લોકસભામાં વિપક્ષના નેતા અને કોંગ્રેસના સાંસદ રાહુલ ગાંધીએ બુધવારે ઓલ ઈન્ડિયા કોંગ્રેસ કમિટી (AICC) મુખ્યાલયમાં પ્રેસ કોન્ફરન્સને સંબોધતા ચૂંટણી પંચ પર ગંભીર આરોપ લગાવ્યા હતા. બ્રાઝિલિયન મોડેલનો ફોટો બતાવતા તેમણે કહ્યું કે તેણીએ હરિયાણામાં 22 વખત વોટ આપ્યા, ક્યારેક સ્વીટી તરીકે તો ક્યારેક સીમા તરીકે. તેમણે કહ્યું કે આ મોડેલના ફોટાનો ઉપયોગ કરીને નકલી મત બનાવવામાં આવ્યા હતા. તેમણે કહ્યું કે હરિયાણામાં 25 લાખ મતોની ચોરી થઈ હતી. રાહુલ ગાંધીએ કહ્યું કે હરિયાણાના 2 બૂથ પર એક ફોટોનો 223 વખત ઉપયોગ કરવામાં આવ્યો હતો. દરેક મતદાર યાદીનું નામ અલગ અને ઉંમર અલગ હોય છે. રાહુલ ગાંધીએ કહ્યું કે હરિયાણામાં 8 માંથી એક મતદાર નકલી છે.
રાહુલ ગાંધીએ હરિયાણા ચૂંટણીમાં અનિયમિતતાનો દાવો કરતા કહ્યું કે કોંગ્રેસની જીતને ભાજપની જીતમાં ફેરવવાનું કાવતરું ઘડવામાં આવ્યું હતું. તેમણે ચૂંટણી પંચ અને દેશની લોકશાહી પ્રક્રિયા પર સવાલ ઉઠાવ્યા અને કહ્યું કે જનરેશન 'Z' નું ભવિષ્ય "બરબાદ" કરવામાં આવી રહ્યું છે.
લોકસભામાં વિરોધ પક્ષના નેતા રાહુલ ગાંધીએ કહ્યું, "અમારી પાસે 'H' ફાઇલો છે, અને તે આખું રાજ્ય કેવી રીતે ચોરાઈ ગયું છે તે વિશે છે... અમને શંકા હતી કે આ ફક્ત વ્યક્તિગત મતવિસ્તારોમાં જ નહીં, પરંતુ રાજ્ય સ્તરે અને રાષ્ટ્રીય સ્તરે થઈ રહ્યું છે. હરિયાણામાં અમારા ઉમેદવારો તરફથી અમને ઘણી ફરિયાદો મળી હતી કે કંઈક ખોટું છે અને કામ કરી રહ્યું નથી. તેમની બધી ભવિષ્યવાણી અવળી પડી. અમે મધ્યપ્રદેશ, છત્તીસગઢ અને મહારાષ્ટ્રમાં આનો અનુભવ કર્યો હતો, પરંતુ અમે હરિયાણા પર ધ્યાન કેન્દ્રિત કરવાનું અને ત્યાં શું થયું તે વિગતવાર જાણવાનું નક્કી કર્યું છે."
100% પુરાવા સાથે આ કરી રહ્યો છું- રાહુલ ગાંધી
રાહુલ ગાંધીએ આરોપ લગાવ્યો કે હરિયાણામાં નકલી મતદારો દ્વારા હજારો વોટ આપવામાં આવ્યા હતા. રાહુલ ગાંધીએ કહ્યું, "હું ઇચ્છું છું કે ભારતના યુવાનો, જનરેશન Z, આ સ્પષ્ટ રીતે સમજે કારણ કે આ તમારા ભવિષ્યનો પ્રશ્ન છે... હું ચૂંટણી પંચ અને ભારતની લોકશાહી પ્રક્રિયા પર પ્રશ્ન ઉઠાવી રહ્યો છું, તેથી હું 100% પુરાવા સાથે આ કરી રહ્યો છું. અમને ખાતરી છે કે કોંગ્રેસની જંગી જીતને હારમાં ફેરવવા માટે એક યોજના ઘડવામાં આવી હતી... કૃપા કરીને તેમના (મુખ્યમંત્રી નાયબ સૈની) ચહેરા પરના સ્મિત અને તેઓ જે 'વ્યવસ્થા' વિશે વાત કરી રહ્યા છે તેના પર ધ્યાન આપો. ચૂંટણીના બે દિવસ પછી, દરેક વ્યક્તિ કહી રહ્યું છે કે કોંગ્રેસ જંગી જીત સાથે ચૂંટણી જીતી રહી છે..."
તેમણે કહ્યું કે બધા (એક્ઝિટ) પોલ્સ હરિયાણામાં કોંગ્રેસની જીત તરફ ઈશારો કરી રહ્યા હતા... બીજી વાત જેણે અમને આશ્ચર્યચકિત કરી તે એ હતી કે હરિયાણાના ચૂંટણી ઇતિહાસમાં પહેલીવાર, પોસ્ટલ વોટ્સ વાસ્તવિક વોટ્સથી અલગ હતા... હરિયાણામાં આવું પહેલાં ક્યારેય બન્યું ન હતું. તેથી, અમે વિચાર્યું, ચાલો વિગતો શોધીએ. જ્યારે મેં પહેલીવાર તમે જે માહિતી જોવાના છો તે જોઈ, ત્યારે મને વિશ્વાસ જ ન થયો. હું ચોંકી ગયો... મેં ટીમને ઘણી વખત તેની ક્રોસ-ચેક કરવા કહ્યું...
