Sensex Today: ભારતીય શેરબજારમાં આજે રિકવરીની મજબૂત ચાલ જોવા મળી હતી. વોલેટાઇલ સેશન હોવા છતાં, ટ્રેડિંગના અંતે બજાર સતત ચોથા દિવસે વધારા સાથે બંધ રહ્યું હતું. આજના કારોબારમાં સેન્સેક્સ 510 પોઈન્ટ ઉછળીને 74,617 ના સ્તરે બંધ રહ્યો હતો, જ્યારે નિફ્ટીએ પણ 155 પોઈન્ટની આગેકૂચ કરી 23,124 ની સપાટી હાંસલ કરી હતી. ખાસ કરીને આઈટી (IT) અને મેટલ શેરોમાં આવેલી જોરદાર લેવાલીએ બજારને દિવસના ઉચ્ચ સ્તરે પહોંચાડવામાં મહત્વની ભૂમિકા ભજવી હતી. આ તેજી સાથે નિફ્ટીએ ફરી એકવાર 23,100 નો મનોવૈજ્ઞાનિક આંક વટાવી દીધો છે, જે રોકાણકારો માટે પ્રોત્સાહક સંકેત ગણી શકાય.
IT અને મેટલ સેક્ટરમાં તેજીનું તોફાન
આજના ઉછાળામાં આઈટી ઇન્ડેક્સ ટોપ ગેઇનર તરીકે ઉભરી આવ્યો હતો. વિપ્રો (Wipro) ના શેરમાં 3% થી વધુનો વધારો જોવા મળ્યો હતો, જેની પાછળ અન્ય આઈટી દિગ્ગજોમાં પણ લેવાલી નીકળી હતી. બીજી તરફ, મેટલ શેરોમાં પણ રોકાણકારોનો ભારે રસ જોવા મળ્યો હતો. જેપી મોર્ગન (JPMorgan) દ્વારા હિંડાલ્કો અને વેદાંત જેવી કંપનીઓના રેટિંગ અપગ્રેડ કરવામાં આવતા આ સેક્ટરમાં તેજી જોવા મળી હતી. જોકે, ભિલાઈ સ્ટીલ પ્લાન્ટમાં આગની ઘટનાને કારણે સ્ટીલ સેક્ટર પર થોડી નકારાત્મક અસરની આશંકા હતી, પરંતુ એકંદર સેન્ટિમેન્ટ પોઝિટિવ રહ્યું હતું.
આ પણ વાંચો: આ કંપની આપી રહી છે 1 પર 3 Bonus Share : યુદ્ધની તંગ પરિસ્થિતિમાં પણ આપ્યું છે જબરદસ્ત રિટર્ન
કયા શેરો ચમક્યા અને કયા તૂટ્યા?
ગેઇનર્સ: ફોર્ટિસ હેલ્થકેરના શેરમાં 4% નો ઉછાળો આવ્યો હતો કારણ કે IHH હેલ્થકેર પોતાનો હિસ્સો વધારીને 50% કરવાની યોજના ધરાવે છે. એલેમ્બિક ફાર્માને USFDA તરફથી ડાયાબિટીસની દવાની મંજૂરી મળતા શેર 5% વધ્યો હતો. તે જ રીતે, ક્રેડિટએક્સેસ ગ્રામીણ અને ગોદરેજ કન્ઝ્યુમર પ્રોડક્ટ્સમાં પણ સારા બિઝનેસ અપડેટને કારણે તેજી જોવા મળી હતી.
લૂઝર્સ: બીજી બાજુ, જ્યુબિલન્ટ ફૂડવર્ક્સના શેરમાં 10% નો મોટો ઘટાડો નોંધાયો હતો. ડો. રેડ્ડીઝ લેબોરેટરીઝ નિફ્ટીમાં ટોપ લૂઝર રહ્યો હતો. આ ઉપરાંત, ભૌગોલિક રાજકીય જોખમોને કારણે ઈન્ડિગો (IndiGo) ના શેરમાં પણ ઘટાડો જોવા મળ્યો હતો.
