તાજેતરના દિવસોમાં સોશિયલ મીડિયા અને કેટલાક ઓનલાઈન પ્લેટફોર્મ પર એક સમાચાર ઝડપથી વાયરલ થઈ રહ્યા છે કે 30 જૂન 2026 પછી ઇન્ડેન, ભારત ગેસ અને HP ગેસના લાખો LPG કનેક્શન બંધ કરી દેવામાં આવશે. આ દાવાઓને કારણે દેશભરના ગેસ ગ્રાહકોમાં ચિંતા જોવા મળી રહી છે. ખાસ કરીને એવા પરિવારોમાં ગભરાટ વધ્યો છે જે હજુ પણ ઘરેલું રસોઈ માટે LPG સિલિન્ડર પર નિર્ભર છે.
પરંતુ સવાલ એ છે કે શું ખરેખર 30 જૂન પછી LPG સિલિન્ડરની સેવા બંધ થવાની છે? ઉપલબ્ધ માહિતી અને સરકારી નીતિઓનું વિશ્લેષણ કરીએ તો હાલમાં આવી કોઈ સત્તાવાર જાહેરાત કરવામાં આવી નથી. પેટ્રોલિયમ અને પ્રાકૃતિક ગેસ મંત્રાલયે અત્યાર સુધી એવો કોઈ આદેશ જાહેર કર્યો નથી કે જેના આધારે દેશભરના તમામ LPG કનેક્શન આપમેળે બંધ થઈ જાય.
LPG કનેક્શન બંધ થવાના દાવામાં કેટલું સત્ય ?
સરકાર દ્વારા માર્ચ 2026માં એક નીતિગત નિર્ણય લેવામાં આવ્યો હતો, જેમાં PNG (પાઇપ્ડ નેચરલ ગેસ) નેટવર્ક ઉપલબ્ધ હોય તેવા વિસ્તારોમાં ગ્રાહકોને ધીમે ધીમે PNG અપનાવવા માટે પ્રોત્સાહિત કરવામાં આવ્યા હતા. આ સાથે 'નો ડ્યુઅલ કનેક્શન પોલિસી' પણ લાગુ કરવામાં આવી હતી.
આ નીતિનો અર્થ એ છે કે જ્યાં PNG સેવા ઉપલબ્ધ છે ત્યાં નવા LPG કનેક્શન આપતી વખતે કેટલાક વધારાના નિયમો લાગુ થઈ શકે છે. જોકે, તેનો અર્થ એ નથી કે હાલના તમામ LPG ગ્રાહકોના કનેક્શન 30 જૂનથી રદ કરી દેવામાં આવશે. હાલમાં ઈન્ડેન, ભારત ગેસ અને HP ગેસ દ્વારા ઘરેલું LPG સિલિન્ડરની સપ્લાય સામાન્ય રીતે ચાલુ છે અને ગ્રાહકોને નિયમિત સેવા મળી રહી છે.
PNG તરફ શિફ્ટ થવા માટે કેમ આપી રહ્યું છે સરકાર પ્રોત્સાહન?
કેન્દ્ર સરકાર છેલ્લા કેટલાક વર્ષોથી PNGના ઉપયોગને વધારવા પર ભાર મૂકી રહી છે. PNGને સ્વચ્છ, સુરક્ષિત અને સતત ઊર્જા સ્ત્રોત તરીકે જોવામાં આવે છે. LPGની જેમ સિલિન્ડર બુકિંગ કરવાની જરૂર પડતી નથી અને ગેસ સપ્લાય સતત ઉપલબ્ધ રહે છે.
સરકારનું માનવું છે કે PNG અપનાવવાથી ગેસના પરિવહન અને ડિલિવરી ખર્ચમાં ઘટાડો થાય છે. સાથે જ પર્યાવરણને પણ ઓછું નુકસાન થાય છે. આ કારણોસર જ્યાં PNG ઇન્ફ્રાસ્ટ્રક્ચર ઉપલબ્ધ છે ત્યાં ગ્રાહકોને આ વિકલ્પ તરફ વળવા પ્રોત્સાહિત કરવામાં આવી રહ્યા છે.
HPCL અને ઇન્ડિયન ઓઇલે શું કહ્યું?
