Tamil Nadu Thoothukudi Tornado: તમિલનાડુના તૂતીકોરિન જિલ્લામાં રવિવારે સાંજે એક દુર્લભ અને ચોંકાવનારી હવામાન ઘટના જોવા મળી હતી. આકાશમાં અચાનક દેખાયેલી વિશાળ ફરતી હવાની નળી અને તેની સાથે સર્જાયેલા વિનાશના દૃશ્યો સોશિયલ મીડિયા પર ઝડપથી વાયરલ થઈ રહ્યા છે. ઘટનાના વીડિયોમાં વાદળોમાંથી જમીન તરફ ઉતરતી અને ધીમે-ધીમે વધુ શક્તિશાળી બનતી હવાની ભમરી જોવા મળે છે, જેને જોઈ સ્થાનિક લોકોમાં ભારે દહેશત ફેલાઈ ગઈ હતી. પ્રથમ નજરે આ ઘટના ટોર્નેડો જેવી લાગતી હતી, જેના કારણે સોશિયલ મીડિયા પર અનેક લોકોએ તેને ટોર્નેડો ગણાવ્યો હતો. જોકે હવામાન વિભાગના નિષ્ણાતોએ સ્પષ્ટ કર્યું છે કે, આ પરંપરાગત ટોર્નેડો નહીં પરંતુ અત્યંત શક્તિશાળી વાવાઝોડા અને ક્યુમ્યુલોનિમ્બસ વાદળોથી સર્જાયેલી સ્થાનિક હવામાન ઘટના હતી.
તૂતીકોરિન એરપોર્ટ નજીક જોવા મળ્યું અદભૂત દૃશ્ય
તૂતીકોરિન એરપોર્ટ નજીક સ્થાનિક લોકો અને હવામાનપ્રેમીઓએ આ દુર્લભ ઘટનાના વીડિયો પોતાના મોબાઇલમાં કેદ કર્યા હતા. વીડિયોમાં એક વિશાળ ફરતી ધૂળ અને કચરાની કોલમ ઝડપથી ઊંચાઈ તરફ વધતી જોવા મળે છે. થોડા જ સમયમાં આ હવાની ભમરીએ આસપાસના વિસ્તારોમાં ભારે નુકસાન પહોંચાડ્યું હતું. ખાસ કરીને તૂતીકોરિન-તિરુનેલવેલી હાઇવે નજીક આવેલા વાગાઈકુલમ અને મુડિવૈથાનેનડલ ગામોમાં સૌથી વધુ અસર જોવા મળી હતી. અહીં જોરદાર પવનના કારણે વૃક્ષો ધરાશાયી થઈ ગયા હતા, વીજ પોલ તૂટી પડ્યા હતા અને અનેક મકાનોની છત ઉડી ગઈ હતી.
આ પણ વાંચો: શું NEET-UG પેપર ફરી લીક થયું? : વાયરલ વીડિયોથી મચ્યો હંગામો, NTAએ જાહેર કર્યું સત્તાવાર નિવેદન
200થી વધુ ઘરોને અસર, કરોડોનું નુકસાન
સ્થાનિક રહેવાસીઓના જણાવ્યા અનુસાર લગભગ 200 જેટલા ઘરોને આ ઘટનાથી નુકસાન પહોંચ્યું હતું. અનેક ઘરોમાંથી છતના પતરાં, પંખા અને ઘરવપરાશની વસ્તુઓ હવામાં ઉડી ગઈ હતી. ઘટનાના વીડિયો અને તસવીરોમાં વીજ તાર પર લટકતો કચરો પણ જોવા મળ્યો હતો. વાગાઈકુલમ ટોલ પ્લાઝા નજીક આવેલા ખાનગી થીમ પાર્કને પણ ભારે નુકસાન થયું હતું. પાર્કમાં આવેલી અનેક રાઈડ્સ અને અન્ય માળખાકીય સુવિધાઓ તબાહ થઈ ગઈ હતી. ઉપરાંત ટોલ પ્લાઝાની કાચની બારીઓ, કમ્પ્યુટર સિસ્ટમ અને અન્ય સાધનોને નુકસાન થતાં થોડા સમય માટે વાહનો પાસેથી ટોલ વસૂલાત પણ બંધ રાખવી પડી હતી. પ્રાથમિક અંદાજ મુજબ, રહેણાંક વિસ્તારમાં જ આશરે 2 કરોડ રૂપિયાનું નુકસાન થયું છે, જ્યારે થીમ પાર્ક અને ટોલ પ્લાઝાના નુકસાનને જોડતાં કુલ નુકસાન 5થી 6 કરોડ રૂપિયા સુધી પહોંચે તેવી શક્યતા વ્યક્ત કરવામાં આવી રહી છે.
