Shiv Sena UBT Ram Raksha Andolan: મહારાષ્ટ્રના રાજકારણમાં ફરી એકવાર રામ મંદિરના મુદ્દે રાજકીય ગરમાવો આવી ગયો છે. રામ મંદિરના ભંડોળ (ચંદા) વિવાદને લઈને શિવસેના (UBT) પ્રમુખ ઉદ્ધવ ઠાકરેએ મોટા આંદોલનનું રણશિંગું ફૂંક્યું છે, જ્યારે સામા પક્ષે ભાજપના નેતા અને મંત્રી નિતેશ રાણેએ તેના પર ખૂબ જ તીખો પલટવાર કર્યો છે. નિતેશ રાણેએ ઉદ્ધવ ઠાકરેને 'પાકિસ્તાનના એજન્ટ' સુધી કહી દીધા અને જણાવ્યું કે સનાતન વિરોધી લોકોને ભગવાનના આશીર્વાદ ક્યારેય મળી શકે નહીં. બંને તરફથી થઈ રહેલી આ તીખી નિવેદનબાજીએ મહારાષ્ટ્રના રાજકીય પારાને સાતમા આસમાને પહોંચાડી દીધો છે. ચાલો જાણીએ શું છે સમગ્ર મામલો...
અયોધ્યા રામ મંદિરમાં ભંડોળની ચોરીના મામલાને લઈને ઉદ્ધવ ઠાકરેએ રાજ્યવ્યાપી આંદોલનની જાહેરાત કરતા 5 જુલાઈ, રવિવારના રોજ સાંજે 4 વાગ્યે દાદરના હનુમાન મંદિર પાસે તમામ હિન્દુઓને એકત્ર થવાની અપીલ કરી છે. બીજી તરફ, તેમના આ નિવેદન પર મહારાષ્ટ્ર સરકારના મંત્રી નિતેશ રાણેએ તીખો પ્રહાર કર્યો છે.
ભાજપ પર ઉદ્ધવ ઠાકરેના આકરા પ્રહારો
ઉદ્ધવ ઠાકરેએ ભંડોળ વિવાદ અંગે વાત કરતા કહ્યું કે, ભારતીય જનતા પાર્ટીની સત્તાનો મુખ્ય આધાર રામ મંદિર આંદોલન અને હિન્દુત્વ રહ્યો છે. ઠાકરેએ જણાવ્યું કે ગોધરા કાંડ અને મુંબઈ પર થયેલા આતંકી હુમલા જેવી ઘટનાઓ બાદ દેશના હિન્દુઓએ ઘણું બધું વિચાર્યું અને ભાજપે હિન્દુત્વના મુદ્દાને આગળ ધપાવીને બે સાંસદોથી લઈને દેશની સૌથી મોટી રાજકીય પાર્ટી બનવા સુધીની સફર ખેડી. તેમણે સવાલ ઉઠાવ્યો કે શું હવે 'ઓપરેશન રામ મંદિર' ચલાવવામાં આવી રહ્યું છે અને શું રામ મંદિરમાંથી કથિત રીતે ચોરી કરાયેલા નાણાંનો ઉપયોગ અન્ય રાજકીય પક્ષોને તોડવા માટે થઈ રહ્યો છે?
ઠાકરે એટલાથી જ ન અટક્યા, તેમણે ભાજપ પર નિશાન સાધતા કહ્યું કે હવે હિન્દુઓ મંદિર લૂંટનારાઓને માફ નહીં કરે. તેમણે રવિવારે દાદર સ્થિત હનુમાન મંદિર પાસે તમામ હિન્દુઓને કોઈપણ રાજકીય ભેદભાવ વગર એકઠા થવા અપીલ કરી હતી. ઉદ્ધવ ઠાકરેએ જણાવ્યું કે શિવસેના (UBT) 'રામ રક્ષા આંદોલન' શરૂ કરી રહી છે, જેમાં રામરક્ષા સ્તોત્ર અને હનુમાન ચાલીસાના પાઠ કરવામાં આવશે. તેમનું કહેવું હતું કે આ માત્ર શરૂઆત છે અને આગળ જતાં રાજ્ય તેમજ દેશભરમાં જ્યાં-જ્યાં ભગવાન રામના મંદિરો છે, ત્યાં આ મુદ્દાને લઈને આંદોલન કરવામાં આવશે.
