Middle East War: મિડલ ઈસ્ટમાં છેડાયેલા જંગની અસર વિશ્વના તમામ દેશો પર પડી છે. વૈશ્વિક સ્તરે ઊર્જાની અછત અનુભવાઈ રહી છે, પરંતુ ભારતીય સેનાએ એવી યોજના બનાવી છે જેનાથી પશ્ચિમ એશિયાના ઊર્જા સ્ત્રોતો પર સેનાની નિર્ભરતા ઘટશે. આજે આપણે સેનાના એ જ પ્લાન વિશે વાત કરીશું.
મિડલ ઈસ્ટના યુદ્ધને કારણે વૈશ્વિક સ્તરે ઊર્જા સંકટ તોળાઈ રહ્યું છે. વિશ્વના ઘણા દેશોમાં તેની સીધી અસર જોવા મળી છે, તો કેટલાક દેશો પર તેની પરોક્ષ અસર પડી છે. આ બધાની વચ્ચે, ભારતીય સશસ્ત્ર દળો એલપીજી (LPG) અને ઈંધણની બચત માટે અનેક ઉપાયો પર વિચાર કરી રહ્યા છે. વાસ્તવમાં, આ અંગે અધિકારીઓએ જણાવ્યું કે ટૂંકા ગાળાના ઉકેલ તરીકે બાયોગેસ આધારિત કુકિંગ સ્ત્રોતોની ખરીદી કરવામાં આવી રહી છે. આ ઉપરાંત, આગામી સમયમાં મોટા પાયે સોલર અને વિન્ડ એનર્જીનો ઉપયોગ વધારવા પર ભાર મૂકવામાં આવી રહ્યો છે. અધિકારીઓના જણાવ્યા અનુસાર, સેના દ્વારા ટૂંક સમયમાં બાયોગેસ સ્ટવની ખરીદી માટેના ઓર્ડર આપવામાં આવે તેવી શક્યતા છે. અધિકારીઓએ કહ્યું કે આ પગલું ઈંધણ સંરક્ષણ પર કેન્દ્રિત છે.
આ પણ વાંચો: રશિયાના ઓઈલ રિફાઈનરી પર યુક્રેનનો મોટો ડ્રોન હુમલો : રોઝનેફ્ટ રિફાઈનરી ભડભડ સળગી, નિકાસ ઠપ થવાની ભીતિ
આ પગલાં ભરવા પર વિચારણા
રિપોર્ટ્સ અનુસાર, ઈંધણની બચત પર ધ્યાન કેન્દ્રિત કરવા માટે આર્મી કોન્વોય (કાફલા)ની વહીવટી અવરજવર 400 કિમી સુધી વાહન દ્વારા અને તેનાથી વધુ અંતરની મુસાફરી ટ્રેન દ્વારા કરવા પર વિચાર કરવામાં આવી રહ્યો છે. આ સમગ્ર મામલે સેનાના એક અધિકારીએ જણાવ્યું કે, આર્મી વાહનોની રોજિંદી અવરજવર પર મર્યાદિત નિયંત્રણો લાદવા પર વિચાર ચાલી રહ્યો છે. આનાથી ઓપરેશનલ ક્ષમતા પર કોઈ અસર નહીં પડે.
અધિકારીના જણાવ્યા અનુસાર, આમાં વાહનોનું પૂલિંગ, રાશન એકત્રીકરણ, સ્ટોર અને સૈનિકોના પરિવહન જેવી ફરજોને સંયોજિત કરવાનો સમાવેશ થાય છે. તેમણે જણાવ્યું કે જ્યાં પણ શક્ય હશે ત્યાં સીએનજી (CNG) અથવા ઇલેક્ટ્રિક સિવિલ હાયર ટ્રાન્સપોર્ટને પ્રોત્સાહન આપવામાં આવશે. નોંધનીય છે કે ભૂતકાળમાં કેટલાક ઉપાયો લાગુ કરવામાં આવ્યા છે, જ્યારે બાકીનાને લાગુ કરવાની પ્રક્રિયા ચાલુ છે.
શું ઓપરેશનલ ફ્લાઈટ્સ પ્રભાવિત થશે?
મીડિયા રિપોર્ટ્સમાં સેનાના અધિકારીને ટાંકીને જણાવવામાં આવ્યું છે કે આ ઉપાયોથી ઓપરેશનલ ફ્લાઈટ્સ (લશ્કરી કામગીરી માટેની ઉડાન) પ્રભાવિત થશે નહીં. જોકે, રૂટિન ફ્લાઈટ્સને ઓપ્ટિમાઈઝ કરવામાં આવશે. ઓપરેશનલ ફ્લાઈટ્સમાં રેકી (જૂજ તપાસ), કેઝ્યુઅલ્ટી ઇવેક્યુએશન (ઘાયલોને બહાર કાઢવા), સૈનિકોનું ઇમરજન્સી રિલોકેશન અને રાશન-સાધનસામગ્રીનો સમાવેશ થાય છે. રિપોર્ટ્સ મુજબ, વર્તમાન સમયમાં સૈનિકો માટે રસોઈ બનાવવા માટે પ્રતિદિન 125-135 ગ્રામ ગેસ નિર્ધારિત છે. સેનાના દરેક યુનિટમાં 4 થી 6 કુક હાઉસ છે, જ્યાં દરરોજ 125 થી 150 સૈનિકોને ભોજન પીરસવામાં આવે છે.
આ પણ વાંચો: અંતરિક્ષમાં પણ ગુંજ્યો ‘બિહૂ’નો નાદ! : અમેરિકન એસ્ટ્રોનોટે સ્પેસ સ્ટેશન પર કર્યો આસામી 'Bihu' ડાન્સ! CM સરમાએ કર્યા વખાણ
દરરોજ કેટલો કુકિંગ ગેસ વપરાય છે?
સેનામાં દરરોજ અંદાજે 1,56,000 કિલોગ્રામ કુકિંગ ગેસનો વપરાશ થાય છે. બાયોગેસના માધ્યમથી આમાંથી 20 ટકા એટલે કે અંદાજે 30,000 કિલોગ્રામ પ્રતિદિન બચાવી શકાય છે. આ સાથે જ સેના પાસે બે લાખથી વધુ પ્રકારના વાહનો છે, જેનો ઉપયોગ વહીવટ, તાલીમ, ઓપરેશન, જાળવણી, સ્ટોર, સાધનો, સૈનિકો અને રાશનના પરિવહન માટે થાય છે. આમાં પણ દરરોજ ભારે માત્રામાં ઈંધણનો વપરાશ થાય છે.
