Suzuki Across : સુઝુકીએ પોતાની લોકપ્રિય SUV 'Across' નું નવું અને અપડેટેડ વર્ઝન દુનિયા સામે રજૂ કર્યું છે. આ SUV હકીકતમાં ટોયોટાની પ્રખ્યાત RAV4 નું રિબેજ્ડ વર્ઝન છે, પરંતુ સુઝુકીએ તેને એક અલગ ઓળખ આપવા માટે તેમાં ઘણા વિઝ્યુઅલ અને ટેકનિકલ ફેરફારો કર્યા છે. આ એક પ્લગ-ઇન હાઇબ્રિડ (PHEV) SUV છે, જે પરફોર્મન્સની સાથે પર્યાવરણનું પણ ધ્યાન રાખે છે.
આકર્ષક ડિઝાઇન અને કલર ઓપ્શન
નવી સુઝુકી એક્રોસમાં આગળના ભાગે એકદમ ક્લીન અને દમદાર ડિઝાઇન આપવામાં આવી છે. તેમાં નવી વિશિષ્ટ ગ્રિલ, મોટા આકર્ષક વ્હીલ્સ અને મજબૂત ફેન્ડર ક્લેડીંગ જોવા મળે છે, જે તેને સ્પોર્ટી અને ઓફ-રોડિંગ લુક આપે છે. આ SUV ચાર શાનદાર કલર ઓપ્શનમાં ઉપલબ્ધ છે: Massive Gray Metallic, Ever Rest Metallic, Super White અને Attitude Black Metallic.
સ્માર્ટ ઈન્ટિરિયર અને હાઈ-ટેક ડિસ્પ્લે
ગાડીની અંદર 'આઇલેન્ડ આર્કિટેક્ચર' કેબિન લેઆઉટનો ઉપયોગ થયો છે, જેનાથી ડ્રાઈવર તમામ કંટ્રોલ્સ અને ડિસ્પ્લેને સરળતાથી ઓપરેટ કરી શકે છે. આ કારમાં 12.3-ઇંચનું ડિજિટલ ઇન્સ્ટ્રુમેન્ટ ક્લસ્ટર અને મોટી 12.9-ઇંચની સેન્ટર ટચસ્ક્રીન આપવામાં આવી છે. આ ઉપરાંત, વિન્ડશિલ્ડ પર સ્પીડ અને નેવિગેશન બતાવતી 'હેડ-અપ ડિસ્પ્લે' પણ છે, જેથી ડ્રાઈવરનું ધ્યાન રસ્તા પરથી ન હટે.
સુરક્ષા માટે એડવાન્સ સેફ્ટી ફીચર્સ
સુઝુકીએ આ વખતે સુરક્ષા પર ખાસ ભાર મૂક્યો છે. તેમાં 'પ્રી-કોલિઝન સિસ્ટમ' આપવામાં આવી છે જે રડાર અને કેમેરાની મદદથી રસ્તા પરના વાહનો, રાહદારીઓ અને સાયકલ સવારોને ઓળખી લે છે અને જરૂર પડે ત્યારે આપોઆપ બ્રેક લગાવવામાં મદદ કરે છે. આ સિવાય લેન ડિપાર્ચર વોર્નિંગ, 360-ડિગ્રી કેમેરા, ઓટોમેટિક ઇમરજન્સી બ્રેકિંગ અને ડ્રાઇવર થાક મોનિટરિંગ જેવા હાઈ-ટેક ફીચર્સ પણ સામેલ છે.
દમદાર પાવર અને સુપરફાસ્ટ સ્પીડ
પરફોર્મન્સની વાત કરીએ તો, તેમાં 2.5-લિટરનું 4-સિલિન્ડર પેટ્રોલ એન્જિન છે જે 141hp પાવર જનરેટ કરે છે. તેની સાથે બે ઇલેક્ટ્રિક મોટર્સ પણ જોડાયેલી છે, જે ગાડીને વધુ કાર્યક્ષમ બનાવે છે. આ SUV ની સૌથી મોટી ખાસિયત તેની સ્પીડ છે, તે માત્ર 6.1 સેકન્ડમાં 0 થી 100 કિમી/કલાકની સ્પીડ પકડી લે છે.
