સોશિયલ મીડિયા પર સક્રિય રહેતી કીર્તિ પટેલ સામે સુરતના પુણા પોલીસ સ્ટેશનમાં વધુ એક ગુનો નોંધાયો છે. પોલીસના જણાવ્યા મુજબ, ભાવનગર જિલ્લાના બોરડા ગામના સરપંચના પતિ અને વેપારી રાજુ ભમ્મરે ફરિયાદ નોંધાવી છે, જેમાં કીર્તિ પટેલ અને ભાવનગરની સસ્પેન્ડેડ મહિલા કોન્સ્ટેબલ નયના બારૈયા સામે સોશિયલ મીડિયા મારફતે બદનક્ષી કરવા અને ધમકી આપવાના આક્ષેપ કરવામાં આવ્યા છે.
ફરિયાદના આધારે પુણા પોલીસે ભારતીય ન્યાય સંહિતા (BNS) તેમજ ઇન્ફોર્મેશન ટેક્નોલોજી (IT) એક્ટની સંબંધિત જોગવાઈઓ હેઠળ ગુનો નોંધી તપાસ શરૂ કરી છે. કેસની વધુ તપાસ પુણા પોલીસ સ્ટેશનના પોલીસ ઇન્સ્પેક્ટર આર. એચ. મોરીને સોંપવામાં આવી છે.
પોલીસ સ્ટેશન બહારનો વીડિયો ચર્ચામાં
આ કેસ વચ્ચે સોશિયલ મીડિયા પર એક વીડિયો પણ વાયરલ થયો છે, જેમાં કીર્તિ પટેલ પુણા પોલીસ સ્ટેશનની બહાર જોવા મળે છે. વીડિયોમાં તે પોતાના વિરુદ્ધ નોંધાયેલા કેસોને ખોટા ગણાવતી અને ફરિયાદ કરનારને ખુલ્લો પડકાર આપતી જોવા મળે છે. વીડિયોમાં કીર્તિ પટેલ કહેતી સંભળાય છે કે જો કોઈને ફરિયાદ કરવી હોય તો તે પોલીસ સ્ટેશનની બહાર હાજર છે અને સામે આવીને ફરિયાદ કરે. સાથે જ તેણે પોતાના વિરુદ્ધ કરવામાં આવેલા આક્ષેપોને નકારી કાઢતાં બદનક્ષીનો દાવો કરવાની પણ વાત કરી હતી.
આ પણ વાંચો : ઉનાના પાણખણ ગામે સિંહબાળનું મોત : ઇનફાઇટની આશંકા વચ્ચે વન વિભાગે શરૂ કરી સઘન તપાસ
પોલીસ તપાસ ચાલુ
પોલીસના જણાવ્યા મુજબ, ફરિયાદમાં કરવામાં આવેલા આક્ષેપોની તપાસ શરૂ કરવામાં આવી છે. સોશિયલ મીડિયા પોસ્ટ, વીડિયો અને અન્ય ડિજિટલ પુરાવાઓની ચકાસણી સહિત સંબંધિત તમામ પાસાઓની તપાસ કરવામાં આવશે. હાલ ફરિયાદમાં કરવામાં આવેલા આક્ષેપો અંગે કીર્તિ પટેલ અથવા નયના બારૈયાનું સત્તાવાર લેખિત નિવેદન જાહેર થયું નથી. તપાસ પૂર્ણ થયા બાદ જ કેસની હકીકતો વધુ સ્પષ્ટ થઈ શકશે. કીર્તિ પટેલ અગાઉ પણ વિવિધ વિવાદો અને કાયદાકીય કેસોને લઈને ચર્ચામાં રહી ચૂકી છે. જોકે, દરેક કેસમાં અંતિમ કાનૂની સ્થિતિ સંબંધિત તપાસ અને અદાલતી પ્રક્રિયા બાદ જ નક્કી થાય છે.
