વડાપ્રધાન નરેન્દ્ર મોદી હાલમાં ઇટાલીના મહત્વપૂર્ણ પ્રવાસે છે, જ્યાં તેમનું ભવ્ય સ્વાગત કરવામાં આવ્યું છે. સોશિયલ મીડિયા પર વાયરલ થઈ રહેલી બંને નેતાઓની સેલ્ફી વચ્ચે, આ પ્રવાસનો સૌથી મોટો એજન્ડા એક સંયુક્ત ઓપિનિયન આર્ટિકલ (અભિપ્રાય લેખ) દ્વારા સામે આવ્યો છે. પીએમ નરેન્દ્ર મોદી और ઇટાલીના પીએમ જ્યોર્જિયા મેલોનીએ સાથે મળીને લખેલા આ આર્ટિકલમાં ભારત-ઇટાલીના સંબંધોને એક નવો અને લાંબો વિઝનરી વળાંક આપ્યો છે. બંને નેતાઓએ સ્પષ્ટ શબ્દોમાં જણાવ્યું છે કે, ઝડપથી બદલાતી વૈશ્વિક વ્યવસ્થા વચ્ચે ભારત અને ઇટાલી હવે માત્ર પરંપરાગત મિત્રો નથી રહ્યા, પરંતુ ટેકનોલોજી, વેપાર, સંરક્ષણ, ઉર્જા અને આર્ટિફિશિયલ ઇન્ટેલિજન્સ (AI) જેવા ક્ષેત્રોમાં મજબૂત વ્યૂહાત્મક ભાગીદાર (Strategic Partners) બની ગયા છે.
આ લેખમાં આગામી વર્ષો માટે બંને દેશોએ કયા મોટા લક્ષ્યો નક્કી કર્યા છે, તેને 10 મહત્વના મુદ્દાઓ (10 Points) દ્વારા વિગતવાર સમજાવવામાં આવ્યા છે:
1. ભારત-ઇટાલી સંબંધો હવે “સ્પેશિયલ સ્ટ્રેટેજિક પાર્ટનરશિપ”
બંને વૈશ્વિક નેતાઓએ જણાવ્યું કે ભારત અને ઇટાલી વચ્ચેના સંબંધો હવે સામાન્ય ડિપ્લોમેસીથી ઘણા આગળ નીકળી ગયા છે. લોકશાહી, સ્વતંત્રતા, સમાન મૂલ્યો અને ભવિષ્યવાદી વિચારસરણી પર આધારિત આ ભાગીદારી હવે એક 'ખાસ વ્યૂહાત્મક સંબંધ' બની ચૂકી છે, જે વૈશ્વિક પડકારોનો સામનો કરવા સક્ષમ છે.
2. બદલાતા વૈશ્વિક માહોલમાં સાથે ચાલવા પર ભાર
આર્ટિકલ અનુસાર, 21મી સદીમાં માત્ર એ જ દેશો આગળ વધશે જે નવી ટેકનોલોજી અપનાવશે અને ઉર્જા ક્ષેત્રે પરિવર્તન (Energy Transition) લાવશે. આ બદલાતા માહોલમાં ભારત અને ઇટાલી રાજકીય અને સંસ્થાકીય સ્તરે સતત કનેક્ટેડ રહેશે.
3. ભારતની સ્ટાર્ટઅપ તાકાત + ઇટાલીની ઇન્ડસ્ટ્રીયલ શક્તિ
ભારત પાસે આજે ૨ લાખથી વધુ સ્ટાર્ટઅપ્સ અને 100થી વધુ યુનિકોર્ન કંપનીઓ છે, જ્યારે ઇટાલી પાસે અદભુત ડિઝાઇનિંગ, મેન્યુફેક્ચરિંગ અને સુપરકમ્પ્યુટર ક્ષમતા છે. બંને દેશો આ બંને તાકાતને જોડીને 'કો-ક્રીએશન' (મળીને નવું સર્જન કરવું) મોડેલ પર કામ કરશે.
4. વર્ષ 2029 સુધી 20 બિલિયન યુરોનો વેપાર લક્ષ્યાંક
ભારત અને યુરોપિયન યુનિયન (EU) વચ્ચે ફ્રી ટ્રેડ એગ્રીમેન્ટને બંને દેશોએ મોટી તક ગણાવી છે. આ લેખમાં જાહેરાત કરાઈ છે કે ભારત અને ઇટાલી વર્ષ 2029 સુધીમાં પરસ્પર વેપારને 20 બિલિયન યુરો (આશરે ૨ લાખ કરોડ રૂપિયાથી વધુ) સુધી લઈ જશે. આ માટે સંરક્ષણ, એરોસ્પેસ, ક્લીન ટેકનોલોજી, ઓટોમોબાઇલ પાર્ટ્સ, ફાર્મા અને પ્રવાસન ક્ષેત્ર પર વિશેષ ધ્યાન અપાશે.
