રશિયામાં એક પેસેન્જર વિમાન ગુમ થયું છે. વિમાને 50 મુસાફરો સાથે ઉડાન ભરી હતી, પરંતુ ટેકઓફ કર્યા પછી વિમાનનો ATC સાથે સંપર્ક તૂટી ગયો હતો. એક અહેવાલ મુજબ, અંગારા એરલાઈન્સનું વિમાન ચીનની સરહદે આવેલા અમુર પ્રદેશના ટિંડા શહેર નજીક ગુમ થઈ ગયું છે. વિમાન તેના લેન્ડિંગ સ્પોટની નજીક હતું, પરંતુ અચાનક એર ટ્રાફિક કંટ્રોલના રડાર સ્ક્રીન પરથી ગાયબ થઈ ગયું. વિમાન ગાયબ થયા પહેલા પાઈલટ તરફથી મેડે કોલના કોઈ સંકેત નથી.
વિમાનના મુસાફરોમાં 5 બાળકો પણ શામેલ
પ્રાદેશિક ગવર્નર વેસિલી ઓર્લોવે વિમાન ગુમ થવાની પુષ્ટિ કરી અને કહ્યું કે વિમાનમાં 43 મુસાફરો હતા, જેમાં 5 બાળકો અને 6 ક્રૂ સભ્યોનો સમાવેશ થાય છે. ગુમ થયેલા વિમાનની શોધ શરૂ કરવામાં આવી છે. રશિયન સમાચાર એજન્સી TASS એ પણ એક સૂત્રને ટાંકીને કહ્યું છે કે અંગારા એરલાઈન્સનું AN-24 વિમાન ટિંડા એરપોર્ટથી થોડા કિલોમીટર દૂર ગાયબ થઈ ગયું છે. રશિયન સરકારે સ્થાનિક પોલીસ અને શોધ ટીમો સાથે મળીને વિસ્તારમાં શોધખોળ શરૂ કરી છે.
ગુમ થયેલા વિમાન વિશે જાણો
તમને જણાવી દઈએ કે AN-24નું પૂરું નામ એન્ટોનોવ-24 છે. તે સોવિયેત રશિયામાં બનેલું મધ્યમ-અંતરની ડબલ-એન્જિન ટર્બોપ્રોપ પેસેન્જર પ્લેન છે. આ પ્લેન ટૂંકા અંતર સુધી ઉડવા માટે બનાવવામાં આવ્યું હતું. આ પ્લેનનો ઉપયોગ ફક્ત પ્રાદેશિક ફ્લાઇટ્સ માટે થાય છે. આ પ્લેન 1959માં પહેલી વાર ઉડાન ભરી હતી. આ પ્લેન ખાસ કરીને રશિયા, પૂર્વી યુરોપ અને એશિયાના દુર્ગમ વિસ્તારોમાં ઉડવા માટે બનાવવામાં આવ્યું હતું.
