Mehsana News: મહેસાણા જિલ્લામાં કાયદો અને વ્યવસ્થાની સ્થિતિ સામે સવાલો ઊભા કરતી એક અત્યંત ચોંકાવનારી અને હૃદયકંપાવનારી ઘટના સામે આવી છે. જિલ્લાના ખેરવા ગામમાં ધોળે દિવસે ધોળા દિવસે લૂંટની એક એવી વારદાતને અંજામ આપવામાં આવ્યો છે, જેનાથી સમગ્ર પંથકમાં ભારે સનસનાટી મચી ગઈ છે. ક્રેડિટ સોસાયટીમાંથી બહાર નીકળી રહેલા એક ગ્રાહકને નિશાન બનાવી લૂંટારુઓએ આતંક મચાવ્યો હતો.
છરા જેવા ઘાતક હથિયારો સાથે ત્રાટક્યા લૂંટારુઓ
મળતી માહિતી અનુસાર, ભોગ બનનાર ગ્રાહક ખેરવા ગામમાં આવેલી ક્રેડિટ સોસાયટીમાંથી કિંમતી દાગીના અને મોટી રકમની રોકડ લઈને બહાર નીકળી રહ્યો હતો. તે જ સમયે અગાઉથી જ તાકીને બેઠેલા લૂંટારુઓ છરા જેવા તીક્ષ્ણ અને ઘાતક હથિયારો સાથે તેની પર ત્રાટક્યા હતા. લૂંટારુઓએ ગ્રાહકને ડરાવી-ધમકાવી તેની પાસે રહેલા રોકડા રૂપિયા અને દાગીના આંચકી લેવાનો પ્રયાસ કર્યો હતો.
પ્રતિકાર કરતાં હાથની આરપાર છરો ખૂંપાવી દીધો!
આ ક્રૂર લૂંટ દરમિયાન લૂંટારુઓએ તમામ હદો વટાવી દીધી હતી. લૂંટનો પ્રતિકાર કરવાનો પ્રયાસ કરતાં જ બેખોફ બનેલા ગુનેગારોએ ગ્રાહક પર જીવલેણ હુમલો કર્યો હતો. લૂંટારુઓએ એટલી નિર્દયતા દાખવી કે તીક્ષ્ણ છરો ગ્રાહકના હાથની આરપાર ખૂંપાવી દીધો હતો. લૂંટારુઓ દાગીના અને રોકડની લૂંટ ચલાવીને ધોળેદિવસે ઘટનાસ્થળેથી ફરાર થઈ જવામાં સફળ રહ્યા હતા.
લોહીલુહાણ હાલતમાં હાથમાં ખૂંપેલા છરા સાથે યુવક હોસ્પિટલ પહોંચ્યો
આ ઘટના એટલી ભયાનક હતી કે લૂંટનો ભોગ બનનાર ઈસમ હાથમાં આરપાર ખૂંપેલો છરો એ જ સ્થિતિમાં લઈને તાત્કાલિક સારવાર માટે હોસ્પિટલ પહોંચ્યો હતો. લોહીલુહાણ હાલતમાં અને હાથમાં હથિયાર ફસાયેલું હોય તેવા દ્રશ્યો જોઈને હોસ્પિટલનો સ્ટાફ અને ત્યાં હાજર અન્ય લોકો પણ સ્તબ્ધ થઈ ગયા હતા. ભોગ બનનારને હાલ તાકીદની સારવાર હેઠળ ખસેડવામાં આવ્યો છે.
મહેસાણા પોલીસનો કાફલો દોડતો થયો
ધોળેદિવસે બનેલી આ સનસનીખેજ ઘટનાના પગલે મહેસાણા જિલ્લા પોલીસ તંત્રમાં દોડધામ મચી ગઈ છે. ઘટનાની જાણ થતાં જ ઉચ્ચ પોલીસ અધિકારીઓ સહિતનો મોટો પોલીસ કાફલો ઘટનાસ્થળે તેમજ હોસ્પિટલ ખાતે દોડી ગયો હતો. પોલીસે ગુનો નોંધીને લૂંટારુઓનું પગેરું મેળવવા માટે અલગ-અલગ ટીમો બનાવી છે. આસપાસના સીસીટીવી (CCTV) ફૂટેજ ફંગોળવાની અને નાકાબંધી કરીને આરોપીઓને વહેલી તકે જેલના સળિયા પાછળ ધકેલવા માટે ચક્રો ગતિમાન કરવામાં આવ્યા છે.
