ભારતીય ઓટોમોબાઈલ માર્કેટમાં Hyundai Motor India Limited એક મજબૂત નામ છે. મારુતિ સુઝુકી અને ટાટા મોટર્સ જેવી કંપનીઓ વચ્ચે હ્યુન્ડાઈએ પોતાના 15 જેટલા મોડલ્સ સાથે મજબૂત પકડ જમાવી છે. જોકે, હ્યુન્ડાઈના પોર્ટફોલિયોમાં એવી અનેક પ્રીમિયમ અને પાવરફુલ કાર્સ છે જે અમેરિકા અને યુરોપના દેશોમાં સુપરહિટ છે, પરંતુ ભારતની જનતા માટે હજુ ઉપલબ્ધ નથી. આ કાર્સમાં લક્ઝરી SUV થી લઈને એડવાન્સ ઇલેક્ટ્રિક સેડાનનો સમાવેશ થાય છે. ચાલો જાણીએ આ 5 લોકપ્રિય મોડલ્સ વિશે જે ટૂંક સમયમાં ભારતમાં લોન્ચ થઈ શકે છે.
Hyundai Palisade: લક્ઝરી અને પાવરનું કોમ્બિનેશન
Palisade એ હ્યુન્ડાઈની સૌથી મોટી અને સૌથી ભવ્ય SUV છે. અમેરિકન માર્કેટમાં આ 7-8 સીટર કાર ખૂબ જ ફેમસ છે, જેમાં 3.8 લિટરનું પાવરફુલ V6 એન્જિન મળે છે. ભારતમાં અનેકવાર તેના ટેસ્ટિંગ મોડલ્સ જોવા મળ્યા છે. લેટેસ્ટ અહેવાલો મુજબ, આ પ્રીમિયમ SUV ને વર્ષ 2026 ના અંત સુધીમાં ભારતીય બજારમાં ઉતારવામાં આવી શકે છે, જે ટોયોટા ફોર્ચ્યુનર જેવી કારને ટક્કર આપશે.
Hyundai Santa Cruz: એડવેન્ચર પ્રેમીઓ માટે પિકઅપ ટ્રક
Santa Cruz એ હ્યુન્ડાઈનો પ્રથમ લાઈફસ્ટાઈલ પિકઅપ ટ્રક છે. તેનો લુક આગળથી હ્યુન્ડાઈ ટૂસૉ જેવો લાગે છે, પરંતુ પાછળના ભાગમાં ઓપન કાર્ગો બેડ આપવામાં આવ્યો છે. જે લોકો ઓફ-રોડિંગ અને એડવેન્ચરના શોખીન છે તેમના માટે આ બેસ્ટ ઓપ્શન છે. તેમાં 281 હોર્સપાવર જનરેટ કરતું ટર્બો એન્જિન મળે છે.
Hyundai Sonata: પ્રીમિયમ સેડાનનો નવો અવતાર
એક સમયે Sonata ભારતની સૌથી મોંઘી સેડાનમાં ગણાતી હતી. હવે તેનું નવું 2025 મોડલ ગ્લોબલ માર્કેટમાં ચર્ચામાં છે. તેમાં કર્વ્ડ ડિસ્પ્લે અને અત્યાધુનિક સેફ્ટી ફીચર્સ સાથેનું પ્રીમિયમ કેબિન આપવામાં આવ્યું છે. તેનો સ્પોર્ટી લુક તેને Toyota Camry જેવી લક્ઝરી કારની હરોળમાં મૂકે છે.
Hyundai Ioniq 6: ફ્યુચરિસ્ટિક ઇલેક્ટ્રિક સેડાન
ઇલેક્ટ્રિક વ્હીકલ સેગમેન્ટમાં Ioniq 6 એ હ્યુન્ડાઈનું આકર્ષક મોડલ છે. તેની એરોડાયનેમિક ડિઝાઇન તેને એક અલગ જ લુક આપે છે. આ કાર સિંગલ ચાર્જ પર 600 કિલોમીટરથી વધુની રેન્જ આપે છે. ઓટો એક્સ્પોમાં તેને પ્રદર્શિત કરવામાં આવી હતી અને એવી શક્યતા છે કે માર્ચ 2026 સુધીમાં તેને ભારત માટે લોન્ચ કરવામાં આવે.
Hyundai Elantra: સ્ટાઇલિશ અને હાઇબ્રિડ એન્જિન
Elantra ભારતની લોકપ્રિય પ્રીમિયમ સેડાન હતી, પરંતુ સેડાનની ઘટતી માંગને કારણે તેને બંધ કરવામાં આવી હતી. જોકે, વિદેશોમાં તેનું 2025 મોડલ પેરામેટ્રિક ડાયનામિક્સ ડિઝાઇનને કારણે ખૂબ વેચાય છે. તેના હાઇબ્રિડ અને N-લાઇન વર્ઝનની વૈશ્વિક સ્તરે ભારે ડિમાન્ડ છે, જે પરફોર્મન્સ અને માઇલેજનું ઉત્તમ મિશ્રણ પૂરું પાડે છે.