સરકારી તેલ કંપનીઓ પણ PNGના ફાયદાઓ અંગે જાગૃતિ ફેલાવી રહી છે. HPCLએ ગ્રાહકોને PNGને વધુ અનુકૂળ અને અવરોધરહિત ઊર્જા વિકલ્પ ગણાવ્યો છે. બીજી તરફ ઇન્ડિયન ઓઇલે પણ પેટ્રોલિયમ મંત્રાલયના સંદેશાને આગળ વધારતાં PNGને ક્લીન અને ગ્રીન ફ્યુઅલ તરીકે રજૂ કર્યું છે. કંપનીઓનું કહેવું છે કે PNG દ્વારા ગ્રાહકોને સિલિન્ડર ખાલી થવાની ચિંતા રહેતી નથી અને ગેસની સતત ઉપલબ્ધતા સુનિશ્ચિત થાય છે. જોકે, કંપનીઓએ LPG સેવા તાત્કાલિક બંધ થવાની કોઈ જાહેરાત કરી નથી.
આ પણ વાંચો: કુદરતનું રૌદ્ર સ્વરૂપ કેમેરામાં કેદ થયું! : Video જોઈ લોકોના રૂંવાટા ઊભા થઈ ગયા
'નો ડ્યુઅલ કનેક્શન પોલિસી' શું છે?
નવી નીતિનો સૌથી મહત્વપૂર્ણ ભાગ 'નો ડ્યુઅલ કનેક્શન પોલિસી' છે. તેના હેઠળ જ્યાં PNG કનેક્શન સક્રિય છે ત્યાં નવા LPG કનેક્શન માટે મર્યાદાઓ લાગુ થઈ શકે છે. કેટલાક કિસ્સાઓમાં ગ્રાહકોને PNG અપનાવ્યા બાદ LPG કનેક્શન સરેન્ડર કરવાની સલાહ આપવામાં આવી શકે છે. પરંતુ આ પ્રક્રિયા તબક્કાવાર અને નિયમો અનુસાર કરવામાં આવે છે. હાલના તમામ ગ્રાહકો પર એકસાથે કોઈ કાર્યવાહી થવાની નથી.
લાખો પરિવારો PNG તરફ વળ્યા
પેટ્રોલિયમ મંત્રાલયના આંકડાઓ અનુસાર માર્ચ 2026 બાદથી PNG નેટવર્કના વિસ્તરણમાં નોંધપાત્ર વધારો થયો છે. અત્યાર સુધીમાં 10 લાખથી વધુ નવા PNG કનેક્શન સક્રિય કરવામાં આવ્યા છે. સાથે જ લાખો પરિવારો માટે નવા ગેસ કનેક્શનનું ઇન્ફ્રાસ્ટ્રક્ચર તૈયાર કરવામાં આવ્યું છે. નોંધનીય છે કે લગભગ 1 લાખ પરિવારો પહેલેથી જ LPG છોડીને PNG તરફ વળી ચૂક્યા છે. આ આંકડા દર્શાવે છે કે શહેર વિસ્તારોમાં PNGનો સ્વીકાર ઝડપથી વધી રહ્યો છે.
ગ્રાહકોએ શું કરવું?
જો તમારા વિસ્તારમાં PNG સુવિધા ઉપલબ્ધ હોય તો સ્થાનિક ગેસ વિતરણ કંપનીનો સંપર્ક કરીને તેની માહિતી મેળવી શકો છો. PNG અને LPG સંબંધિત નિયમો અંગે સત્તાવાર માર્ગદર્શન લેવું વધુ યોગ્ય રહેશે. સોશિયલ મીડિયા પર ફેલાતી અફવાઓ પર વિશ્વાસ કરવાને બદલે ગ્રાહકોએ માત્ર સરકાર, પેટ્રોલિયમ મંત્રાલય અથવા અધિકૃત ગેસ કંપનીઓ દ્વારા જાહેર કરાયેલી માહિતી પર જ ભરોસો કરવો જોઈએ.
હાલની સ્થિતિ મુજબ 30 જૂન 2026 પછી દેશભરમાં LPG કનેક્શન બંધ થઈ જશે એવો દાવો સત્તાવાર રીતે સાચો નથી. જોકે PNG ઉપલબ્ધ વિસ્તારોમાં ભવિષ્યમાં નીતિગત ફેરફારો અને નવી માર્ગદર્શિકાઓ લાગુ થઈ શકે છે. તેથી ગ્રાહકોએ સમયાંતરે સત્તાવાર સૂચનાઓ પર નજર રાખવી જરૂરી છે.
