Suvendu Adhikari Mother Reaction: પશ્ચિમ બંગાળમાં પ્રથમ વખત ભારતીય જનતા પાર્ટી (BJP) ની સરકાર બન્યા બાદ શનિવારે શુભેન્દુ અધિકારીએ મુખ્યમંત્રી પદના શપથ લીધા. કોલકાતાના ઐતિહાસિક બ્રિગેડ પરેડ ગ્રાઉન્ડમાં યોજાયેલા આ શપથ ગ્રહણ સમારોહમાં વડાપ્રધાન નરેન્દ્ર મોદી, કેન્દ્રીય ગૃહમંત્રી અમિત શાહ, ભાજપનું કેન્દ્રીય નેતૃત્વ અને NDA શાસિત રાજ્યોના અનેક મુખ્યમંત્રીઓ ઉપસ્થિત રહ્યા હતા.
આ ખાસ પ્રસંગે મુખ્યમંત્રી શુભેન્દુ અધિકારીના માતા ગાયત્રી અધિકારી પુત્રની આ સફળતા જોઈને અત્યંત ભાવુક થયા હતા. તેમણે ખુશી વ્યક્ત કરતા જણાવ્યું કે, તેઓ પોતે તો ખૂબ ખુશ છે જ, પરંતુ બંગાળની જનતા તેમના કરતા પણ વધુ ખુશ છે.
હવે મહિલાઓની સુરક્ષા અને ન્યાય સૌથી મોટો મુદ્દો
ગાયત્રી અધિકારીએ ખાસ કરીને RG Kar મેડિકલ કોલેજ રેપ અને હત્યા કેસનો ઉલ્લેખ કર્યો. તેમણે કહ્યું કે હવે નવી સરકારની સૌથી મોટી જવાબદારી એ છે કે પીડિતાને સાચો ન્યાય મળે. તેમણે મહિલાઓની સુરક્ષા, રોજગાર અને ગરીબ વર્ગના હિતોને સરકારની પ્રાથમિકતા બનાવવા પણ અપીલ કરી. RG Kar કેસ છેલ્લા બે વર્ષથી પશ્ચિમ બંગાળની રાજનીતિમાં અત્યંત સંવેદનશીલ મુદ્દો રહ્યો છે. કોલકાતાની RG Kar મેડિકલ કોલેજમાં મહિલા ડોક્ટર સાથે થયેલી દુષ્કર્મ અને હત્યાની ઘટનાએ રાજ્યભરમાં ભારે વિરોધ પ્રદર્શન ઉભા કર્યા હતા. ડોક્ટરો, વિદ્યાર્થીઓ અને સામાન્ય નાગરિકોએ રસ્તા પર ઉતરી ન્યાયની માંગ કરી હતી. આ મુદ્દાએ ચૂંટણી દરમિયાન પણ મોટું રાજકીય સ્વરૂપ ધારણ કર્યું હતું
સંઘર્ષ અને પરિવારનો સાથ
ગાયત્રી અધિકારીએ જણાવ્યું કે, તેમના પુત્રએ છેલ્લા પાંચ વર્ષોમાં સતત સંઘર્ષ કર્યો છે અને TMC સરકાર સામે મક્કમતાથી લડત આપી છે. તેમણે જૂની યાદો તાજી કરતા કહ્યું કે વિરોધ પક્ષના નેતા તરીકે શુભેન્દુ પર અનેકવાર જીવલેણ હુમલા થયા હતા. ત્રણથી ચાર વખત એવી સ્થિતિ સર્જાઈ હતી જ્યારે તેમના પુત્રના જીવને જોખમ હતું. શુભેન્દુએ આ લડવાની શક્તિ તેમના પિતા શિશિર અધિકારી પાસેથી મેળવી છે. નોંધનીય છે કે, શિશિર અધિકારી અગાઉ TMCના દિગ્ગજ નેતા અને કાંથી લોકસભા બેઠક પરથી ત્રણ વખત સાંસદ રહી ચૂક્યા છે. વર્ષ 2021ની વિધાનસભા ચૂંટણી પહેલા સમગ્ર અધિકારી પરિવાર ભાજપમાં જોડાયો હતો.
તમિલનાડુમાં સરકાર રચવામાં વિલંબ વિજયના સમર્થકનો આત્મવિલોપનનો પ્રયાસ : પક્ષોએ એકબીજા પર કર્યા આક્ષેપો
ન્યાય અને સુરક્ષા
મુખ્યમંત્રી બન્યા બાદ હવે શુભેન્દુ અધિકારીની જવાબદારીઓ વિશે વાત કરતા તેમની માતાએ ખાસ કરીને આર.જી. કર મેડિકલ કોલેજ રેપ અને મર્ડર કેસનો ઉલ્લેખ કર્યો હતો. તેમણે ભાવુક હૃદયે કહ્યું કે, "હવે મારો પુત્ર મુખ્યમંત્રી બન્યો છે, ત્યારે મારી ઈચ્છા છે કે તે પીડિત દીકરીને સાચો ન્યાય અપાવે." આ ઉપરાંત, તેમણે સરકારની અન્ય પ્રાથમિકતાઓ પર પણ ભાર મૂક્યો હતો. જેમાં મહિલાઓની સુરક્ષા: રાજ્યમાં મહિલાઓ સુરક્ષિત અનુભવે તે જોવું. રોજગાર: યુવાનો માટે રોજગારીની નવી તકો ઉભી કરવી. ગરીબ કલ્યાણ: ગરીબ વર્ગના હિતો માટે કામ કરવું.
ગાયત્રી અધિકારીએ અંતમાં ઉમેર્યું કે, બંગાળના લોકોએ ભાજપ પર જે વિશ્વાસ મૂક્યો છે, હવે સરકારે જનતાની તે અપેક્ષાઓ પર ખરું ઉતરવું પડશે. શપથ ગ્રહણ દરમિયાન ભાજપના કાર્યકરો અને સમર્થકોમાં ભારે ઉત્સાહ જોવા મળ્યો હતો અને ભાજપે તેને બંગાળની રાજનીતિમાં એક ઐતિહાસિક પરિવર્તન ગણાવ્યું છે.
