ્યમાં વધતા અસંતોષનું પ્રતિબિંબ છે. અમિત ચાવડાના જણાવ્યા અનુસાર ખેડૂતોને સરકાર વારંવાર વિવિધ પ્રશ્નોમાં હેરાન કરી રહી છે, જેના કારણે ગ્રામ્ય વિસ્તારોમાં ભારે નારાજગી જોવા મળી રહી છે. તેમણે આરોપ લગાવ્યો કે ખેડૂતોની મંજૂરી વિના ખેતરોમાં વીજ ટ્રાન્સમિશન ટાવર અને વીજપોલ ઉભા કરવામાં આવે છે, પરંતુ ભાજપના કોઈ સ્થાનિક આગેવાન ખેડૂતોના પક્ષમાં અવાજ ઉઠાવતો નથી.
તેમણે વધુમાં કહ્યું કે જમીન માપણી, પાકને યોગ્ય ભાવ, ખાતર-બિયારણની ઉપલબ્ધતા અને કુદરતી આફતો સમયે અસરકારક સહાય જેવી મૂળભૂત સમસ્યાઓ હજુ પણ યથાવત છે. કમોસમી વરસાદથી ખેડૂતોને થતા નુકસાન સામે સરકાર પાસે પૂરતી અને અસરકારક સુરક્ષા વ્યવસ્થા ન હોવાનું પણ તેમણે જણાવ્યું.
સહકારી ક્ષેત્ર અને આરોગ્ય સેવાઓ અંગે પણ ઉઠાવ્યા પ્રશ્નો
અમિત ચાવડાએ સહકારી ક્ષેત્રમાં વધતી રાજકીય દખલગીરી અંગે પણ ચિંતા વ્યક્ત કરી હતી. તેમના મતે સરદાર વલ્લભભાઈ પટેલે ઉભું કરેલું સહકારી માળખું આજે રાજકીય સ્વાર્થ અને ભ્રષ્ટાચારનું કેન્દ્ર બની ગયું છે. તેમણે આક્ષેપ કર્યો કે સહકારી સંસ્થાઓમાં સામાન્ય લોકોને સ્થાન મળતું નથી અને નિર્ણયો રાજકીય પ્રભાવ હેઠળ લેવાઈ રહ્યા છે.
સરકારી ખરીદી પ્રક્રિયા અંગે પણ તેમણે પ્રશ્નો ઉઠાવ્યા. તેમના જણાવ્યા મુજબ સાચા ખેડૂતો કલાકો સુધી લાઈનમાં ઊભા રહેવા છતાં ખરીદી અચાનક બંધ કરી દેવામાં આવે છે, જ્યારે મગફળીની ખરીદી સહિતની પ્રક્રિયામાં મોટા પાયે ભ્રષ્ટાચાર થયો હોવાના આરોપો પણ તેમણે લગાવ્યા. આરોગ્ય સેવાઓ અંગે તેમણે કહ્યું કે સારવારનો ખર્ચ સતત વધી રહ્યો હોવાથી સામાન્ય પરિવારો માટે યોગ્ય સારવાર મેળવવી મુશ્કેલ બની રહી છે. ઉપરાંત સરકારી યોજનાઓ અને લાભોના વિતરણમાં ભેદભાવ થતો હોવાનો પણ તેમણે આક્ષેપ કર્યો.
'ભાજપમાં સાચી વાત કહેવાની જગ્યા નથી'
અમિત ચાવડાએ દાવો કર્યો કે ભાજપમાં સ્વાર્થના રાજકારણને કારણે અન્યાય સામે અવાજ ઉઠાવવાની સ્થિતિ રહી નથી. તેમના મતે પક્ષની અંદર અસંતોષ હોવા છતાં નેતાઓ ખુલ્લેઆમ પોતાની વાત રજૂ કરી શકતા નથી. તેમણે જણાવ્યું કે કોંગ્રેસમાં જોડાયેલા આગેવાનો કોઈ પદ કે સત્તાની લાલચથી નહીં પરંતુ જનતાના પ્રશ્નો માટે લડવાના હેતુથી પક્ષમાં આવ્યા છે. કોંગ્રેસમાં જોડાનાર તમામ કાર્યકર્તાઓને સંગઠનમાં યોગ્ય જવાબદારી અને કામ કરવાની તક આપવામાં આવશે તેવી ખાતરી પણ તેમણે આપી.
2027ની ચૂંટણીને લઈને કોંગ્રેસનો દાવો
પ્રદેશ કોંગ્રેસ પ્રમુખે વિશ્વાસ વ્યક્ત કર્યો કે ગુજરાતની જનતા 2027ની વિધાનસભા ચૂંટણીમાં પરિવર્તન લાવશે. કોંગ્રેસ તાલુકા સ્તરેથી સંગઠન વધુ મજબૂત કરશે અને ઘરે-ઘરે જઈને લોકો સુધી પહોંચવાનો અભિયાન ચલાવશે તેમ તેમણે જણાવ્યું. કોંગ્રેસના જણાવ્યા મુજબ મોરબી અને ટંકારા વિસ્તારના સ્થાનિક પ્રશ્નો, ખેડૂતોની સમસ્યાઓ તથા સહકારી ક્ષેત્રના મુદ્દાઓને ધ્યાનમાં રાખીને મોટી સંખ્યામાં કાર્યકર્તાઓએ પક્ષ પરિવર્તનનો નિર્ણય લીધો છે.
