ખેડા જિલ્લામાં ચાંદીપુરા વાયરસથી ફફડાટ : કપડવંજના એક વર્ષના બાળકની હાલત ગંભીર, આરોગ્ય વિભાગ એક્શન મોડમાં

Kheda News: ખેડા જિલ્લામાં ચાંદીપુરા વાયરસના શંકાસ્પદ કેસો સામે આવતા સમગ્ર જિલ્લામાં ચિંતા અને સતર્કતાનો માહોલ જોવા મળી રહ્યો છે. કપડવંજ અને કઠલાલ તાલુકામાંથી બે બાળ દર્દીઓમાં ચાંદીપુરા વાયરસ જેવા લક્ષણો જોવા મળ્યા બાદ બંને બાળકોને ગાંધીનગર સિવિલ હોસ્પિટલમાં સારવાર માટે ખસેડવામાં આવ્યા છે. આ પૈકી કપડવંજ તાલુકાના સાલોડ ગામના માત્ર એક વર્ષના બાળકની હાલત ગંભીર હોવાનું સામે આવ્યું છે, જ્યારે કઠલાલ તાલુકાના મિર્ઝાપુર શિરાની મુવાડીના બાળકની તબિયત હાલ સ્થિર હોવાનું આરોગ્ય વિભાગના સૂત્રોએ જણાવ્યું છે.

ચાંદીપુરા વાયરસના સંભવિત કેસોને ધ્યાનમાં રાખીને ખેડા જિલ્લા આરોગ્ય વિભાગે સમગ્ર જિલ્લામાં એલર્ટ જાહેર કરી તાત્કાલિક પગલાં શરૂ કર્યા છે. અસરગ્રસ્ત વિસ્તારોમાં આરોગ્ય કર્મચારીઓની ટીમો દ્વારા ઘર-ઘર સર્વે, મેડિકલ સ્ક્રીનિંગ અને વેક્ટર નિયંત્રણની કામગીરી યુદ્ધના ધોરણે હાથ ધરવામાં આવી રહી છે.

કપડવંજના બાળકની હાલત નાજુક

મળતી માહિતી મુજબ, કપડવંજ તાલુકાના સાલોડ ગામના એક વર્ષના બાળકને ઊંચો તાવ અને ન્યુરોલોજિકલ લક્ષણો દેખાતા પ્રથમ સ્થાનિક હોસ્પિટલમાં સારવાર આપવામાં આવી હતી. ત્યારબાદ વધુ સારવાર માટે તેને ગાંધીનગર સિવિલ હોસ્પિટલમાં ખસેડવામાં આવ્યો હતો. હાલ બાળકની સ્થિતિ ગંભીર હોવાથી નિષ્ણાત તબીબોની ટીમ તેની સતત દેખરેખ રાખી રહી છે. તબીબો દ્વારા બાળકની સ્થિતિનું વધુ સચોટ મૂલ્યાંકન કરવા માટે એમઆરઆઈ સહિતની જરૂરી તપાસ કરવાની તૈયારી કરવામાં આવી રહી છે. આરોગ્ય વિભાગે જણાવ્યું છે કે લેબોરેટરીના અંતિમ રિપોર્ટ આવ્યા બાદ જ ચાંદીપુરા વાયરસની પુષ્ટિ થઈ શકશે.

આ પણ વાંચો: ગિરનારમાં સિંહના હુમલામાં જીવ ગુમાવનાર 12 વર્ષના માસૂમની અંતિમ વિદાય : હિબકે ચડ્યું મોદજ ગામ

અન્ય બાળકની સ્થિતિ સ્થિર

બીજી તરફ કઠલાલ તાલુકાના મિર્ઝાપુર શિરાની મુવાડીના એક બાળ દર્દીને પણ ચાંદીપુરા વાયરસ જેવા લક્ષણો જણાતા ગાંધીનગર સિવિલ હોસ્પિટલમાં દાખલ કરવામાં આવ્યો છે. હોસ્પિટલના તબીબોના જણાવ્યા મુજબ હાલ તેની તબિયત સ્થિર છે અને સારવારને સારો પ્રતિસાદ મળી રહ્યો છે. બંને બાળકોની સારવાર માટે બાળરોગ અને ન્યુરોલોજી વિભાગના નિષ્ણાત તબીબો સતત દેખરેખ રાખી રહ્યા છે.

આરોગ્ય વિભાગે શરૂ કર્યો સઘન સર્વેલન્સ

શંકાસ્પદ કેસો સામે આવ્યા બાદ ખેડા જિલ્લા આરોગ્ય વિભાગ સંપૂર્ણ એક્શન મોડમાં આવી ગયું છે. કપડવંજ અને કઠલાલ તાલુકાના અસરગ્રસ્ત ગામોમાં આશા વર્કરો, આરોગ્ય કર્મચારીઓ અને મલ્ટીપર્પઝ હેલ્થ વર્કરો દ્વારા ઘર-ઘર જઈને બાળકોના આરોગ્યની તપાસ કરવામાં આવી રહી છે. સાથે જ ગામોમાં તાવ, ઉલ્ટી, આંચકી અથવા અન્ય ગંભીર લક્ષણો ધરાવતા બાળકોની ઓળખ કરી તેમને તાત્કાલિક આરોગ્ય કેન્દ્ર સુધી પહોંચાડવાની કામગીરી શરૂ કરવામાં આવી છે. આરોગ્ય વિભાગ દ્વારા ગામોમાં સતત મોનિટરિંગ કરવામાં આવી રહ્યું છે.

