Jio ઘરના ટીવીને બનાવી દેશે કોમ્પ્યૂટર : મુકેશ અંબાણીની કંપનીએ લોન્ચ કર્યું JioPC

આજના સમયમાં આર્ટિફિશિયલ ઇન્ટેલિજન્સ (AI)નો ખૂબ ઉપયોગ થઈ રહ્યો છે. ઘણી કંપનીઓએ AIનો ઉપયોગ પણ શરૂ કરી દીધો છે. હવે મુકેશ અંબાણીની રિલાયન્સ ઇન્ડસ્ટ્રીઝની કંપની Jio Platforms એ તેના સેટ-ટોપ બોક્સ (STB) યૂઝર્સ માટે JioPC નામની ક્લાઉડ-આધારિત વર્ચ્યુઅલ ડેસ્કટોપ સેવા શરૂ કરી છે. આ સેવા AI પર પણ ચાલે છે. કંપનીનો દાવો છે કે JioPC નામની આ AI-સંચાલિત સેવા તેમના સેટ-ટોપ બોક્સ દ્વારા "કોઈપણ ટીવીને સંપૂર્ણ રીતે કાર્યરત કમ્પ્યુટરમાં રૂપાંતરિત" કરી શકે છે. ટેક ક્રંચના અહેવાલ મુજબ આ સુવિધા રિલાયન્સ Jioની બ્રોડબેન્ડ સેવા સાથે મફતમાં ઉપલબ્ધ છે અથવા તેને 5,499 રૂપિયામાં અલગથી પણ ખરીદી શકાય છે.

કેવી રીતે કાર્ય કરે છે JioPC?
JioPC હાલમાં મફત ટ્રાયલ મોડમાં છે અને રાહ યાદી દ્વારા પસંદગીના ગ્રાહકો માટે ઉપલબ્ધ કરાવવામાં આવ્યું છે. આમંત્રણ પ્રાપ્ત કર્યા પછી ગ્રાહકો ફક્ત તેમના કી-બોર્ડ અને માઉસને કનેક્ટ કરીને તેમના ટીવી સ્ક્રીન પર વર્ચ્યુઅલ ડેસ્કટોપનો ઉપયોગ કરી શકે છે. જો કે, JioPC હજુ સુધી કેમેરા અને પ્રિન્ટર જેવા ઉપકરણોને સપોર્ટ કરતું નથી. તેની વેબસાઇટ અનુસાર આ સેવા ઓપન-સોર્સ લિબરઓફિસ પ્રી-ઇન્સ્ટોલ સાથે આવે છે અને માઇક્રોસોફ્ટ ઓફિસ એપ્લિકેશન્સનો ઉપયોગ બ્રાઉઝર દ્વારા અલગથી કરી શકાય છે.

JioPC વેબસાઇટ કહે છે કે "તે બ્રાઉઝિંગ, એપ્લિકેશન્સ ચલાવવા, શૈક્ષણિક સાધનોનો ઉપયોગ કરવા, ઓનલાઈન વર્ગો કરવા માટે ઉત્તમ છે. તે સસ્તું છે, તેનો કોઈ પ્રારંભિક ખર્ચ નથી અને જાળવણી અથવા અપગ્રેડની કોઈ ચિંતા નથી કારણ કે બધું ક્લાઉડમાં મેનેજ થાય છે." વર્ચ્યુઅલ ડેસ્કટોપ સેવાનો ઉપયોગ કરવા માટે વપરાશકર્તાઓને સતત ઇન્ટરનેટ કનેક્ટિવિટીની જરૂર પડશે.

Jio પહેલાથી જ આ પર કામ કરી રહ્યું હતું...
આ જાહેરાત Jio Infocomm ના ચેરમેન આકાશ અંબાણીના માર્ચમાં નિવેદનના ચાર મહિના પછી આવી છે, જેમાં તેમણે કહ્યું હતું કે Jio પ્લેટફોર્મ્સ ક્લાઉડ-આધારિત પીસી બનાવી રહ્યું છે જે યૂઝર્સને કમ્પ્યુટ-સઘન AI એપ્લિકેશનો ચલાવવાની મંજૂરી આપશે.

AI એપ્સ ચાલશે કે નહીં?
જોકે, હજુ સુધી એ સ્પષ્ટ નથી કે JioPC AI એપ્સ ચલાવી શકશે કે નહીં. ખાસ વાત એ છે કે JioPC એવા સમયે લોન્ચ કરવામાં આવ્યું છે જ્યારે એક મહિના પહેલા જ અહેવાલો આવ્યા હતા કે ChatGPT નિર્માતા OpenAI રિલાયન્સ ઇન્ડસ્ટ્રીઝ અને અન્ય કંપનીઓ સાથે $40 બિલિયન ફંડિંગ માટે વાટાઘાટો કરી રહી છે. રિપોર્ટ અનુસાર રિલાયન્સ આ ફંડિંગમાં ઓછામાં ઓછા કરોડો ડોલરનું રોકાણ કરવા જઈ રહી છે.