દિગ્ગજ ટેક કંપની Samsung ટૂંક સમયમાં ભારતીય બજાર સહિત વૈશ્વિક સ્તરે તેના બે નવા 5G સ્માર્ટફોન રજૂ કરી શકે છે. આ ડિવાઈસ Samsung Galaxy A57 5G અને Galaxy A37 5Gના નામે લોન્ચ થવાની શક્યતા છે. જોકે કંપનીએ હજુ સુધી સત્તાવાર લોન્ચિંગ તારીખ જાહેર કરી નથી, પરંતુ સોશિયલ મીડિયા પર લીક થયેલા માર્કેટિંગ પોસ્ટર દ્વારા આ ફોનની કિંમત અને સ્પેસિફિકેશન્સ વિશે મહત્વની વિગતો સામે આવી છે.
થાઈલેન્ડમાં લીક થયેલા અહેવાલો મુજબ Samsung Galaxy A57 5Gના 12GB RAM અને 256GB સ્ટોરેજ વેરિઅન્ટની કિંમત આશરે 51,000 રૂપિયા હોઈ શકે છે. કંપની શરૂઆતમાં ગ્રાહકોને આકર્ષવા માટે સમાન કિંમતે 512GB સ્ટોરેજમાં અપગ્રેડ કરવાની ઓફર પણ આપી શકે છે. બીજી તરફ Galaxy A37 5Gના 8GB RAM અને 256GB સ્ટોરેજ ધરાવતા વેરિઅન્ટની કિંમત આશરે 40,000 રૂપિયાની આસપાસ રહેવાની શક્યતા છે. બેંક ડિસ્કાઉન્ટ અને EMIના વિકલ્પો દ્વારા આ કિંમતમાં વધુ ઘટાડો થઈ શકે છે.
આ બંને સ્માર્ટફોનમાં કેમેરા સેટઅપ અત્યંત આધુનિક રાખવામાં આવ્યો છે. Galaxy A57 5Gમાં ટ્રિપલ રિયર કેમેરા યુનિટ જોવા મળશે, જેમાં f/1.8 અપર્ચર ધરાવતો 50 મેગાપિક્સલનો પ્રાઇમરી કેમેરા મુખ્ય આકર્ષણ રહેશે. આ ઉપરાંત હાઈ ક્વોલિટી ફોટોગ્રાફી માટે 12 મેગાપિક્સલનો અલ્ટ્રાવાઈડ લેન્સ અને 5 મેગાપિક્સલનો મેક્રો લેન્સ પણ આપવામાં આવશે, જે યુઝર્સને પ્રોફેશનલ લેવલનો અનુભવ કરાવશે.
ડિઝાઇનના મામલે આ બંને ફોન Galaxy A સીરીઝની ઓળખ સમાન આધુનિક લુક ધરાવે છે. ઓનલાઇન સામે આવેલા ડેટા મુજબ આ ડિવાઈસમાં શક્તિશાળી બેટરી બેકઅપ અને ફાસ્ટ ચાર્જિંગની સુવિધા પણ મળી શકે છે. સેમસંગના આ નવા 5G ફોન પ્રીમિયમ ફીચર્સ અને મજબૂત પરફોર્મન્સ સાથે મિડ રેન્જ સેગમેન્ટમાં અન્ય બ્રાન્ડ્સને મોટી ટક્કર આપે તેવી પૂરેપૂરી સંભાવના છે.