આ પણ વાંચો: સાબરકાંઠામાં ચાંદીપુરાનો ફરી ભય : અરવલ્લીની 3 વર્ષની બાળકી હિંમતનગર સિવિલમાં સારવાર હેઠળ

ફોગિંગ અને પાવડર છંટકાવને અપાયો વેગ

ચાંદીપુરા વાયરસનો ફેલાવો રોકવા માટે અસરગ્રસ્ત વિસ્તારોમાં ફોગિંગ અને જંતુનાશક દવાનો છંટકાવ કરવામાં આવી રહ્યો છે. આરોગ્ય વિભાગ સાથે સ્થાનિક સ્વરાજ્ય સંસ્થાઓ પણ સફાઈ અભિયાનમાં જોડાઈ છે. ગામોમાં પાણી ભરાયેલા સ્થળો, ગંદકીવાળા વિસ્તારો અને મચ્છર-માખીના ઉપદ્રવવાળા સ્થળોએ વિશેષ ધ્યાન આપવામાં આવી રહ્યું છે. આરોગ્ય અધિકારીઓનું કહેવું છે કે સ્વચ્છતા જાળવવાથી અને વેક્ટર નિયંત્રણથી વાયરસના સંભવિત ફેલાવાને નિયંત્રિત કરવામાં મદદ મળશે.

તમામ 11 તાલુકાઓમાં એલર્ટ

આ ઘટના માત્ર કપડવંજ અને કઠલાલ પૂરતી મર્યાદિત ન રહે તે માટે જિલ્લા આરોગ્ય વિભાગે ખેડાના તમામ 11 તાલુકાઓમાં સાવચેતીના પગલાં અમલમાં મૂક્યા છે. દરેક તાલુકામાં ફોગિંગ મશીનો કાર્યરત કરવામાં આવ્યા છે તેમજ પ્રાથમિક આરોગ્ય કેન્દ્રોને જરૂરી દવાઓ અને તબીબી સ્ટાફ સાથે સજ્જ રાખવામાં આવ્યા છે. આશા વર્કરો અને આરોગ્ય ટીમોને ઘરે-ઘરે જઈ બાળકોના આરોગ્ય અંગે માહિતી એકત્ર કરવાની અને કોઈ શંકાસ્પદ લક્ષણો જણાય તો તરત જ ઉચ્ચ કેન્દ્રમાં રિફર કરવાની સૂચનાઓ આપવામાં આવી છે.

ચાંદીપુરા વાયરસ શું છે?

ચાંદીપુરા વાયરસ મુખ્યત્વે બાળકોને અસર કરતો એક દુર્લભ પરંતુ ગંભીર વાયરસ છે. તે સામાન્ય રીતે સેન્ડ ફ્લાય (રેતમાખી) જેવા જંતુઓ દ્વારા ફેલાય છે. શરૂઆતમાં તાવ, ઉલ્ટી, માથાનો દુખાવો, શરીરમાં નબળાઈ જેવા સામાન્ય લક્ષણો જોવા મળે છે, પરંતુ કેટલાક દર્દીઓમાં મગજમાં સોજો (એન્સેફેલાઇટિસ) જેવી ગંભીર સ્થિતિ પણ સર્જાઈ શકે છે. આ વાયરસમાં સમયસર સારવાર અત્યંત જરૂરી છે. લક્ષણો દેખાતા જ બાળકને નજીકની હોસ્પિટલમાં લઈ જવાથી ગંભીર જોખમ ઘટાડી શકાય છે.

લોકોને સાવચેત રહેવાની અપીલ

ખેડા જિલ્લા આરોગ્ય વિભાગે લોકોને અફવાઓથી દૂર રહેવા અને માત્ર સત્તાવાર માહિતી પર વિશ્વાસ રાખવાની અપીલ કરી છે. ખાસ કરીને નાના બાળકોને સ્વચ્છ વાતાવરણમાં રાખવા, ઘરની આસપાસ ગંદુ પાણી ન ભરાવા દેવું, મચ્છર અને માખીના પ્રકોપથી બચવા માટે જરૂરી પગલાં લેવા તેમજ બાળકોમાં અચાનક ઊંચો તાવ, ઉલ્ટી, આંચકી કે બેભાન થવા જેવા લક્ષણો દેખાય તો વિલંબ કર્યા વગર નજીકના આરોગ્ય કેન્દ્રનો સંપર્ક કરવાની સલાહ આપવામાં આવી છે.

આરોગ્ય વિભાગનું કહેવું છે કે હાલ સમગ્ર પરિસ્થિતિ પર સતત નજર રાખવામાં આવી રહી છે અને કોઈપણ નવી માહિતી મળતાં જરૂરી કાર્યવાહી કરવામાં આવશે. જિલ્લામાં સાવચેતીના તમામ પગલાં અમલમાં હોવાથી લોકોને ગભરાવાની જરૂર નથી, પરંતુ સાવચેત રહેવું અત્યંત જરૂરી છે.