શું ખરેખર ટોર્નેડો હતો?
ઘટનાના વીડિયો વાયરલ થતાં ઘણા લોકોએ તેને ટોર્નેડો ગણાવ્યો હતો. જોકે ચેન્નાઈ સ્થિત રીજનલ મેટિયોરોલોજિકલ સેન્ટરે આ દાવાને નકારી કાઢ્યો છે. હવામાન નિષ્ણાતોના જણાવ્યા અનુસાર, દક્ષિણ તમિલનાડુ પર સર્જાયેલી તીવ્ર ગાજવીજવાળી વાદળ પ્રણાલીના કારણે જમીન પરથી હવા ખૂબ ઝડપથી ઉપર ઉઠી હતી. આ પ્રક્રિયાને 'અપડ્રાફ્ટ' કહેવામાં આવે છે. ક્યુમ્યુલોનિમ્બસ વાદળોની નીચે સર્જાયેલી આ પ્રબળ હવાની ગતિના કારણે ધૂળ અને કચરાની ફરતી કોલમ સર્જાઈ હતી. નિષ્ણાતોનું કહેવું છે કે, આ ઘટના "લેન્ડસ્પાઉટ ટોર્નેડો", "ડસ્ટ વ્હર્લ" અથવા "ટ્રાન્ઝિયન્ટ ફનલ ક્લાઉડ" જેવી સ્થાનિક હવામાન ઘટનાને વધુ નજીક છે. તૂતીકોરિન વિસ્તારમાં સાચા અર્થમાં ટોર્નેડો સર્જાવાની સંભાવના અત્યંત ઓછી ગણાય છે.
આ પણ વાંચો: BMWની 250 KM/Hની સ્પીડ, એક ભૂલ અને 2 મોત : જન્મદિવસની ખુશીઓ પળવારમાં ફેરવાઈ માતમમાં
સદનસીબે કોઈ જાનહાનિ નહીં
ઘટનાની તીવ્રતા છતાં કોઈ જાનહાનિ થઈ નથી, જે સ્થાનિક લોકો માટે રાહતના સમાચાર છે. બે લોકોને સામાન્ય ઇજાઓ પહોંચી હોવાનું જાણવા મળ્યું છે. સ્થાનિક રહેવાસીઓના જણાવ્યા મુજબ એક મેદાનમાં ક્રિકેટ રમી રહેલા નવ યુવાનોને પવનની તીવ્રતા એટલી વધુ અનુભવાઈ કે તેઓ જમીન પર બેસી એકબીજાને પકડીને બેઠા રહ્યા હતા.
ભારતમાં ટોર્નેડો કેટલા દુર્લભ?
ભારતમાં ટોર્નેડો જેવી ઘટનાઓ ખૂબ જ ઓછી જોવા મળે છે. સામાન્ય રીતે પશ્ચિમ બંગાળ, ઓડિશા અને પૂર્વીય ભારતના કેટલાક વિસ્તારોમાં પ્રી-મોન્સૂન સીઝન દરમિયાન આવા બવંડરો સર્જાતા હોય છે. દક્ષિણ ભારત, ખાસ કરીને તમિલનાડુમાં આવી ઘટના નોંધાવવી અસામાન્ય માનવામાં આવે છે. તૂતીકોરિનની આ ઘટનાએ ફરી એકવાર દર્શાવ્યું છે કે ચોમાસા દરમિયાન સર્જાતા શક્તિશાળી ગાજવીજવાળા વાદળો કેટલા વિનાશક બની શકે છે. સોશિયલ મીડિયા પર વાયરલ થયેલા આ વીડિયો હવે સમગ્ર દેશમાં ચર્ચાનો વિષય બન્યા છે.
