પશ્ચિમ બંગાળ વિધાનસભા ચૂંટણીને લઈને રાજ્યમાં રાજકીય પારો ચરમસીમાએ પહોંચ્યો છે. સત્તાધારી પક્ષ અને વિપક્ષ બંને મતદારોને રીઝવવા માટે એડીચોટીનું જોર લગાવી રહ્યા છે. આ દરમિયાન વડાપ્રધાન નરેન્દ્ર મોદીએ પૂર્વ બર્ધમાનમાં એક વિશાળ જનસભાને સંબોધિત કરતા વિપક્ષી દળો પર આકરા પ્રહારો કર્યા હતા. પીએમ મોદીએ બંગાળની જનતાના ઉત્સાહને જોઈને આશ્ચર્ય વ્યક્ત કરતા કહ્યું કે, તેમણે તેમના ગૃહ રાજ્ય ગુજરાતમાં પણ અત્યાર સુધી ક્યારેય આટલી જંગી મેદની જોઈ નથી.
જનતાનો આક્રોશ પરિવર્તનનો સંકેત
વડાપ્રધાને રેલીમાં ઉમટેલી ભીડને સંબોધતા જણાવ્યું હતું કે, ભરબપોરે 12 વાગ્યાના સમયે આટલી મોટી સંખ્યામાં લોકોનું એકત્ર થવું એ કોઈ સામાન્ય વાત નથી. આ દ્રશ્યો દર્શાવે છે કે બંગાળની જનતા પરિવર્તન માટે ઉત્સુક છે. તેમણે વિશ્વાસ વ્યક્ત કર્યો હતો કે 4 મેના રોજ આવનારા પરિણામો રાજ્યની રાજકીય તસવીર બદલી નાખશે. પીએમ મોદીના મતે, આ જનસૈલાબ તો માત્ર એક 'ટ્રેલર' છે, અસલી ચિત્ર હજુ બાકી છે.
ભ્રષ્ટાચાર સામે 'વ્હાઇટ પેપર'ની તૈયારી
ટીએમસી સરકાર પર નિશાન સાધતા પીએમ મોદીએ મોટી જાહેરાત કરી હતી. તેમણે કહ્યું કે જો રાજ્યમાં ભાજપની સરકાર બનશે, તો છેલ્લા 15 વર્ષમાં તૃણમૂલ કોંગ્રેસના શાસન દરમિયાન થયેલા ભ્રષ્ટાચારની તપાસ માટે 'વ્હાઇટ પેપર' બહાર પાડવામાં આવશે. તેમણે આક્ષેપ કર્યો હતો કે શાસક પક્ષના નેતાઓ જનતામાં એવો ડર ફેલાવી રહ્યા છે કે ભાજપના શાસનમાં કલ્યાણકારી યોજનાઓ બંધ થઈ જશે. પીએમ મોદીએ ખાતરી આપી હતી કે કોઈપણ લોકઉપયોગી યોજના બંધ નહીં થાય, પરંતુ ભ્રષ્ટાચારના રસ્તાઓ ચોક્કસપણે બંધ કરી દેવામાં આવશે.
આયુષ્માન ભારત અને ઘૂસણખોરી પર એક્શન
કેન્દ્રીય યોજનાઓનો ઉલ્લેખ કરતા વડાપ્રધાને કહ્યું કે, ભાજપની સરકાર બનતાની સાથે જ પ્રથમ કેબિનેટ બેઠકમાં 'આયુષ્માન ભારત' યોજનાને મંજૂરી આપવામાં આવશે, જેથી રાજ્યના ગરીબ નાગરિકોને મફત સારવારનો લાભ મળી શકે. આ ઉપરાંત, તેમણે ઘૂસણખોરીના મુદ્દે પણ કડક ચેતવણી આપી હતી. તેમણે સ્પષ્ટ કર્યું કે માત્ર ગેરકાયદેસર રીતે આવતા લોકો જ નહીં, પરંતુ તેમને બોગસ દસ્તાવેજો બનાવી આપવામાં મદદ કરનારા તત્વો સામે પણ કડક કાર્યવાહી કરવામાં આવશે.