5. “મેક ઇન ઇન્ડિયા” અને “મેડ ઇન ઇટાલી” નો અનોખો સંગમ
'મેડ ઇન ઇટાલી' વૈશ્વિક સ્તરે ગુણવત્તાનું પ્રતીક છે અને 'મેક ઇન ઇન્ડિયા' ભારતની ઉત્પાદન ક્ષમતા દર્શાવે છે. હાલમાં બંને દેશોની 1000થી વધુ કંપનીઓ પરસ્પર રોકાણ સાથે કામ કરી રહી છે, જે ગ્લોબલ સપ્લાય ચેઈનને વધુ મજબૂત બનાવશે.
6. AI અને ક્વાન્ટમ કમ્પ્યુટિંગ પર ખાસ ફોકસ
આવનારા દાયકાઓ આર્ટિફિશિયલ ઇન્ટેલિજન્સ (AI), ક્વાન્ટમ કમ્પ્યુટિંગ અને ડિજિટલ ઇન્ફ્રાસ્ટ્રક્ચરના છે. ભારતની ડિજિટલ તાકાત અને કુશળ પ્રોફેશનલ્સને ઇટાલીની ઔદ્યોગિક કુશળતાનો સાથ મળશે, જેના માટે બંને દેશોની યુનિવર્સિટીઓ અને રિસર્ચ સેન્ટરો સાથે મળીને કામ કરશે.
7. માનવ કલ્યાણ માટે AI, લોકશાહી સામે જોખમ નહીં
પીએમ મોદી અને મેલોનીએ સ્પષ્ટ કર્યું કે AI ટેકનોલોજી માણસોની મદદ માટે હોવી જોઈએ, લોકોના અધિકારો છીનવવા કે લોકશાહીને નુકસાન પહોંચાડવા માટે નહીં. ભારતના "માનવ વિઝન" અને ઇટાલીના "એલ્ગોર-એથિક્સ" (નૈતિક AI) મોડેલ દ્વારા આ ટેકનોલોજીનો લાભ ગ્લોબલ સાઉથના ગરીબ અને વિકાસશીલ દેશો સુધી પહોંચાડવામાં આવશે.
8. સાયબર સુરક્ષા અને ડિજિટલ ટ્રસ્ટ
ડિજિટલ દુનિયામાં સુરક્ષા સૌથી મહત્વની છે. બંને દેશો મજબૂત સાયબર ઇન્ફ્રાસ્ટ્રક્ચર અને ડિજિટલ ટ્રેનિંગ પર સાથે કામ કરશે, જેથી દરેક દેશ સુરક્ષિત વાતાવરણમાં નવી ટેકનોલોજીનો ઉપયોગ કરી શકે.
(રોમનું ઐતિહાસિક કોલોસિયમ - પીએમ મોદીના સ્વાગતનું સાક્ષી. Source: heidi hunter / Getty Images)
9. સ્પેસ, સંરક્ષણ અને આતંકવાદ સામે સંયુક્ત મોરચો
ભારતની અદ્યતન સ્પેસ ટેકનોલોજી (ISRO) અને ઇટાલીની એરોસ્પેસ એન્જિનિયરિંગ સંયુક્ત સેટેલાઇટ પ્રોજેક્ટ્સ પર કામ કરશે. આ સિવાય દરિયાઈ સુરક્ષા, આતંકવાદ, સાયબર ક્રાઈમ અને ડ્રગ્સ તસ્કરી જેવા ગંભીર જોખમો સામે બંને દેશોની સેનાઓ અને એજન્સીઓ સાથે મળીને લડશે.
10. IMEC કોરિડોર અને ગ્રીન એનર્જી પર મોટો દાવ
છેલ્લે, 'ભારત-મધ્ય પૂર્વ-યુરોપ આર્થિક કોરિડોર' (IMEC) ને બંને નેતાઓએ ભવિષ્યનો સૌથી મોટો ગેમ-ચેન્જર પ્રોજેક્ટ ગણાવ્યો છે. આ સાથે ગ્રીન હાઇડ્રોજન, રિન્યુએબલ એનર્જી, સ્માર્ટ ગ્રીડ અને ઇન્ટરનેશનલ સોલર અલાયન્સ (ISA) જેવી ગ્લોબલ પહેલો દ્વારા બંને દેશો ગ્રીન એનર્જીના ક્ષેત્રમાં દુનિયાનું નેતૃત્વ કરવા તૈયાર છે.