તેમણે ઉમેર્યું કે રામ મંદિર માટે જે લોકોએ સંઘર્ષ કર્યો, જેલમાં ગયા અને પોતાનું લોહી વહાવ્યું, તેમના બલિદાનને વ્યર્થ જવા દેવામાં નહીં આવે. ઉદ્ધવ ઠાકરેએ એવું પણ કહ્યું કે તેઓ મજાકમાં કહી રહ્યા છે કે તેઓ અમિત શાહ સાથે અયોધ્યા જશે. ઠાકરેએ વધુમાં જણાવ્યું કે રામ મંદિરનું નિર્માણ સર્વોચ્ચ અદાલત (સુપ્રીમ કોર્ટ)ના આદેશ બાદ થયું છે અને આ સમગ્ર દેશના લોકોની આસ્થા સાથે જોડાયેલો વિષય છે.
સમગ્ર દેશમાં થશે આંદોલન: ઠાકરે
ઉદ્ધવ ઠાકરેએ જણાવ્યું કે ઉત્તર ભારતીય સમાજ પણ આ આંદોલન સાથે જોડાશે અને શિવસેના (UBT) મહારાષ્ટ્ર સહિત સમગ્ર દેશમાં રામ મંદિર ભંડોળ મામલે આંદોલન કરશે. જો કોઈએ રામ મંદિરના નામે ભ્રષ્ટાચાર કર્યો હોય તો તેની સામે કડક કાર્યવાહી થવી જોઈએ. તેમણે કટાક્ષ કરતા કહ્યું કે એવું ન થવું જોઈએ કે આરોપીઓને પાછળથી કોઈ રાજ્યના રાજ્યપાલ કે મંત્રી બનાવી દેવામાં આવે.
પટનાની બાંકીપુર બેઠક પરથી પ્રશાંત કિશોર ચૂંટણી લડશે : 5 જુલાઈએ થશે ઔપચારિક જાહેરાત
ઠાકરે પાકિસ્તાનના એજન્ટ છે: નિતેશ રાણે
બીજી તરફ, ઉદ્ધવ ઠાકરેની આંદોલનની જાહેરાત પર મહારાષ્ટ્ર સરકારના મંત્રી નિતેશ રાણેએ જોરદાર પ્રતિક્રિયા આપી છે. રાણેએ કહ્યું કે ઉદ્ધવ ઠાકરે પાકિસ્તાનના એજન્ટ છે અને તેમને હવે રામ મંદિર યાદ આવી રહ્યું છે. તેમણે આક્ષેપ કર્યો કે મુખ્યમંત્રી રહેતા ઉદ્ધવ ઠાકરેએ અઝાનની સ્પર્ધા કરાવી હતી. રાણેએ કહ્યું કે પાકિસ્તાનના આતંકવાદીઓ જે પ્રકારની ભાષા બોલે છે, તેવી જ ભાષા ઉદ્ધવ ઠાકરે બોલી રહ્યા છે. નિતેશ રાણેએ એમ પણ કહ્યું કે રામ મંદિર આંદોલન સાથે તેમનો કોઈ સંબંધ નહોતો અને તે સમયે તેઓ માત્ર કેમેરા સાફ કરતા હતા.
ઠાકરેની શિવસેના મુશ્કેલ સમયમાં!
ઉદ્ધવ ઠાકરેએ આ આંદોલન શરૂ કરવાની જાહેરાત એવા સમયે કરી છે જ્યારે તેમની પાર્ટી મુશ્કેલ તબક્કામાંથી પસાર થઈ રહી છે. ભાજપના સાથી પક્ષ અને મહારાષ્ટ્રના ડેપ્યુટી સીએમ એકનાથ શિંદેની આગેવાની હેઠળની શિવસેનાએ ઠાકરેની પાર્ટીમાં મોટું ગાબડું પાડ્યું છે અને તેમના 6 સાંસદોને પોતાની તરફ કરી લીધા છે. આ સાથે જ આદિત્ય ઠાકરેના નજીકના MLC સચિન અહીરને પણ શિંદેએ પોતાની સાથે જોડી લીધા છે.
આવી પરિસ્થિતિમાં હવે પાર્ટીને મજબૂત કરવા અને જનતાનું સમર્થન મેળવવા માટે ઉદ્ધવ ઠાકરેએ નવા છેડેથી ભાજપને ઘેરવા માટે રામના સહારે નવું આંદોલન છેડવાનો નિર્ણય કર્યો છે.
'હલાલાના નામે યૌન શોષણ નહીં ચાલે' : હલાલા અને ત્રણ તલાક મુદ્દે અલ્હાબાદ હાઈકોર્ટનું મોટું નિવેદન
